台北自遊行 (第一天) I

        去完台北返嚟都差唔多成廿日喇，一直都無時間寫番呢次嘅遊記，今日卒之得閒啲喇，( 死唔死呀你話，做我哋呢行，居然星期六係得閒到寫 blog，今日淨係上一個學生咋，全部都請哂假，佢哋係咪夾埋 o架！) 所以就揀相同加番個 logo 上去，然後開始陸續 "交貨"。

        第一日一到步，就梗係去酒店 check-in 先啦，我哋係住天成酒店，都 OK 舒服，我哋對酒店要求唔會太高，因為反正都係夜晚瞓覺先至會返酒店，所要只要舒服乾淨就得喇。擺低哂行李之後，首先就去西門町祭五臟廟，Winnie 幫我哋揀咗「鴨肉扁」做頭炮食店，不過我就無得食喇，因為我唔食鴨 o架嘛！不過唔緊要，因為之前喺香港機場時，當住個海關人員面前要飲哂包鈣思寶 ( 我諗你哋都知點解啦 )，去到候機室又食埋個自家出品腰果朱古力鬆餅，所以根本唔肚餓。

        呢碟就係鴨肉同三碗自選粉麵。佢哋三個應該俾個店員 "昆" 咗，點解咁講？因為個條友話間舖啲鴨肉最細嘅 serving size 係半隻，送到埋嚟之後，見到咁大碟，即刻被嚇嚫，食完佢都唔駛食其他嘢囉！因為我無得食，所以我無無聊聊四圍望，周圍[目及]，發現原來大部份人碟鴨肉都條得果幾舊，唔會叫咁大碟，咁你話佢哋係咪俾人"昆" 喇！可能我哋四條友個額頭都鑿住 "遊客" 兩個字啩！

        食完嘢之後就去咗附近一間 CD 舖度行吓。嘩，開正阿聰同 Li Kien 個瓣啦，所以佢哋都睇咗好耐，而之前未食 lunch 嘅我就開始肚餓喇，所以 Winnie 就陪我去咗食「阿宗麵線」，佢話如果話俾人聽去完台北都無食過咁出名嘅阿宗麵線，就實俾人笑喎！

        因為幫襯完碗麵線，間舖會俾張 coupon 你，買嘢飲會平啲，一向唔係咁鍾意飲凍嘢嘅我，就將個優惠俾咗 Winnie，佢叫咗杯百香果汁飲。杯果汁真係好抵，你睇張相就知啦，咁大杯，佢足足飲咗成日呀！而且啲果味都好香濃，佢用嚟裝完果汁個水壺，返酒店洗淨後仲有好大陣百香果味。

        食完嘢，join 埋阿聰同 Li Kien 就繼續周圍行吓，我哋去咗「果風小舖」度睇嘢。呢個舖頭賣啲嘢好特別、好攪笑 o架，你睇落去就知啦！

        有冒牌「曼秀雷敦」薄荷膏啦。

 

        衛生巾綿花糖啦。

 

        冒牌「杜蕾斯」安全套朱古力，個封面公仔仲將佢放落口都含，哎吔，真係反哂胃！

        仲有士多啤梨味俾你揀 o添！

 

        連星爺嘅含笑半步癲都有，仲印埋佢個嘜頭係上面，勁呀！

 

        舖頭門口仲有賣一啲特色蘋果甜品。

        嘩，睇見都好吸引。

 

        我哋就買咗一個原味焦糖嚟試。

 

        其實我當初以為佢係朱古力，如果知道係焦糖我就唔會話試 o架喇，因為明知好甜呀！好彩佢係連埋個酸酸哋嘅青蘋果一齊食，咁先至無咁甜咋，不過因為個蘋果係凍嘅，所以攪到啲焦糖凝固後變得好黏牙！

        食完甜點就繼續行程，去咗另一檔食鹹嘢，可能大家都想生痱滋啩！

        就係呢檔可樂餅喇！其實係唔同口味嘅薯餅。

 

        喺個招牌公仔前留影。你哋有無留意到，個公仔係喊緊 o架，仲滴緊眼淚 o添！睇嚟都係因為食咗自己嘅出品而喊。依，咁個薯餅咪會好難食！？

 

        我哋試咗個豬肉味，都 OK好食 o架！唉，咁個代言人又做乜鬼喺度喊呀，作死咩，想幫公司趕客呀！

        食完可樂餅，Winnie 就問我哋：「好唔好食呀？」

        我哋話：「好食！」

        Winnie ：「好食啊，咁行啦！」

        跟住 Li Kien 就好攪鬼咁問 Winnie：「吓，咁係咪如果唔好食，我哋就要繼續企番喺度！！」

        救命呀！真係笑到肚都攣！！  啲人見到我哋四條友仔喺條街度猛咁笑，以為我哋 shot 咗！