吉列魚柳配他他汁

        今日特登整呢個吉列魚柳，都係因為想試吓個微波爐嘅「健康油炸食品」功能，而呢個吉列魚柳就係說明書裡面嘅 demo菜式做法。

材料：
鯰魚柳
鮮麵包糠
麵粉
雞蛋
橄欖油

醃料：
鹽
胡椒粉
雞粉

        魚柳洗乾淨、瀝乾水，用抹手紙索乾水份後切件，加入調味料醃好備用。

        先將雞蛋打成蛋液，加入 2湯匙麵粉，再加入少少橄欖油拌勻成炸漿。將魚柳先蘸上炸漿，再撲上鮮麵包糠，之後排放好在烤盤上，放入焗爐，然後按制選擇自動烹調食譜中嘅「健康油炸食品」功能，咁就整好呢個魚柳喇！

        由於我係用鮮麵包糠去做，所以唔會太過深色，食時外面脆卜卜、裡面魚肉嫩滑，跟用明火油炸無分別，一樣咁掂！配埋自製他他汁一齊食仲正！

P.S.  製作鮮麵包糠：

        將白方包放入焗爐內稍為烘乾水份 ( 毋須焗到好似多士咁脆，表面稍為乾硬就得 )，跟住將麵包撕碎，放入攪拌機內打碎，便成為鮮麵包糠。