照燒京蔥帆立貝

材料：
急凍帆立貝
京蔥(大蒜)

照燒汁材料：
日本醬油
味醂
玫瑰露酒
糖

 

        日本醬油同味醂。

       帆立貝解凍後洗乾淨備用；京蔥洗乾淨、切細段；然後用竹簽將京蔥同帆立貝梅花間竹咁串起。

        先準備照燒汁，將醬油、味醂同玫瑰露煮滾，加入糖，煮到所有糖都溶哂就 OK。平底鑊內燒熱少少油，將串好嘅帆立貝同京蔥放落鑊，用中慢火將兩面煎到微微金黃色時，就可以掃上照燒汁，然後繼續煎香，將步驟重覆多次直至材料煎熟及上色，最後將用剩嘅照燒汁再回鑊煮到濃縮變稠，之後將汁淋喺帆立貝上即成。

        甜甜哋嘅照燒汁帶有少少酒香，令到原本已經非常清甜嘅京蔥變得更惹味。而照燒帆立貝食落就好似磯燒元貝咁樣，不過當然唔會咁硬，係新鮮軟熟 o架！

P.S.  照燒汁正式應該係用日本廚用調理酒，但我唔想為咗煮少少汁而去買支酒，所以就隨手攞咗支玫瑰露嚟用，反而有種特別嘅香味。照燒汁材料比例：

醬油：味醂：酒 = 2：1：1

至於糖嘅份量就可根據自己口味喜好而調整。