《莫扎特傳》VCD & Brahms "Works for Solo Piano" CD box set

        早前收到學生 Lianne 考 ATCL 嘅 result，今次佢成績好好，所以我都好開心，證明我冇睇錯，佢其實係有 potential 考高分，只不過係佢上次顧住考好個試入大學而無時間練琴啫。

        當我打電話俾佢，諗住通知佢成績出咗時，佢就死氣沉沉咁同我講：「我都知你做乜打電話俾我，但係我聽日要考試喎 (佢依家喺港大醫學院讀緊 )，咁樣會好影響我心情 o架噃！」咁我就同佢講：「我知，所以妳今晚就開心吓先啦！」佢估唔到我呢次打電話俾佢係報喜，以為我純粹叫佢考試前唔好緊張，要放鬆心情，我諗佢實係諗住自己呢次考試又 fail。之後我同佢講番個實情，佢啲語氣即刻 180度轉變，變得非常雀躍，佢仲記錯咗個 passing mark，以為自己今次考試合格之餘仲多 3分，但聽佢把聲已經好開心，但我同佢講：「咩呀，妳係咪計錯數呀，係合格多 13 分喎！」佢聽完之後就更加興奮，好似完全唔記得咗第二日要考試咁，即刻一洗頹風，變成隻開籠雀。

        我哋傾咗一陣之後，因為我唔想阻佢溫書，所以就約佢搵日俾番張 result slip 俾佢，於是就約咗兩星期後喺佢屋企樓下個商場同佢個工人交收。到咗果日，見到佢工人後，我就交封 result俾佢，之後就諗住走人，因為趕住過去老人中心度教唱歌，點知佢工人同我講：「呢袋嘢係小姐叫我拎俾你 o架！」我話：「依，有嘢俾我？」打開一睇，原來係一隻《莫扎特傳》VCD 同 Brahms 嘅 "Works for Solo Piano"  CD box set，仲有一張 thank you card o添！唔怪得之早前佢無端端打電話俾我，問我鍾意邊個 composer 啦！

        我當然好開心啦，但開心唔係因為有禮物收，而係教琴教咗十幾年，都未試過有學生咁有心、咁尊重自己，所以我諗呢次係我近呢幾年嚟令我最開心嘅一件事，平時就多數只有勞氣同激氣，識得我耐嘅人都一定知道，難怪 Louisa 最近都同我講，佢話 Li Kien 都形容佢係我近排收到最乖、最好嘅學生！

        因為我有叫工人通知 Lianne 覆電話俾我，所以佢後尾都打番電話俾我，我當然即刻多謝佢啦，佢就話：「唔駛客氣，大家都識咗咁多年，你又 "不厭其煩" 咁教我彈琴，忍受我啲 "sight-reading" ，哈哈！係呢，你鍾唔鍾意隻 CD呀？其實我都唔知買咩CD俾你好，但係見你以前考 ATCL都係揀 Brahms，所以我估你都應該鍾意 Brahms 嘅，不過唔知你原本有無呢套 CD。」我話：「我真係有套 Brahms 嘅 CD o架，不過就唔同唱片公司，同埋裡面啲歌都唔係全部一樣，有好幾首重要作品我果套都無，所以我都好鍾意呀！」

       其實有好多時候，若果識得欣賞對方，即使係做一啲好細微嘅事或收到一啲好平凡、好普通嘅物件，你都會因此而好開心，覺得對方對自己好好。記得以前我同媽咪都有去搵一個師傅做推拿，因為佢真係幫到我哋，減輕咗唔少痛楚，所以我同媽咪每逢過時過節，都一定會買嘢送俾佢，當係多謝佢。坦白講，我哋都唔會買啲咩高級嘢、貴價嘢俾佢，而且佢都用慣靚嘢，收慣厚禮，佢未必會覺得我哋送俾佢嘅嘢矜貴，只係表達對佢嘅一點心意。但估唔到有次佢同我媽咪講，佢其實都好開心，好欣賞每次我哋送俾佢嘅嘢，佢話雖然可能只係一啲好普通嘅生果，但係佢唔係真係食果啲生果咁簡單，而係 "食" 我哋果份心意，雖然我哋家境唔算好好，但係有對佢果份心意，都會買嘢俾佢，相比起佢另外一啲好 "有米" 嘅客，反而咁來一條毛都未送過俾佢，佢就覺得我哋好尊重佢，佢就覺得好開心，情況完全同我依家跟 Lianne 一模一樣，大家都彼此欣賞對方、珍惜對方！