冬至出品

        今日係冬至，我諗好多 blog 友都應該喺廚房忙足一日，準備做節嘅晚飯。我呢，因為得自己一個，所以唔使攪任何嘢，咁啱今日又無工開，但又唔想成日量地同拍烏蠅咁無聊，見呢兩日暖番啲，都係時候搵啲嘢攪吓！

 

        因為聽日會去探媽咪，所以今日就整定啲發糕聽日帶過去，之後仲整咗泡菜㖭，其實啲泡菜都已經食哂好耐㗎喇，不過上次準備整時，發覺包辣椒粉全部變哂一嚿嚿，雖然只係用過好少部份，但都無辦法，變咗都迫住要掉啦！所以唯有等到早兩日出開去尖沙咀時就走去韓國街買過包新嘅，今日就可以整泡菜喇！

 

 

意式三文治 Panini

        記得好耐之前老表同我講過，話佢好鍾意食 panini，當時其實我係完全唔知道係乜，聽都未聽過個名，只係知道係一種麵包，於是就上網搵吓食譜，睇吓係點樣整，點知搵極都搵唔到食譜，心諗，老表妳啲口味都夠哂冷門喎！！

 

        直到最近喺書局度俾我見到本關於 panini 同 open sandwich 嘅食譜書，先知道原來panini 唔係一種麵包，而係意大利一種烤三文治嘅做法，其實用任何款式麵包都可以做到，但意大利傳統係會用 ciabatta 嚟整，只要將麵包切開，放入餡料，之後再放入特整嘅 panini 烤焗機內焗到麵包香脆，外觀會見到烤焗後嘅坑紋，係意式三文治嘅特色。書內仲介紹到唔用 panini 烤焗機都一樣可以做到相同效果，就係利用一隻有坑紋嘅 grill pan，直接上火烤至香脆。睇完之後，我就即刻諗起老友 Louisa 送俾我嘅鑄鐵 grill pan，咁我又有機會玩吓喇，呵呵！ :P

 

 

橙皮紅莓乾 muffin

        早前老表話想試吓自己整糖漬橙皮，於是我就俾咗包已經儲咗好耐嘅橙皮佢拎番屋企試吓整，成品都唔錯喎，非常香甜，今日我就用佢同酒浸紅莓乾嚟整 muffin。

 

 

茄醬蕎麥小米雜菜

        早幾個禮拜唔記得喺邊到睇到有個鬼佬食譜係用藜麥嚟煮素菜，大概係煮雜菜啦，我以為藜麥淨係當沙律食或代替飯做主糧，諗唔到原來都可以用嚟煮餸，等我又試吓用蕎麥同小米嚟燴雜菜先！

 

 

Biga 麵種 Ciabatta

        早前喺網上睇到關注意大利拖鞋包 ciabatta 嘅資料，原來傳統做法係會先整一個長時間發酵嘅麵種，叫做 biga，同上次跟「藍帶」個食譜整嘅 ciabatta 又有少少分別，所以又想試吓整，咁啱我手上又有一個教整 biga 嘅食譜喎，一於參考吓佢再自己改良材料同做法吧！

 

 

咁都得！？！？

        早排整過兩次發糕，兩次都爆唔開！！

 

        第一次整完之後，以為係包泡打粉過咗期，無哂 "威力"，所以發唔起，於是走去買過包新嘅返嚟再整過，點知結果都係一樣，真係抓爆頭！！ ~X(  左諗右諗，都唔知發生咩事，明明不嬲都係咁整，又無量錯材料，又無做錯步驟，火力又校到最猛，喺無得再諗嘅情況之下，唯有係懷疑包低筋麵粉，印象中之前一直都係用日本粉整，自從買韓國粉之後好似都未整過發糕。好，又試吓買番包日本粉嚟整，睇吓又點！！！

 

 

冬菇栗子燜麵筋

        早排喺 Facebook 度見到表姐買咗桂林錐栗子燜雞翼，我睇見都流口水，皆因我都好鍾意食栗子。之後去 Charmaine 屋企上課，佢媽咪又係喺度燜緊栗子，真係頂唔順喇，我又要買番磅嚟燜餸至得！！

 

 

味道‧懷念

        唔想講咁多喇，睇咗我個 blog 耐嘅 blog 友就自然明白我點解想同大家分享呢個港台節目！

杏仁蛋糕 Almond Cake

                買咗啲嘢收得好得滯，收埋收埋成日都唔記得咗，到發現時都已經過期甚至變壞，做成浪費！前排打開個櫃搵嘢時先同包 marzipan "重逢"，真係完全無咗件事呢！！的起心肝，就試吓用佢嚟整蛋糕。

                 唔知大家有無睇鄭裕玲個節目，有集佢哋入咗間法國有名嘅糖果店買嘢，當中介紹咗一款糖果就係用 marzipan 整成，賣相非常之靚，色彩豐富，但我估食落口就肯定甜到漏！！

素雜菜湯 & 意粉

                早前睇港視嘅飲食節目《食的秘密》，其中一集節目介紹到港式西餐，原來正宗嘅羅宋湯係用紅菜頭去煲，當由山東傳到嚟香港後，因當時紅菜頭唔係咁易買得到，所以廚師就改用茄膏去增加色澤。

                今次我就紅菜頭同茄膏兩樣都用，所以味道特別濃、特別甜。當然，最重要嘅步驟係先將香料、茄膏、洋蔥等食材用油爆過先加水煲湯，否則煲出嚟嘅湯就唔夠香濃。

松露醬 & 魚子醬

        之前老表送咗樽魚子醬同松露醬俾我，都搭配過唔同類形嘅食材。

 

 

橄欖油消化餅

        前排世衛公佈，加工肉類食品屬於致癌物質，其毒性相當於石棉、香煙同酒精，初時聽到報導都唔覺得好意外，但跟住聽埋落去，話牛肉、豬肉等紅肉都屬於致癌食品，呢樣就真係有啲 shock，話因為多攝取紅肉脂肪就會致癌。雖然我自己一向都少食，但真係估都估唔到有咁大殺傷力！查實間唔中先食一次加工醃製食品都唔會食壞人嘅，又唔係叫你日日食，都唔使話驚到要謝絕所有加工食品，我成日都話，食煙嘅人未必係肺癌死，飲酒嘅人亦唔一定會死於肝癌，正所謂該死就唔使病，食幾多著幾多都真係整定嘅！！

 

        識整西點的話就肯定知道一定會用到大量牛油，不單只口感鬆脆，仲會增加成品香味，但對我嚟講嗰種唔係香而係臊，所以我已經無用好耐，真係頂唔順佢嘅味道，而且都係屬於動物性脂肪，多食都無益。本來用 margarine 代替就最啱，臊味奶味都無，不過有反式脂肪就仲死得人多，都係盡量少用，所以我整西點盡可能都係用液體油，唔單只係麵包同 muffin，就連餅乾、批底同 scone 我都試過用液體油整，效果有時比起用牛油更加鬆脆，真係好奇怪！

 

 

肩頸按摩器

        長期性頸膊痛真係好困擾，而且亦確確實實咁體會到以前成日聽到老人家所講嘅 "仲準過天文台"，更重要係，頸膊痛亦係其中一個導致到我成日頭痛嘅原因！以前曾經有段時間跟媽咪一齊去做推拿，嗰段時間係成世人覺得最舒服，唔單只少好多頭痛同頸膊痛，成個人都超精神爽利，完全無任何倦意，不過可惜收費極貴，幾百蚊粒鐘，兩個人夾埋做一次就過千喇，所以後來老竇被公司裁員之後，我哋都無再去推拿，因為唔敢亂洗錢，玩唔起！！

 

        老竇都知我長期性頭痛同頸膊痛，所以早前搭個朋友買咗部肩頸按摩器俾我，聽佢講國產貨好似平過韓國貨差唔多一半，超級抵用，但其實講真呀，依家幾多大牌子貨品咪又係 made in China，反而仲要俾好大部份廣告費㖭！！雖然機器始終唔敢人手咁好，但都仲好過無，按摩完之後真係舒服好多，頸膊肌肉都鬆好多。

 

 

又做義工

        老表話我呢排多咗出街 (其實佢意思係話我多咗出外活動)，梗係啦，依家大把時間量地同拍烏蠅，吃喝玩樂同 shopping 又唔多啱我，咁做義工就最好不過啦，有意義之餘又可以打發時間，幫到人又幫埋自己，何樂而不為呢！俾著以前，請得郁我呢個宅男都真係唔易㗎！！ :D

        上次幫 Pinkdot 做義工時，周圍都係英文人，估唔到今次就全場都有好多 "煲冬瓜" 人，因為其實好多台灣同內地嘅 LGBT 團體飛過嚟參加遊行，加上本地好多專上學院都有收內地學生，所以國語人多都唔出奇嘅！反而值得欣賞嘅係見到都有啲父母帶埋自己仔女一齊嚟參加遊行，從小就教識佢哋社會上嘅多元性，對自己人多啲理解同明白，就可以減少誤解同恐懼，繼而減少歧視！

與兩老短聚

        見到寫住兩老，咪以為係講緊我媽咪同我老竇呀，我邊有咁好福氣呀！！係老友 Winnie 同老表 Lily 至真。

 

        因為老表即將獻出佢嘅第一次，要公開演奏呀，所以咪特邀老友呢位老師過嚟聽吓佢彈成點囉，順便俾佢實習一下面對人彈琴的壓力。

 

 

水瓜 & 浦瓜

        今朝一早起身過去同 Ryan、Rylie 兩兄妹上堂，教完之後順便喺佢哋住個屋苑街市度買埋餸先返屋企。經過菜檔見到兩款好少見嘅瓜，印象中屋企附近個屋邨街市未重建之前都只係見過一、兩次有得賣，但我自己就真係完全未食過喇！我問菜檔阿姐呢兩款係咩瓜，原來一隻叫水瓜，另一隻就叫做浦瓜，阿姐話可以炒又可以滾湯，見價錢又唔係貴，兩款都係賣 $7 斤，所以各買一隻試試。

 

        講開啲少見嘅瓜，我記得細個時媽咪間中都會買一隻叫白瓜嚟炒餸，好似依家唔見有得賣嘅！？

 

 

泡菜熱狗 Kimchi Hot Dog

        早幾日喺電視節目度睇到主持人介紹泡菜漢堡，即刻就諗起 Maangchi 姨個泡菜熱狗。

 

        雪櫃仲有少少泡菜剩喺度，一於又玩吓泡菜熱狗，清哂啲泡菜之後就可以再醃過啲新喇！

 

 

老友烘焙學校新張之喜

        今日係老友 Louisa 嘅烘焙學校「360 烘焙大師之家」新張大喜日子，我同 Winnie 及 Ernest 媽咪梗係要去恭賀一下老友榮升老闆啦！

 

 

黃薑麵包

        Ernest 媽咪買咗條黃薑多士麵包俾我，我真係完全無諗過用黃薑嚟整麵包，黃薑味道非常香濃，切咗少少俾老表試食，佢食第一啖之後就話好有 "摩囉叉" 味道喎，哈哈，真係俾佢激鬼死！！

 

 

橙皮朱古力香蕉鬆餅 Candied Orange Peel & Chocolate Banana Muffin

        知道 Ernest 婆婆嚟咗，趁出門口前有啲時間，整啲 muffin 做見面禮先！

 

 

肉桂薑味猶太麵包 Cinnamaon & Ginger Bagel

        老友最近做老闆開 bakery 學校，打頭陣嘅課程係整 bagel，原本佢都叫我一齊去上堂，但可惜當日要教琴，所以無去到。不過唔緊要啦，自己匿喺個私家廚房度玩個夠吧！

 

 

齋人食齋醬

        又要多謝 Ernest 媽咪送我呢樽齋醬料，係明符其實嘅齋嚟㗎，無蔥蒜，食齋嗰日都食得，真係好！

 

 

 

超級月光

        噚晚睇《晚間新聞》時知道，原來噚晚個月光係超級月光，即係月球位置最接近地球，所以望到個月光嘅 size 係最大，報導話可惜噚晚多雲，要睇的話就要喺雲層罅隙先睇到。

 

 

日、韓風料理

        原來上個禮拜不約而同咁整咗日、韓素食喎！

 

 

純素蜂蜜抹茶鬆餅 Vegan Honey Maccha Muffin

        其實我都跟過好幾個唔同食譜整 vegan muffin，但始終發覺無加雞蛋落去整的話，個 texture 入口係會比較黏口，中式發糕情況都一樣，但好多人又話唔覺，唔通係我要求太高！？ :-w

 

         呢個 muffin 都係參考自型仔廚師 Ryoya 嘅 Matcha & Adzuki beans Muffin (vegan) 食譜，算係我整過咁多 vegan muffin 之中 texture 最好，相對叫做無咁黏口，但我覺得始終都係唔及加咗雞蛋般清爽。

 

 

日式醬油燒飯糰

        依家天氣熱，我好多時第二餐都會整壽司食，但係整壽司都幾麻煩，要預備好幾種材料，之後又要捲到唔散，都有一定功夫，如果時間唔夠的話都真係唔好攪喇！

 

        呢次又試吓跟型仔廚師 Ryoya 整個功夫少得多嘅醬油燒飯糰，不過第一次整毫無經驗，真係有超大進步空間呢！ :P

 

 

義工禮品

        Pinkdot 當日，有贊助商贈送禮品俾每一位義工。

 

        其實整個活動能夠做到免費入場，免費任飲任食，又提供所有音響器材作音樂會用，都係多得各大商業機構支持及贊助，當然，大部份都係外資大行、投行、銀行等，華人企業就只係佔少數啦！

 

 

繼續做義工

        既然都已經提早開始咗做義工嘅計劃，咁就唔好俾佢停。

 

        由於自己喺工作同生活上，某程度上有好幾方面都屬於少眾，所以好清楚當中被人誤解，甚至係歧視的感受，所以我一直以嚟都希望做義工嘅服務對象係一啲易被忽略及誤解嘅少眾。加入「WeWah 音樂家」係幫基層家庭嘅小朋友圓夢，打破只有相當經濟能力家庭嘅小朋友先至可以學鋼琴，而今次呢份義工嘅對象就係 LGBT community，所以噚日由朝企到晚，攰到爆之餘仲曬到變咗隻燒豬。

 

        Pinkdot 原本係由新加坡發起嘅一個活動，提倡建構「平等互愛、多元共融」嘅社會，活動係一個大型戶外露天嘉年華會，LGBT community 邀請自己家人及朋友一齊出席，與一家大細及朋友一齊野餐，大家開開心心一齊玩。2014 年就引入到香港，所以今年已經係第二屆。