2008年12月30日星期二

椰香芋頭煮臘味


材料:
芋頭
臘腸
膶腸
蔥花


芡汁:
椰漿
粟粉


        臘腸、膶腸沖水洗淨,蒸熟後切片備用;芋頭批皮,用滾刀切件。燒熱油,放芋頭落鑊兜炒至微焦黃色。


        加入少少水,用最慢火將佢煮腍,到差唔多腍嘅時候就放埋臘腸、膶腸落去一齊煮,之後就加粟粉落椰漿度,攪拌成芡汁,倒落芋頭度煮番滾就 OK,最後灑上蔥花,掂哂!


        我今次煮呢個餸時一啲鹽都無落到,但都已經夠哂味,因為啲臘味帶有鹹味,所以如果好似我食得比較清淡的話,就唔駛額外再加鹽喇!另外,因為我無將啲芋頭預先炸過,所以煮起上嚟比較容易爛,下次試吓先炸後煮先!不過,我始終有炸嘢恐懼症,一來唔係咁好煎炸食物,二來炸完嘢之後,都唔知點處置啲於油好!


2008年12月29日星期一

吉之島特價日

        真係激鬼死人啊!!上兩個禮拜先至喺吉之島超市買完嘢,J 咭會員有九折優惠,但係我無 J 咭,所以要照原價買。點知佢呢個禮拜連續四日又再做特價,減價貨品仲照價再九折 o添,仲係人都有得折,唔駛一定要有 J 咭,@$&^@$^)@………


        我係一個典型嘅香港人,一於唔執輸,逛多轉睇有無啱先,呢啲就係我今日買嘢:



        朱古力同 Wasabi 係喺超市買嘅,朱古力 $12.5 兩件再 9 折,都幾抵喎,本來我想買埋金莎 o架,點知一件都無,俾人掃清哂;Wasabi 就 $9.9 9 折,同佢隻自家品牌 Top Value 一樣價錢,咁就梗係買 S&W 喇!另外仲買咗我嘅至愛蔥油餅做 lunch。隻碟同個小型焗盤喺 $10 店買,仲買咗盒白檀線香,用嚟裝香俾觀音菩薩用嘅,$9 / 300支都抵用呀,媽咪以前買落嘅檀香都要 $18盒,仲無咁多支 o添,可能個質素同香味好



        我其實最想就係買支碌麵棍,但係樂富間 $10 店無得賣,咁就無辦法啦!到真係要用時再睇吓撞唔撞啱特價日啦,都係差 $1


        今日都總算有少少得著,如果上次個兩盒味噌留番今日先買就仲抵!


焗豬排飯

        早排因為用繳費靈交張新帳單,所以收到張美心MX 免費焗豬排飯套餐 coupon 一張,前幾日卒之去咗美心MX 食喇。 



        睇個樣都唔差喎,仲好吸引 o添!就好似 Lily 咁講,美心個焗豬排飯啲茄汁最正、夠多,唔似 "大快樂" 果啲咁乾身。


 



        雖然唔係金玉其外,敗絮其中,但係啲豬排就真係有啲失望喇!剩係睇佢個款已經 feel 到好乾、好嚡,成舊豬排都 "白璽璽、乾爭爭" 咁,食落口就固然係意料之中啦,for me 最難頂嘅係佢夾住層肥膏,食落口啖啖油…………


        至於個汁,對於一般人嚟講應該係幾好食嘅,但我自己因為不嬲都食得比較淡,所以略嫌個汁過酸同過鹹,如果淡番少少就啱好喇!


2008年12月27日星期六

豆酥四季豆炒雪貝


材料:
四季豆
雪貝
薑茸


醃料:
素鮑汁
辣椒汁


調味料:

鮮醬油
豆酥醬



        呢包就係雪貝喇!


 



        包裝袋上面寫住最好用凍水浸 60 分鐘,食果陣時口感會更滑。


 


        講番個餸點煮先,雪貝預先用凍水浸 1 個鐘,之後盛起、瀝乾水,用醃料醃至少一個鐘四季豆撕去兩側嘅 "筋",然後洗淨、切段。燒熱油,爆香薑茸,將四季豆落鑊炒一炒,之後加入少少水,冚蓋煮至腍身後,加埋雪貝同調味料落鑊,炒多幾炒至雪貝熱透,再灑上麻油就可以上碟。


P.S.  雪貝係蒟蒻製品,所以唔駛刻意炒熟,炒番熱就得 o架喇。另外,蒟蒻製品最好預先用醃料醃過,因為單靠煮熱時落調味料係好難入味,食落口會 "淡茂茂",乜味都無,醃過之後就好食好多。


蝦子薑蔥撈麵


材料:
粗蛋麵


蝦子


調味料:


生抽
蠔油


芡汁:
粟粉


        蝦子先用白鑊炒香備用;薑同蔥洗淨、切絲;煲滾水,落麵餅煮熟,盛起、瀝乾水放碟上,用少少麻油撈一撈,除咗可以增加香味之外,仲可以令到啲麵唔會黏埋一舊,方便撈勻汁料。燒熱油,快手爆香薑蔥絲,盛起備用;跟住用番爆過薑蔥嘅油炒一炒蝦子,之後落調味料,煮滾後埋個薄芡,然後將蝦子蠔油汁淋喺麵上,再放薑蔥絲喺面,食時候將所有材料同麵一齊撈勻。


        呢個撈麵非常惹味 o架!


P.S.  上次睇完 「蘇Good」阿蘇教用叉將蔥絲整鬈,見幾得意,今晚就貪得意試吓,果然真係得 o架!


2008年12月26日星期五

自製黑芝麻醬


        唔好以為我求其影樽現成貨就當係自己整呀,我只不過係用個舊樽嚟裝住啲自家製成品咋!


材料:
黑芝麻
蜜糖
橄欖油


      


        做法都好簡單,就好似整芝麻糊咁,將啲黑芝麻炒香,之後打碎成芝麻粉,加入蜜糖同橄欖油拌勻就得 o架啦!



        不過唔知點解,每次整完之後隔咗一排,啲醬會自動結成顆粒,好難搽落啲麵包度,就算之前買嘅現成貨,用到後尾都有呢個情況出現,會唔會係唔夠油呢?但其實我都落咗唔少油喇!


2008年12月25日星期四

今日勁黑仔!

        有冇攪錯呀,個雪櫃早唔壞,遲唔壞,揀正兩日紅假先嚟壞,好彩老豆之前做嘢果陣有人俾咗個雪櫃佢,擺喺以前做嘢間 office 度,可以即刻叫車運返嚟頂住檔先,如果唔係都唔知點算,真係成個人企喺度!你知啦,冰箱嘢會解哂凍變壞 o架嘛!


        依家最快都要等到星期六啲人返番工先可以 call 到代理搵人上嚟換個 compresser,都唔知要整幾耐 o添呀!


2008年12月24日星期三

乾蔥頭栗子炆雞

        人哋聖誕節食火雞,我就平安夜食栗子炆雞,再加個西式雜菜湯,攪到好似好應節咁,但我唔係刻意 o架!係咁啱得咁 "喬" 啫,我係佛教徒,聖誕節對我嚟講根本毫無意義,無必要應節或慶祝,甚至 " 狂歡 "!!




材料:
急凍雞下脾
栗子
乾蔥頭


醃料:


生抽
老抽
雞粉
胡椒粉
紹酒
粟粉


調味料:



蠔油


        雞脾解凍後去皮、洗淨,用抹手紙索乾水份,然後斬件,落醃料醃好備用;乾蔥頭去衣備用;栗子去殼後,用烤爐焗數分鐘,之後 "浸" 衣就變得乾脆,好易脫落,不費吃灰之力就攪掂哂,睇吓呢幅相就知啦,粒粒都咁靚仔 o架!



        燒熱油鑊,先爆香乾蔥頭,再放入雞脾略煎至微黃色,之後就贊少少酒,再煎多陣。




        跟住就加埋啲栗子,加水及調味,兜兩兜,冚蓋用慢火炆至雞肉熟透及栗子腍身。到咁上吓你就會發現啲汁會變到好濃好 "杰",因為大部份嘅蔥頭都已經溶哂喺個汁度,喺呢個時候,最好就試一試味,因為由於啲汁煮到好濃縮,可能會變到好鹹,所以最好加番多少少糖,我覺得煮栗子菜式比較甜啲會好食啲。當煮到收汁後就可以上碟。


        雖然呢次喺我第一次煮呢個餸,但係我都覺得 OK 好味,唯獨是栗子唔夠腍,我諗下次要預早先炆定啲栗子至得!


聖誕禮物 — 蜂膠

        今日係平安夜,雖然我不嬲都唔慶祝聖誕節,但居然會收到聖誕禮物,不過係自己買送俾自己嘅。


        事緣晏晝教緊琴果陣,Winnie 打電話俾我,通知我我食開果隻牌子嘅蜂膠今日做特價,只賣 $89 一盒,平時平極都係 $199 買一送一,所以我教完琴之後就即刻去睇睇,如我所料,蝴蝶村商場間屈臣氏真係賣到一盒都無,於是就走去海趣坊間屈臣氏睇下啦,點知未賣哂,仲有好多盒 o添!所以我就買咗 3 盒,自己要兩盒,另外果盒就幫阿珊買嘅。



        原本係媽咪之前食開嘅,因為佢住醫院果陣,隔離床個太太教佢手術後就要食蜂皇漿同蜂膠,從而增強免疫力,媽咪後來都叫我食埋一份,因為我身子不嬲都唔係咁好,當係保健啦,估唔到一日一粒都有功效喎!因為近呢幾年我都無睇過醫生,即使係流感高峰期,身邊有好多 "病人" 接近我 ( 做我哋呢行其實都好高危,因為長期同學生坐得好 close,好易俾佢哋傳染到),我都無俾佢地惹到,吓,我估應該係因為食咗蜂膠啦。


        媽咪臨走前都交帶落,叫我要繼續日日 keep 住食蜂膠,自己好好打理身體,所以我都好聽佢話,朝朝起身都會 "啪" 番粒。我見 Winnie 都好容易病,所以咪叫佢試吓食,睇吓會唔會好啲,佢今年入冬後又好似真係少咗病喎!


2008年12月22日星期一

米味噌

        前兩日同 Lily 喺市廣場食完 lunch 之後,就去咗吉之島超市買嘢,其中一樣就係味噌。之前試過木魚味噌同赤味噌,今次就返璞歸真,試番隻最普通嘅白味噌,於是我就揀咗隻米味噌,因為見到貨架上有個牌仔簡介,話呢隻味係帶有甜味,所以就試吓喇。



        今日晏晝就幫佢 "剪彩",用嚟煮烏冬,試吓味道。同一般味噌一樣咁鹹,完全唔覺佢甜嘅,我仲要自己落糖調味,係咪超市寫錯簡介呀!


 


2008年12月21日星期日

白玉雜豆粥

        今日係冬至,我見媽咪以前都會煮碗湯丸上供,雖然我唔係好識啲儀規,但都會照做,所以今晚就特登預備咗呢個甜粥伴湯丸一齊食,唔駛次次都係薑汁糖水嘛!其實本身我係想整渣咋嘅,但係又怕 " 無米氣 " 唔襟飽,所以都係落半嘜米煲成粥啦,感覺上會飽肚啲。



        所謂白玉,其實係糖冬瓜。因為之前買嚟煲五花茶時用過後,一路都再未用過,於是今次我就靈機一觸,用嚟煲糖粥,代替咗片糖,反而變得清甜咗,唔似用片糖咁濃。


材料:
紅豆
綠豆
眉豆
三角豆
紅腰豆
麥米
珍珠米
糖冬瓜


        所有豆同麥米洗乾淨後,用清水浸過夜;珍珠米就喺煲前半個鐘洗淨浸水;糖冬瓜切粒備用。水煲滾後,先落珍珠米煲一陣,等到佢煲到有小小開花時就可以倒埋其他材料落去一齊煲,之後就等食囉!


        浸過夜嘅豆係腍好多,好食好多,而啲麥米就煙煙韌韌,好有 " 口感 " (弊,又講 "口感 " 呢兩個字 o添,實俾阿蘇鬧啦 ),甜度亦啱好,唔會太甜,又唔會過淡,恰到好處。


黑麥包

        嘩,好開心呀,又有 Pumpernickel 黑麥包食啦!等咗好耐啦!


        今次個黑麥包當然又係 Lily 買俾我食啦,不過今次係最大果隻 size,正如 Lily 話齋,果然係個包越大越好食,因為裡面嘅麵包會軟熟啲,無細 size 個隻咁硬,可能係因為熱力無咁易透入麵包深入位置,所以無焗得咁乾、咁硬。不過最攪笑嘅係 Lily 話其實大 size 嘅包都同細 size 一樣係圖形,但唔知點解,每次俾個店員切完拎番出嚟之後就變咗長形!


        次次 Lily 都唔收番我錢,攪到我都唔好意思,呢次呢個仲咁巨形,應該唔平啊!


2008年12月20日星期六

上海婆婆 @ 屯門市廣場

        今日同 Lily 上完堂之後,就同佢一齊出去市廣場間上海婆婆度食 lunch,當然唔少得我老豆個份啦!






        好鍾意佢哋掛喺牆上面果啲畫,啲BB好得意,個個都肥嘟嘟,好 cute 呀!


 



        呢碟就係 Lily 點嘅前菜小食 — 涼拌雞絲粉皮,本來個味都幾好,不過啲花生醬就好濃、好 "杰",攪到好膠口,唔夠清爽,連食慣濃味嘅老豆都話太過濃啦。


 



        呢個就係我必然之選 — 松子仁雞肉叉子燒餅喇。記得細個果陣,每次去到啲京滬菜食肆,如果有呢個燒餅的話,媽咪就一定會叫俾我同阿馳食 o架啦,因為可以自己放啲餡落個燒餅裡面,又好食、又得意、又好玩嗎,所以上次同 Winnie、Li Kien 嚟食果陣,我一見到就即刻話要,對佢有種情意結!就算媽咪依家唔喺我身邊,我都覺得佢每次都陪緊我一齊食 o架!


        講番個燒餅先,燒餅本身好酥鬆,而且送到埋嚟都仲係熱辣辣,加餸入去都唔會整腍個餅。我覺得都好抵食,因為每次我哋將餸放入去時都係裝到滿瀉咁滯,但係裝滿哂 4件燒餅後,依然剩番好多喺度,每次都係空口食埋佢,所以以 $2X ( 唔記得 exactly 幾錢 ) 嚟計,抵食過佢果啲 "好大隻碗 " 嘅湯麵啦!


 



        呢碟係泡椒黃鱔片,因為第一次同 Winnie 呢度食果陣,我個泡椒雞柳客飯,我覺得好正,於是今次就推介俾我老豆同 Lily試吓呢度嘅泡椒菜式。


        食之前我已經同佢哋講,啲泡椒就唔係好辣,只係好鹹、好酸,反而啲指天椒就好勁,叫佢哋自己小心啲,點知始終都係 "出事 ",Lily 食到面都紅哂,成面標哂汗,急忙搵茶 " 救火!" 於是我就叫佢快啲食番啲菜中和吓啦,佢話嚇到佢唔敢再掂呢碟餸。


 



        嚟 "救火" 嘅腿茸奶油津白出場啦!!啲菜夠腍,索啲汁後仍然好清淡,唔會太濃,又唔會太淡,恰到好處,所以佢哋都話夾埋果碟泡椒鱔片一齊食就好。


 




        差唔多食到尾聲,見碟泡椒仲有好多汁剩喺度,Lily 就話不如叫碗白飯撈埋啲汁,唔好咗佢,於是我就提議叫碗鹹肉菜飯,有特色嗎。個飯好香,又唔會太鹹、太油,幾好食啊。



 



        要 round up 呢餐,就梗係唔少得甜品啦!呢個高力香蕉豆沙亦係我嘅必食之選,因為呢樣嘢我係一定唔會整,只會出街食。點解?因為我好怕炸嘢囉,唔知點樣先可以做到外面色澤啱好,裡面又唔會未熟,而且炸完嘢後果鑊油都唔知點處置好,唔通倒咗佢咩!所以都係留番出街先食炸物吧。


        其實上次都有食到呢個高力豆沙,不過就麻麻哋,啲蛋白有啲油膩,好 " 漏 ",但係呢次就唔同,好食好多,一啲都唔覺油膩,蛋白柔軟富彈性,Lily 同老豆都贊不絕口呀!唯獨是 Lily 覺得應該用香蕉茸而唔應該整片香蕉放入佢,失色咗少少。


        Lily 雖然話咗今餐佢請,但係埋單時就差唔多 $300,我見咁重皮,於是就叫佢除番 3 份數啦,但係佢話無所謂啦,就當係佢請我哋食聖誕餐喎,好啦,咁多謝哂妳喇 Lily!


       


2008年12月17日星期三

節瓜清補涼湯


材料:
節瓜
豬腱
淮山
蓮子
茨實
玉竹
冬菇蒂
蜜棗


        節瓜刮皮後洗淨,原個放煲內,唔駛切開;豬腱洗淨,汆水後沖水,去除血水;淮山、蓮子、茨實、玉竹同蜜棗用熱水浸軟後洗淨備用;因為噚日煮冬菇,所以喺洗冬菇時特登剪菇蒂後,留番起佢今日煲湯用,啖湯就變得香好多。煲滾水後就將所有材料都放哂落煲度,猛火煲一陣間就放番入真空煲內,到夜晚飲之前就可以再煲多十零分鐘,之後加鹽調味就 OK 啦。


        嗯,今晚煲啖湯都幾清甜噃!


芝麻黑糖糕


        今日難得有空閒時間,朝早煲落湯後無乜嘢做,於是就蒸吓蛋糕啦,今次就蒸咗個芝麻黑糖糕,我係跟呢個食譜整 o架!


        當初喺圖畫館見到本書時,就俾佢個封面吸引到,所以就借咗返屋企 scan 起個食譜,到依家先至得閒整咋。


材料:
低筋麵粉
糯米粉
泡打粉
梳打粉
雞蛋
蜂蜜
橄欖油
芝麻


黑糖蜜:
黑糖
麥芽糖
蜂蜜


        先將所有黑糖蜜材料拌勻,然後煮滾,攤凍後備用;雞蛋拂打成蛋液,之後加入之前準備好嘅黑糖蜜同蜂蜜一齊攪勻,將所有粉類過篩兩次後,逐少加入蛋液裡並拌勻,當麵糊完全拌勻後,就攞小部份出嚟同橄欖油撈勻,再倒番入去啲麵糊度一齊拌勻,跟住就倒入蛋糕模度,喺面頭灑少少炒香芝麻,就可以拎去蒸啦!



        之前用疏乎厘杯蒸嘅就送俾媽咪,呢啲用撻紙蒸嘅就拎俾 Winnie 同佢媽咪食,因為我又要麻煩佢媽咪幫我整小小嘢,順便當係 Winnie 嘅 " 遲來的生日蛋糕 " 啦。


         




        呢個大嘅就自己食,可能係因為將最尾剩番嘅麵糊倒落去蒸,啲黑糖蜜沉低,所以顏色特別深,特別靚!但係整完出嚟個蛋糕味道比我想像中淡,唔係好甜,唔知係本身個食譜整出嚟都唔會太甜,定係我用嘅黑糖、蜂蜜同麥芽糖都唔夠甜呢?


        由於落咗糯米粉,所以個蛋糕特別軟糯,好軟滑,下次將糯米粉嘅份量增加,睇吓會唔會有啲煙韌感覺先。


P.S.  落咗梳打粉,真係有 " 浸 " 鹼水味,可能個食譜係想用佢嚟加深顏色。


 


多謝 Louisa!!

        好多謝 Louisa 佢送咗個電動打蛋器俾我,我今日整蛋糕果陣用佢嚟打蛋真係又快又慳力,比起用手打舒服好多! 遲啲整番個蛋糕送俾佢先。



2008年12月16日星期二

朱古力鬆餅 & 合桃提子鬆餅


        呢個係朱古力鬆餅。


 



        而呢個就係合桃提子鬆餅啦。


 


        噚日荃灣轉車去馬鞍山時,去咗綠楊新村間百佳超級廣場個 Baker Choice's counter 度買 Muffin。其實好多間百佳超級廣場都有得賣,但係就唔係間間個師傅都整得咁好食,同埋間間都係賣 $6 個,唯獨是呢間就賣 $13 / 3個,真係抵食夾大件,阿珊同 Winnie 食過都話好,Winnie 話食一個已經夠哂飽,再食唔落其他嘢啦,平均 $4.3 一個就食到飽,你話係咪好抵呢!


2008年12月14日星期日

麵豉梅子蒸排骨


        熱辣辣,啱蒸好嘅排骨好吸引,你睇吓,啲煙仲係嘭聲咁升上嚟 o架!


材料:
排骨
腩排


醃料:
生抽


粟粉


麵醬汁:
麵豉
酸梅
辣椒
紹酒
生抽


        排骨同腩排洗淨、瀝乾水,先落醃料 (粟粉、油除外) 撈勻,跟住就準備麵醬汁。用較剪將酸梅同辣椒剪碎、剪爛,之後加入其餘材料拌勻,就成為麵醬汁,加埋落排骨度一齊醃,撈勻後再加粟粉,最後落少少油就攪掂,用中火蒸至排骨熟透就 OK。


P.S.  我之所以買兩種排骨係因為我老豆比較鍾意食肥嘅肉,因為貪佢較腍、無咁韌,所以就加埋腩排落去一齊蒸。


2008年12月13日星期六

St. Dalfour 無糖果醬


        St. Dalfour 無糖果醬係幾好食,幾乎全部都係果肉,因為無額外加糖,所以唔會太甜。不過,有利就必有弊,因為佢果肉含量相當之高,唔係太有黏性,所以比較難搽落麵包或餅乾度。


        早前係百佳度見到呢隻果醬減價,不過就淨係得呢隻雜莓果醬有得減,唔緊要啦,反正我都未試過呢隻味道。之前曾經有段時間斷咗貨,未斷貨之前賣約 $21至 $22,有番貨之後就賣 $24至 $26,呢次減價就買 $18.9,仲平過斷貨之前,咁就梗會買嚟試吓啦,係咪!


2008年12月10日星期三

羅漢果南北杏煲金銀菜

        星期一先至食完金銀蛋鹹瘦肉粥,今晚又飲金銀菜湯,攪到我哋好似好有錢咁噃,成日用 "金" 同 " 銀 " 入饌,哈哈!


材料:
白菜
菜乾
紅蘿蔔
羅漢果
南北杏
蜜棗


        白菜、菜乾洗淨備用;紅蘿蔔刨皮,用滾刀切件;羅漢果洗淨後切開幾份;南北杏同蜜棗略沖水,備用。水滾後,將所有材料放落煲度,大滾後轉中慢火繼續煲,之後就無嘢做,等飲湯啦!記得飲之前落鹽調味。


        今日偷懶,唔想攪咁多嘢,所以無落到肉,但又怕唔夠甜,於是就加咗個羅漢果,老豆前幾晚 o訓咗落床之後猛咁咳,飲完呢個湯應該有啲幫助啩!我都幾鍾意羅漢果果種甘甜味,擺咗入真空煲裡面都仲聞到果種甜味,好香呀!


日本年輪蛋糕 & 日本豆漿


 



        呢兩樣嘢都係我學生 Louisa 請我食嘅,兩樣都係由日本空運到港 o架


        Louisa 份人好 nice,雖然我都係識咗佢無幾耐,同佢上堂都只係兩三個月,但係佢都對我好好,成日都請我食依樣食果樣,食朱古力 ( 仲唔係 cheap 嚟 o架,全部都係貴價朱古力 ),仲會特登 "漏夜" 整定沙律、蛋糕比我食 o添!上兩個星期仲預早送咗份聖誕禮物俾我,今次呢個年輪蛋糕就係佢喺網上訂果陣時,專登訂多一個送俾我,我話俾番錢佢又唔收,攪到我幾唔好意思呀!


        盒豆漿我就嫌佢淡過頭,有少少 "寡",甜番啲會好飲啲。至於個年輪蛋糕就啱掉番轉,我嫌佢甜過頭,不過都幾軟熟,Lily 食完就話好似我哋細個果陣時食過嘅雀目牌雪糕蛋糕果啲蛋糕咁嘅味喎!


Double Chocolate Pound Cake

        自從食量大大縮減之後,因為每次只能夠食少少,變得比以前容易肚餓,所以我依家會長期買定啲麵包、蛋糕、餅乾之類東西喺屋企,方便隨時醫肚。


        早前喺百佳見到隻蛋糕做特價,只需 $10 一盒,見個樣都唔差,於是就揀咗呢盒朱古力味:


        今日終於開嚟食啦!呢隻雙重朱古力蛋糕係杜拜嘅出品 ( 感覺上好似好 high class,係杜拜啲有錢佬專食咁款 ),打開個盒攞舊蛋糕出嚟時,覺得好重、好墜手,重過舊莎莉蛋糕,感覺就好似成舊都係實心朱古力咁。



        切開之後,睇到舊蛋糕好多 " 蜂巢窿 ",成舊印尼黃金糕咁,食到落口個質感都有少少似,比較硬淨,唔似一般雪藏蛋糕般都會有番少少蛋糕鬆軟感覺,再加上佢係用咗雙重朱古力去整,所以朱古味好濃,似食緊舊朱古力多過似食緊蛋糕!


        如果當自己係食緊舊蛋糕的話,我就覺得麻麻哋,因為太過實淨,唔似蛋糕,無咗蛋糕嘅鬆軟;但係如果唔當自己係食緊蛋糕,只係食緊一舊用朱古力做嘅甜品,咁我就覺得唔錯,因為啲朱古力味真係好香濃,又唔會太過甜,配埋杯紅茶就仲掂!


P.S.  最失敗就係唔似莎莉蛋糕咁有個錫紙兜裝往,每次食之前都要喺個膠袋度拎出嚟,食完又要放番入個膠袋度,好鬼麻煩。由於個膠袋嘅 size 係做到啱好,所以拎出嚟易,放番入去難,好易整到隻手同個膠袋係哂朱古力!