自從食量大大縮減之後，因為每次只能夠食少少，變得比以前容易肚餓，所以我依家會長期買定啲麵包、蛋糕、餅乾之類東西喺屋企，方便隨時醫肚。
早前喺百佳見到隻蛋糕做特價，只需 $10 一盒，見個樣都唔差，於是就揀咗呢盒朱古力味：
今日終於開嚟食啦！呢隻雙重朱古力蛋糕係杜拜嘅出品 ( 感覺上好似好 high class，係杜拜啲有錢佬專食咁款 )，打開個盒攞舊蛋糕出嚟時，覺得好重、好墜手，重過舊莎莉蛋糕，感覺就好似成舊都係實心朱古力咁。
切開之後，睇到舊蛋糕好多 " 蜂巢窿 "，成舊印尼黃金糕咁，食到落口個質感都有少少似，比較硬淨，唔似一般雪藏蛋糕般都會有番少少蛋糕鬆軟嘅感覺，再加上佢係用咗雙重朱古力去整，所以朱古味好濃，似食緊舊朱古力多過似食緊蛋糕！
如果當自己係食緊舊蛋糕的話，我就覺得麻麻哋，因為太過實淨，唔似蛋糕，無咗蛋糕嘅鬆軟；但係如果唔當自己係食緊蛋糕，只係食緊一舊用朱古力做嘅甜品，咁我就覺得唔錯，因為啲朱古力味真係好香濃，又唔會太過甜，配埋杯紅茶就仲掂！
P.S. 最失敗就係唔似莎莉蛋糕咁有個錫紙兜裝往，每次食之前都要喺個膠袋度拎出嚟，食完又要放番入個膠袋度，好鬼麻煩。由於個膠袋嘅 size 係做到啱啱好，所以拎出嚟易，放番入去難，好易整到隻手同個膠袋係哂朱古力！
沒有留言:
發佈留言