日式麻醬豆腐伴柚子沙律

        咪以為我咁凍天氣仲整冷盤，其實係差唔多成個月前整落 o架啦，不過因為之前部腦拎咗去整成個月，我無得寫 blog，所以依家先至 post 番出嚟，仲有好多等住我去 update 呀。我打中文又慢，點趕呀！！

材料：
盒裝豆腐
三色彩椒
泰國金柚
檸檬皮茸

調味料：
日本芝麻醬
蜜糖
檸檬汁
鹽

        簡簡單單嘅一個涼拌菜，做法都好簡單，味道亦唔錯，好清新。彩椒洗淨、切粒，然後拖一拖水 ( 唔好太耐，其實我只係唔想咁爽口，太腍會唔好食，所以如果鍾意食爽口嘅就唔駛拖水啦 )，盛起，瀝乾水備用；金柚起肉、撕碎，然後用蜜糖、檸檬汁同檸檬皮茸醃一陣間，呢招係跟 Jamie Oliver 學嘅，有次佢整沙律菜之前都係咁樣預先醃一醃。跟住就可以加埋啲彩椒，再加少少鹽調味，就完成咗柚子沙律。至於豆腐，肥媽就喺「肥媽私房菜」節目度教過，豆腐喺盒度倒咗出嚟之後，就用抹手紙包住，然後放啲重嘅物件喺上面，將啲水份壓咗出嚟，咁就唔會 " 猛標水 "，試過又真係幾得噃。之後就切片，上碟後就倒啲麻醬落去，擺少少檸檬皮茸喺上面做裝飾，再放埋啲柚子沙律係兩邊，就可以上菜啦！係咪色彩好靚呢？仲好似好 pro 咁 o添。

        我都係純粹諗吓、試吓，今次當係做實驗，睇吓咁整 O 唔 OK，估唔到兩樣嘢嘅味道都幾夾。