$5 盒士多啤梨

        喺裕記度無紅蘿蔔賣，求其買包薑就走，去到收銀處準備排隊俾錢時，見到有士多啤梨，賣 $5 盒咋，咁平，實唔慌好食啦！不過真係好耐好耐無食過啦，見個樣都幾好，粒粒都紅卜卜，顏色好靚、好吸引，買盒試吓啦，反正咁平，話唔定有驚喜呢！

        基本上，呢盒士多啤梨係買嚟 "玩" 多過要嚟食，因為始終對佢無期望，所以就好攪嘢咁幫佢影咗輯寫真，即使無味覺享受，都滿足吓視覺享受嘛。

        果然無驚喜，仲係酸嘅 o添，食落口個感覺十足十食緊酸布冧咁，無論味道同肉質都好似。依家啲士多啤梨都唔好食，好難食到粒甜嘅。喺我印象中，對上一次食士多啤梨應該係我讀小學果陣，表姐 Flora 同佢個妹 Lily，帶埋我同阿馳一齊出街玩，佢喺超市度買咗盒士多啤梨俾我哋食，果陣嘅士多啤梨已經唔好食，得個酸字，自此以後，我就再無意欲去食佢啦。最近一次聽到有人對士多啤梨贊不絕口，係 Winnie 去完韓國返嚟，佢話果度啲士多啤梨又甜又大好好食 ( 佢俾過啲相我睇，真係好大粒，有啲仲成隻手掌咁大 o架 )，仲係自己親手摘嘅 o添！難怪佢媽咪返到嚟香港都仲好懷念果度嘅士多啤梨啦！