碧綠滑蛋豆腐

        今日晚煮咗兩個餸，一個係香草芥末籽烤三文魚扒 ，另一個就係呢碟碧綠滑蛋豆腐：

材料：
豆腐
真姬菇
西蘭花
雞蛋
薑茸
紹酒

芡汁：
蠔油
粟粉
水
鹽
糖

        豆腐用水略沖洗，原件放喺碟等佢慢慢出噉啲水，煮果陣就唔駛驚佢不停標水；真姬菇洗淨備用；西蘭花用洗米水浸洗乾淨 ( 媽咪教落用洗米水浸洗西蘭花可以洗咗表面果層 "白濛濛 " 嘅物質 )，將莖切粒、花切件，之後用鹽水汆一汆水，可以預先煮腍少少，到回鑊炒果陣時就唔駛炒咁耐，同埋保持翠綠；跟住用番同一煲水將真姬菇汆水，等佢裡面啲多餘水份走噉啲出嚟，你會明顯見到即刻縮咗水 ( 原來呢隻菇好香 o架，汆水後煲水有好香嘅菇味 )；雞蛋拂打成蛋液備用。

        燒熱油鑊，先將西蘭花回鑊炒一炒，盛起後圍住碟邊放好；之後爆香薑茸，放真姬菇同西蘭花莖粒落鑊炒，贊少少酒後，放埋豆腐一齊煮，冚鑊蓋煮約 1 分鐘，之後加入芡汁，最後將啲蛋液慢慢倒落豆腐度，輕輕兜勻至蛋熟就可以上碟 ( 太大力會將啲豆腐整到好爛 )。

        今次我覺得都幾滿意，因為食完之後碟底都無剩低好多水份，證明啲菇係要預先汆水，咁就唔會煮好之後仲不停咁出水。