今日難得有空閒時間，朝早煲落湯後無乜嘢做，於是就蒸吓蛋糕啦，今次就蒸咗個芝麻黑糖糕，我係跟呢個食譜整 o架！
當初喺圖畫館見到本書時，就俾佢個封面吸引到，所以就借咗返屋企 scan 起個食譜，到依家先至得閒整咋。
材料：
低筋麵粉
糯米粉
泡打粉
梳打粉
雞蛋
蜂蜜
橄欖油
芝麻
黑糖蜜：
黑糖
麥芽糖
蜂蜜
水
先將所有黑糖蜜材料拌勻，然後煮滾，攤凍後備用；雞蛋拂打成蛋液，之後加入之前準備好嘅黑糖蜜同蜂蜜一齊攪勻，將所有粉類過篩兩次後，逐少加入蛋液裡並拌勻，當麵糊完全拌勻後，就攞小部份出嚟同橄欖油撈勻，再倒番入去啲麵糊度一齊拌勻，跟住就倒入蛋糕模度，喺面頭灑少少炒香芝麻，就可以拎去蒸啦！
之前用疏乎厘杯蒸嘅就送俾媽咪，呢啲用撻紙蒸嘅就拎俾 Winnie 同佢媽咪食，因為我又要麻煩佢媽咪幫我整小小嘢，順便當係 Winnie 嘅 " 遲來的生日蛋糕 " 啦。
呢個大嘅就自己食，可能係因為將最尾剩番嘅麵糊倒落去蒸，啲黑糖蜜沉低，所以顏色特別深，特別靚！但係整完出嚟個蛋糕味道比我想像中淡，唔係好甜，唔知係本身個食譜整出嚟都唔會太甜，定係我用嘅黑糖、蜂蜜同麥芽糖都唔夠甜呢？
由於落咗糯米粉，所以個蛋糕特別軟糯，好軟滑，下次將糯米粉嘅份量增加，睇吓會唔會有啲煙韌感覺先。
P.S. 落咗梳打粉，真係有 " 浸 " 鹼水味，可能個食譜係想用佢嚟加深顏色。
我前上個星期響花園街圖書館借左呢本書，都想試下呢個黑糖糕，但我見到400克麵粉 + 100克糯米粉要用200克油，我做一半份量都好多油呀，黑糖蜜又多，肥死囉! 呢個食譜你有冇再試整? 因為我呢個大鄉里，好似印象中未食過黑糖糕，本書幅相切到正正方方，賣相好靚，想試下。但屋企冇黑糖，只有三溫糖
回覆刪除[版主回覆05/29/2009 16:15:00] 印象中我記得應該無跟足佢落咁多油 o架，不過之後無再試過，因為好多功夫，又要整黑糖蜜！ 其實咩叫做三溫糖？同黃糖有無分別？因為當時我未搵到有黑糖買，所以只係用 brown sugar 整，都 OK o架。不過最近俾我 喺銅鑼灣間「價真棧」度 搵到有 "平" 韓國黑糖賣，1kg都係賣$12咋，妳試 吓去洗衣街間 「價真棧」睇 吓有無得賣？真係好深啡色 o架，之前 喺荃灣一間專賣韓國 嘢 嘅 counter度買，要 $20 / 1kg 呀！
我剛剛整了黑糖糕，我用左妃娟一半份量 ，
回覆刪除http://blog.xuite.net/jane7443/bake/16728714
原來得好細份量咋，同埋我用果隻太古黑糖粉，整出來好淺色，好以馬拉糕咁呀，我用大火蒸佢，仲爆哂口(冇睇清楚，大火會爆口，要用中火)，我唸要轉用其他黑糖，我見佢個blog 係用一舊舊既黑糖塊。我諗要去價真棧買包下次整。
如果用三溫糖仲淺色呀! 其實三溫糖我都唔覺同其他咖啡糖有咩唔同味。只係我响一本書(作者關琬潼)中，有一個伯爵紅茶蛋糕(我好鐘意伯爵紅茶陣味)要用到三溫糖(忠於原著)先買咋。
啱啱蒸完切左一舊，味道都ok 又唔甜，但又唔覺好煙un 喎，我老公話唔鐘意，冇驚喜(鬼咩，啱啱放低飯碗，仲食左咁多舊榴槤，飽到死，食咩都唔好味啦)
我係用佢個加梳打粉果個分量，我下次會試佢落酵母發酵果個食譜，因為見d 網友話好食，
妃娟d 食譜 其中超熟吐司，醇奶土司，北海道牛奶土司都好正，我上星期整完2 條醇奶土司，第二日帶番長洲，我個奄尖同咀刁既亞媽都話好食。你都試下呀
[版主回覆07/06/2009 01:02:00] 係啦，去價真棧買包黑糖試 吓好過啦！又平又靚。 咁妳下次就唔好食飽飯先叫妳老公試食啦！ 用酵母？咁會唔會似麵包 o架？
佢落依士整，我諗會可能似白糖糕咁喎! 下次整過話你知。
回覆刪除[版主回覆07/08/2009 14:44:00] 好呀！妳話我知啦！ 不過小心發酵過度會變酸呀。