2009年10月29日星期四

恍然大悟!

        最近真係好多無聊人喺度留言,初時仲以為佢哋真係好好人,經常留啲讚美或鼓勵嘅字句,但後來發現,原來佢哋係無論喺邊個果 blog 度都係留底一模一樣嘅字句,而且佢哋全部都有個共通點,就係無相片,開咗個 account 又一篇 blog 都唔會寫,真係唔知佢哋想點,用意何在!


        直到今日晏晝睇完幸福蠍個 blog,先至恍然大悟,你哋都去幸福蠍個 blog 度睇吓佢寫果篇「無聊留言就會明 o架喇!



P.S.  其實我都試過跟幸福蠍講果個方法去檢視呢啲無聊留言,但始終都唔識點睇,咁其實佢哋咁做有乜好處呢!真係唔通食飽飯等屎痾!


2009年10月28日星期三

子蘿青椒炒素雞

        呢碟餸原本係初一齋期果日整嘅,不過一直都無時間 post 出嚟,所以等到今日先 post 囉!( 嚟緊禮拜日係十五,又一次煮齋 o添喇!)



材料:
素雞
子薑
罐頭菠蘿
青椒 ( 燈籠椒 )


調味料:


子薑醋
鮮醬油


芡汁料:
菠蘿糖水
粟粉


- 素雞略沖水,瀝乾水份後切件。


- 青椒洗乾淨後切件;子薑、菠蘿切粒備用。


- 燒熱油,將素雞件放入鑊內,煎到兩面微微金黃色,盛起。


- 爆炒青椒,加少少水後冚鑊蓋,煮到輕輕軟身。


- 之後加埋菠蘿同子薑一齊炒,素雞回鑊,加入調味料兜勻。


- 用菠蘿糖水埋一個薄芡,兜勻就可以上碟。



        酸酸甜甜,好食又易整,所以食齋或素都唔一定係 "寡",睇你識唔識得運用食材同醬汁啫!


2009年10月25日星期日

香茅豬排配甜酸辣醬汁

        唔知點解,我老豆個 friend 個農場好似乜都有咁嘅,連香茅都有種!都唔知係咪其實係叮噹個百寶袋嚟 o架,乜都有


        當我老豆問我要唔要香茅時,我第一個反應就係整香茅豬扒,或者香茅青檸凍,咁根據我學生嘅形容,我食嘢咁 "滋補",就當然梗係揀咗整豬扒啦!



材料:
急凍脢頭豬排


醃料:
香茅
乾蔥頭
蒜頭
魚露


老抽
玫瑰露
青檸汁


醬汁料:
醃料汁
泰式雞醬




啲就係我老豆拎返嘅新鮮香茅喇。


 


- 豬排解凍,洗淨後瀝乾水,用刀背將兩面拍鬆。


- 香茅洗乾淨;乾蔥頭同蒜頭去衣,之後將 3 樣材料一齊切碎。


- 豬排用醃料醃兩個鐘。


- 燒熱油,將豬排兩面煎至金黃色,盛起。


- 跟住將剩低醃料汁加水、糖同泰式辣醬,煮到濃稠,然後淋上豬排上,食得!



Notes
- 選用脢頭豬排嚟整,肉質會比較腍。


- 香茅切碎前記得先用刀背拍幾吓,香味先會易啲出。


- 醃豬排時唔駛落太多鹽,因為魚露都已經有鹹味。


- 煎豬排時記得先用大火,鎖住肉汁,之後先轉中火繼續煎熟。


2009年10月23日星期五

點解我咁唔小心㗎!

        唉,點解我咁唔小心㗎,啱啱先打爛咗個玻璃盅個蓋!!

        打爛嘢對我嚟講其實係見怪不怪,不過,今次我個心好內疚,好唔舒服,因為媽咪話過俾我聽,個玻璃盅係我出世無幾耐賣嘅,佢話為咗我,專登 "懶骨子" 咁買個玻璃盅嚟裝幾片火腿㗎!咁即係話我有幾大,個玻璃盅就咁大!
 
        用咗三十幾年都仲好新淨,keep 得好好哋,點知依家俾我打爛咗個蓋,真係好唔開心,就算咁好彩俾我配番個蓋,都已經再唔係原本個 set 喇,已經失去咗果份情意!媽咪所留低嘅嘢,少一件就少一件㗎喇,無法補救,我可以點!!

        我真係好失敗,明知故犯,完全唔可以原諒!!!!!

2009年10月22日星期四

椰汁班蘭糕 (家中完成版)

        上次煤氣烹飪中心度跟 Rachel 學整印尼食品,除咗堂上實習做印尼沙爹雞印尼糯米雞之外,仲有由 Rachel 堂上示範嘅經典印尼甜品椰汁班蘭糕。


       預咗整完個班蘭雪芳蛋糕之後會有班蘭葉剩,所以一早已經 plan 定今日要學整埋呢個椰汁班蘭糕。



        其實整就一啲都唔難,不過就要好有耐性,逐層逐層慢慢蒸熟,淨係蒸都差唔多用咗成粒鐘咁滯,可能係我自己手腳慢啦!連埋之前預備功夫同之後清洗工作,足足企咗成 3 粒鐘呀!如果我好似 Louisa 咁有 Jovi 幫手就好好多喇!




因為啲椰漿係 Winnie 佢幫我買過嚟,但佢又唔收番錢,所以
番起半嚿留番俾佢都好應該,等佢媽咪又可以試吓哩!


 



唔知點解,居然會有料剩!所以就將剩低果少少粉漿整成呢個
小型椰汁糕送俾媽咪!


2009年10月21日星期三

菠蘿吞拿魚薯蓉沙律 Pineapple & Tuna Mashed Potato Salad

        根據上次同 Winnie 一齊整玻璃曲奇嘅經驗,我知道星期一果日整蛋糕一定又係 "摸吓摸" 就攪到好夜,為咗唔想好似上次咁攪到成 10:30 pm 至食晚飯,所以今次我就醒啦,Winnie 未嚟到之前,整好定個薯蓉沙律做 dinner,加埋可以即食唔駛煮嘅麵包,咁就可以快快手手開飯啦,仲乾手淨腳唔駛煮 o添! 



材料:
薯仔
礦泉水吞拿魚
罐頭粟米
罐頭菠蘿


調味料:
千島醬





- 薯仔刨皮後,切粗片,隔水蒸熟。



- 之後壓成薯蓉。


- 菠蘿瀝乾糖水,切粒備用。


- 吞拿魚同粟米盡量瀝乾水份。



- 將所有材料拌勻後,加入調味料再拌勻即成。



        係咪好簡單呢!眨眼就整好 lu!



        除薯蓉,我仲搭 Winnie 幫我去 A1 Bakery 買個合桃提子裸麥包,點知佢又唔收錢,變咗又係佢請我同我老豆食!呢個包真係好好食,百吃不厭,難怪係 blog 友阿 Keith 嘅至愛。意大利什菜湯當然唔係自己煮啦,無咁好心機同精神喇,只係罐頭湯啫!不過我自己再自行調味,加入黑椒碎、迷迭香同肉桂粉。 


 



我另外Panash 咗個脆薯法包俾我老豆試吓,我覺得佢
Panash 咁多 products 之中最好食、最吸引我。


 



咗薯蓉,係咪其餘全部都係現成呢!所以果日可以準時 8:30pm
開飯囉,哈哈!


班蘭雪芳蛋糕伴脆焦糖 Pandan Chiffon with Crunchy Caramel

        今日同大家分享番前日同 Winnie 一齊整班蘭雪芳蛋糕。
      
       其實今次整班蘭雪芳蛋糕,主要係因為整完之後 Winnie 想拎返去俾佢媽咪食,皆因佢媽咪對之前食過嘅班蘭月餅念念不忘,再加上佢上次Louisa 屋企試食過都好鍾意,所以就決定試自己整。



2009年10月20日星期二

荷蘭鬱金香

        噚日 Winnie 嚟我屋企整蛋糕同叉燒,每次佢過嚟都有好多禮收 o架,今次有月餅、計時器、Winnie 媽咪包嘅水餃啦、椰漿同麵包,好多好多呀,不過最開心就係收花囉!當然,佢梗係唔會送花俾我啦,係送俾我媽咪嘅。佢真係好有心 o架,無論係嚟我屋企,亦或係去探我媽咪,佢都一定會帶啲好靚嘅鮮花送俾媽咪。


        今次仲好重手 o添呀,星期日陪洛洛上完兒童音樂班,幫完學生去試場試完琴之後,就忽忽趕出去旺角花墟,專登買咗呢扎由荷蘭入口嘅鬱金香。





佢揀呢隻橙色好靚,加上鮮黃色綑邊,每朵花都好立體,好鮮豔奪目。


        Winnie 好有心思,我曾經講過我記得媽咪好似話鍾意鬱金香,佢就專登買嚟送俾佢,而佢又估我會鍾意橙色,所以佢就喺咁多款之中揀咗呢扎喇。佢仲話俾我聽,佢搵勻哂全個屯門,打電話問過好多間花店都無鬱金香賣,於是就專程出花墟買,真係為咗扎花專程出去 o架,因為陪學生試完琴之後出旺角時都已經好晏喇,跟住又要趕返屋企食飯,所以佢出到旺角都無時間慢慢行街,買完扎花就即刻走喇!真係攪到我都有啲唔係幾好意思,要佢咁頻撲!



        因為晏晝整蛋糕時,我搬咗張餐枱過去客廳果邊,方便光猛啲影相,之後我又懶搬番過去飯廳度,所以就索性喺客廳食晚飯,因此噚晚係呢兩年幾第一次有同媽咪同枱食飯 feel,我想留住呢一刻嘅感覺,所以就即刻拎部相機,影低 Winnie 呢扎鬱金香,作為見証我同媽咪可以再次同枱食飯嘅時光!


        Winnie,喺呢度我要再次代媽咪向妳講聲多謝,我好肯定,妳係第一個送啲咁貴嘅花俾佢人,妳係第一個送鬱金香俾佢嘅人,妳係第一個送啲佢鍾意嘅花俾佢人!!如果佢真係仲喺度的話,親手接過妳送俾佢呢扎鬱金香,肯定開心到死,唔好話佢,噚日我一見妳入門口時拎住呢扎咁靚嘅花,我即時都好感動,因為我知道妳真係好有我媽咪心,比親戚還要好!


        好喇,唔再寫啦,又試自己攪喊自己喇!


2009年10月18日星期日

杏仁乾果燕麥方塊 Almond & Dried Fruit Oat Flapjacks Square

        今次呢篇 blog 其實應該係post 出嘅,點知 Yahoo! Blog 又唔知發咩神經,完全 upload 唔到相,試咗好耐都唔得,卒之都係要放棄,留番今晚先再 post 過,真係激死人呀! 唔通真係要好似其他 blogger 咁搵定個新地盤,仲要做定 backup?真係煩死人喇!

        上次整完呢個黑豆燕麥方塊之後,食過番尋味,連我老豆都話好食,仲話要拎啲帶去農場俾朋友食 o添,於是我就叫佢將剩低果全部拎走,咁所以我就無得食喇,唯有日自己再整多次。不過今次就用過其他材料配搭,用較多乾果,少啲豆渣,







材料:
牛油                     70 克
砂糖                     30 克
麥芽糖                 1 湯匙

燕麥片                 180 克
黑豆渣                  30 克
杏仁條                  20 克
杏桃乾                  20 克
紅莓乾                  20 克
提子乾                  20 克
糖漬橙                  20 克
冧酒                      適量

- 先將方形慕斯圈用牛油紙包好,然後喺圈內搽油。

- 燕麥片同杏仁條放入焗爐內,用180 °C 烘焗 8 分鐘。

- 將所有乾果剪碎,然後用冧酒浸泡。

- 將牛油、糖同麥芽糖放入煲內用慢火煮溶,熄火後待暖。

- 加入燕麥片及豆渣拌勻後,再加埋杏仁條同乾果一齊攪勻。

- 將混合物倒入模內,然後用匙羹壓實壓平。

- 放入已預熱 180 °C 嘅焗爐內,焗 25 - 30 分鐘至顏色變得金黃。

- 出爐 10 分鐘,小心將模脫去。

- 攤凍之後切成方塊享用。
 
以上材料份量可做一盤 6 吋 X 6 吋嘅燕麥方塊。

 

 哋係咪覺得今次焗得靚好多呢?勁金黃色,好吸引呀!


 

2009年10月15日星期四

試做焦糖脆脆

        今晚煮飯之前,趁有少少時間,就預習一次點整焦糖脆脆。



其實我都唔係好知點先為之成功,不過果樣睇落都 OK o架!食落
口都好鬆脆,唔係 "死死實",仲無 「美心」果隻咁大陣 "燒衣" 味
o添!


 



呢張相係啱整好果陣時,倒落張防黏焗爐紙上面攤凍時影嘅。



        好,下次再整時先 post 番個 recipe 俾大家啦!


日式吉士蒸蛋糕 Custard Steamed Cake in Japanese Style

        用「千呼萬喚始出來」嚟形容呢個蒸蛋糕真係非常貼切,點解?因為個 recipe 真係搵咗好耐先搵得到

        記得之前 blog 友霞女傾開,發覺大家原來都好想將蒸蛋糕整到好似出面街賣果啲咁鬆軟,咁有彈性,但大家都研究咗好耐都唔知點樣整,佢仲專登走去買支乳化劑返屋企試整 o添,當然,都係唔得啦!

        一直以來我都無放棄過去搵食譜,點知早幾個禮拜終於俾我搵到 blog 友傻軒媽媽呢個日式蒸蛋糕嘅食譜,見佢喺個 blog 度話都幾似「山崎」個蒸蛋糕,我一睇到呢句就即刻 "叮" 一聲,雙眼發哂光咁,心諗,唔通呢個 recipe 就係「眾裡尋它」果個!!?? 

        今日有時間就即刻試吓整,睇吓係唔係我想要果隻先!




2009年10月14日星期三

芥茉雞肉碎蛋三文治

        一向都好少整三文治食,因為嫌麻煩,反正現成都已經有個包喺度,無謂攪咁多嘢喇,整得嚟都已經食完囉!不過,突然間好想試整一種雞肉沙律,用嚟做三文治餡,咁所以就破吓例咁整色整水喇!今次整三文治唔係用一般方包,而係用咗意大利拖鞋包。



 


材料:
意大利拖鞋包 ( Ciabatta )
西生菜
雞柳
雞蛋


醃料:

黑椒碎
乾羅勒 ( Basil )


醬汁料:
芥茉籽
芥茉醬
蛋黃醬 ( Mayonnaise )


- 西生菜洗淨、瀝乾水。

- 雞柳洗淨後用醃料醃 30分鐘,之後隔水蒸熟,然後撕碎備用。


- 雞蛋放滾水內烚熟,剝殼後將蛋切碎。




- 將碎蛋同雞肉用醬汁料拌勻。


 



- 麵包上下切開兩份,先放上生菜,將餡料放上菜面,然後再放多層生菜,最後放
  上麵包就攪掂。


 




        麵包好鬆軟,生菜爽脆清甜,餡料充滿芥茉味道並帶有少少酸,好味呀,再加杯咖啡,就係我噚日一份健康午餐喇!


2009年10月13日星期二

金針雲耳冬菇蒸雞

        呢個餸係噚晚整嘅,應該噚晚已經要 post 嚟,點知寫完篇黑豆燕麥方塊之後超眼,簡直眼瞓到一條魚都釣唔到呀! 見已經差唔多點半鐘喇,都係去瞓覺喇,留番今朝先再寫。所以自從要打理埋頭家之後,真係好唔夠時間用,一日起碼有番 30 個鐘就差唔多!

        好耐都無食過蒸雞喇,心血來潮又想食喎,咁咪整囉!用金針、雲耳同冬菇蒸雞係好家常嘅菜式,以前媽咪間唔中就會整 o架喇!記得媽咪之前同我講個,如果要買雞就去「惠康」度買啦,可能因為乾淨衛生啩!所以噚日我就走咗上去「惠康」度買。見到個 counter 有啲包好嚟賣嘅雞,有隻賣 $18,另一隻就賣 $25,兩種都係半隻份量,都唔知有咩分別,於是問個阿姐,原來一隻係急凍、一隻係冰鮮!其實相差唔多,應該係買冰鮮嘅,不過,一來見過「唐順興」果啲冰鮮雞成隻都只係廿零蚊,二來又想試吓急凍雞係咪真係咁唔掂,所以最後就揀$18 急凍果隻返屋企做試驗,睇吓係咪真係咁差先!臨走前仲叫個阿姐幫我斬件,因為驚返到屋企唔識用把剪骨較剪去剪開佢,老豆又唔喺度,去咗農場到時就麻煩喇,唔通原隻雞擺喺配料上面蒸咩!


       


材料:

冬菇
金針
雲耳
紅棗

醃料:
蠔油

薑絲
紹酒


- 雞洗乾淨後瀝乾水份。


- 參考「浸發冬菇方法」處理冬菇,之後切片。


- 雲耳剪去底部木頭部份;金針如有硬蒂,同樣剪去,之後將兩樣材料洗乾淨,放
   入加有少少白醋嘅滾水內汆水,盛起後過冷河,瀝乾水,備用。


- 紅棗用熱水浸軟,洗淨後切開去核,再切粗絲備用。


- 將雞件同冬菇用醃料先醃半個鐘,之後將金針同雲耳鋪喺碟上,將醃好嘅雞件同
  冬菇放上面,最後灑上紅棗絲,就可以拎去蒸,大約蒸 8 - 10 分鐘就得喇。



        實驗結果證明,急凍雞真係唔可以要嚟蒸,因為完全無乜味,好彩我都醒目,醃果陣已經用蠔油,所以急凍雞最好都係要嚟煮,仲要有較濃味醬汁呀!


        下次蒸雞都係要買冰鮮雞,不過之前要問定我老豆點用果把骨剪!


浸發冬菇方法

        有陣時,如果啲冬菇係比較厚身的話,真係隨時要浸足成日先可以完全浸軟。如果記得的話,就可以之前一晚浸定,到第二朝就可以用;但係如果前一晚唔記得浸過夜,第二日又趕住要用,咁點算?最簡單方法咪唔好食佢,改用其食材囉,呵呵!

        媽咪之前就教過我,如果想啲冬菇快啲浸軟,係有辦法嘅,不過就千祈唔好諗住用熱水浸會快啲喎!不但只未必可以快啲浸軟,而且仲會攪到啲冬菇變韌!要加快浸軟冬菇,秘訣就係喺碗凍水度加少少糖,攪勻之後就可以要嚟浸冬菇啦!

        我試過呢個方法好多次,真係得喎,比唔落糖真係會快啲浸軟。所以好多謝媽咪教咗我呢個秘訣,行少冤枉路!

黑豆燕麥方塊 Black Bean & Oat Flapjacks Square

        原本今日諗住晏晝整 muffin 嘅,點知有突發事情,攪到我無咗好多時間,所以就將原本聽朝早整嘢搬嚟今日整囉!究竟係整啲乜?咪就係呢個黑豆燕麥方塊囉!

        呢個小食我好鍾意 o架!平時買嚟食就買得多,但自己整都係第一次。不過原來好易整 o架咋!簡單到連小朋友都識得整,所以如果父母想同子女揀啲食譜一齊整嘢食,不妨考慮吓整呢個小食啦!真係一個好好嘅親子活動呀!

 

2009年10月11日星期日

南瓜意大利燴飯 Risotto alla Zucca

        前幾日整完白酒忌廉汁煮蜆,剩好多蜆肉汁,因為非常鮮甜,所以我留起咗佢嚟煮餸,因為都差唔多有成個飯碗滿咁多汁,好耐,究竟有咩食材係無乜味道兼勁吸水份呢?哈,卒之俾我諗到,就係煮 risotto 喇!

        原本諗住用磨菇煮嘅,點知噚日買餸果陣唔記得買埋,本來都無所謂,但係無理由淨係 "飯煮飯" 咁寡 o架,於是切南瓜準備整咖喱南瓜肉醬時,順便切啲細細粒size,放埋落去一齊煮囉!


2009年10月10日星期六

咖喱南瓜肉醬

        本來噚日買定哂嘢準備今晚整肉碎蒸南瓜,但係突然間又好想食日式咖喱喎,因為好耐無整喇,所以就臨時變陣,用番免治豬肉同南瓜,加啲粟米粒同咖喱磚,咁就變成依家嘅咖喱南瓜肉醬喇!


今日試吓學抆 cream 呀!

        星期六都居然咁得閒,阿珊話好攰唔嚟上堂;Lily 就要考試,仲由朝考到晚,勁慘!所以都唔嚟喇。咁,今日就剩係朝早教一個學生咋!


       咁得閒,有咩好做呢?反正之前又買咗個蛋糕轉盤,咁就試吓學抆 cream 啦!



 



要抆 cream,咁就梗係先要整咗個海綿蛋糕先啦!因為主角唔係
個蛋糕,而係cream,所以只係做個 mini
size,一隻蛋加 20 克粉咋!


 



先將個蛋糕上下切開兩份。


 



喺下面果塊蛋糕上面先塗上一層忌廉,然後上面鋪上切粒桃駁李。


 



之後再喺桃駁李粒上面再塗多層忌廉。


 



將另一半蛋糕放上去。


 



再將成個蛋糕抆上忌廉。原來都唔易 o架!抆咗好耐都係咁樣衰,
不過都已經比想像中抆得平滑 o架喇!


 




好在之前切定啲桃駁李片,所以一 call 即到,幫手遮醜,嘻嘻!


 




整好哂之後就梗係切嚟食啦!


 


        不過疑問就嚟喇,究竟點先可以將個蛋糕由個轉盤度搬去另一隻碟度呢?好易整到cream o架噃!咗好耐都唔知答案,最後就Louisa 買俾我果塊墊底鋁板 "涉" 落蛋糕底度嚟搬起去咋!有冇經驗 blog 友可以話俾我知呢?


        試過呢次抆 cream,就知道點解出邊賣嘅蛋糕多數都會擠花喇,因為原來要抆到cream 平滑係唔易 o架!要整到好似「美心」個天使蛋糕同魔鬼蛋糕咁靚、咁平滑,都幾考功夫 o架!所以擠花上去就完全解決哂呢個問題,乜醜都遮住哂,仲遮到 "陷 一陷" o添!