芝麻黑豆漿

        今朝落街買餸時，天氣變得清涼好多，秋意漸濃。一年四季中，我就最鍾意秋天，因為唔會太熱、又唔會太凍；唔會太乾、又唔會太濕，個人會好舒服。

        不過今年唔知點解天氣咁快變得好乾，我啲手指依家已經乾到爆哂喇！ 天氣變得清涼乾燥，最好就係整番啲甜甜哋嘅熱飲嚟潤一潤先！今日反正整咗黑芝麻粉，咁整芝麻黑豆漿就最好不過喇！

材料：
黑豆              160克

黑芝麻粉       60克

糖                  40克

水                  1000毫升

今次整豆漿所用嘅豆、水同糖嘅份量比例，係參考咗 Rachel 嘅食譜。

- 黑豆洗淨後用水浸過夜，到第二日用之前再清洗多次直至水清澈。

 

- 將黑豆瀝乾水份後，放入攪拌機內，加入黑芝麻粉同水，攪打成豆漿。

 

- 將豆漿隔渣，倒入鍋內，以中慢火煮滾，記得邊煮邊以木勺攪拌，徹底煮熟透
  就 OK。

 

今次係我第一次整芝麻黑豆漿，所以自己未飲之前，先考敬媽咪，一齊分享！

 

一杯自家即製新鮮豆漿，加一件蔥油餅，就成為咗我今日
一個充滿北方風味嘅 tea-lunch 喇！

 

飲之前再額外加入黑芝麻粉同小麥胚芽，立即成為一杯高纖兼
營養豐富嘅香濃豆漿。

 

之前喺 Louisa 屋企就飲過 Frankie 整嘅豆漿，今次到我整番俾佢哋飲喇！

Notes：
- 煮豆漿時一定要邊煮邊攪拌，因為豆漿好易黐底。

- 豆漿必須徹底煮滾先至可以要嚟飲，請參考「自製豆漿煮法」。

- 糖與芝麻粉嘅份量可因應自己口味而增減。