中秋做節晚飯@二宜樓

        噚晚阿馳 call 我，問我今晚得唔得閒做節食飯，咁 "橋" 我又 dayoff，摘日就不如撞日，所以今晚就出咗街食飯，唔駛自己煮。

         都係同往時一樣，近近哋去番海趣坊間「二宜樓」度食，唔駛煩！碼頭區佢都算叫做 OK 喇， 話哂「新星」集團衰極都有個譜。

餐牌封面係座客家圍屋，好客家 feel 呀！ 

 

先嚟一個客家雜菜煲，係用咗典型嘅客家用料 — 蝦米同土魷加
時菜，湯底好似有啲藥材味，最特別係加咗客家鹹肉落去。不過
唔知點解會有番茄！？

 

呢碟係蜜桃咕嚕肉，味道 OK，不過就唔係平時果種一嚿嚿肉，
而係一片片，好怪！

西蘭花炒帶子貴妃蚌，都幾好味。

呢個煲仔菜係豆豉雞煲，係我覺得最惹味嘅一個餸，底下爆香
咗嘅乾蔥頭好正，好香口，而雞肉又煮得啱啱好，滑而不嚡。
少少辣，好送得飯。

呢碟係秘醬蒸魽魚。

        阿馳係第一個食，之後佢同我哋講，叫我哋食完之後睇吓有咩意見。我聽完之後好驚，佢咁講一定唔慌好啦！原來啲肉好 "削"，唔夠實淨，無乜味，仲有少少腥 o添！不過係我心目中都唔係最差個樣。

最差果樣反而係碗紅豆沙！唔夠甜味之餘，仲要有種好似 "打芡"
嘅感覺，杰杰地，勁唔好食！

        唔知係咪所有打開門做生意嘅都係一樣，初初開業就一定好好，做落之後，就慢慢退步，keep 唔到水準！我好記得三年前新屋入伙時，我哋一家人都係喺呢度食餐飯，象徵式當係入伙酒，所以我專登走去睇番媽咪之前喺 Openrice 度寫嘅食評，發覺當時佢嘅 comment 都唔係太差，算係中上，但今餐就只可以叫做中規中矩，唔俾中下都算俾面喇！