南瓜意大利燴飯 Risotto alla Zucca

        前幾日整完白酒忌廉汁煮蜆，剩咗好多蜆肉汁，因為非常鮮甜，所以我留起咗佢嚟煮餸，因為都差唔多有成個飯碗滿咁多汁，諗咗好耐，究竟有咩食材係無乜味道兼勁吸水份呢？哈，卒之俾我諗到，就係煮 risotto 喇！

        原本諗住用磨菇煮嘅，點知噚日買餸果陣唔記得買埋，本來都無所謂，但係無理由淨係 "飯煮飯" 咁寡 o架，於是切南瓜準備整咖喱南瓜肉醬時，順便切啲細細粒嘅 size，放埋落去一齊煮囉！

 

材料：
南瓜
意大利米 (riso Arborio)
蒜茸
白酒
蜆肉汁
淡忌廉
水

 

- 南瓜去皮、去瓤，切成細粒。

- 燒熱油，爆香蒜頭後，就加入南瓜，兜兩兜後就加入白酒。

- 南瓜煮咗分零兩分鐘後，就加入米一齊煮。

- 拌勻南瓜同米後，就逐少加入蜆肉汁，慢火煮到收乾水時，再加入蜆肉汁或水。

- 重覆以上步驟直至米煮至七成熟。

- 加入淡忌廉，拌勻。

- 當飯煮好之後就熄火，灑上少少豆蔻粉，拌勻後即可上碟。

呢包就係早幾個禮拜喺「Market Place by Jason」度買嘅意大利米。
呢隻做緊特價，$25.9 / 1 kg，真係平到笑，其他牌子都差
唔多要 $4X / 500g，咁你話係咪唔買都對唔住自己
呀！而且到期日仲係 2011 年㖭，有排用喇！

 

        包裝盒背面仲印埋食譜教你煮㖭！驚死你因為唔識點煮而唔買呀！

 

 

        用蜆汁煮呢個飯真係無得彈，蜆肉汁本身已經好鮮甜，再加埋南瓜嘅清甜，嘩，好味到呢，都唔識得形容！！！！本來諗住我老豆一定唔鍾意食，因為佢唔鍾意食西餐之餘，又唔鍾意食硬飯，所以今晚我都照樣煮番少少普通米飯俾佢食。點知佢試食完之後仲繼續添多次呢？可能我真係煮得太好食喇，加上蜆肉汁嘅鮮甜，吸引佢食到唔停得口呀，哈哈！ 而且我特別煮耐少少，所以個 texture 比起正宗嘅 risotto 腍啲，易啲入口。

Notes：
- 根據包裝盒所教嘅煮法，要將啲蜆肉汁逐少逐少加入，咁就唔會黐底。

- 意大利米係唔駛洗嘅，直接放落鍋度煮就得。

- 煮嘅時候唔駛冚蓋，要記得間唔中就攪下佢，如果唔係就一定黐底！ 

- Risotto alla Zucca 即係 "Risotto with Pumpkin " 。