金針雲耳冬菇蒸雞

        呢個餸係噚晚整嘅，應該噚晚已經要 post 出嚟，點知寫完篇黑豆燕麥方塊之後超眼瞓，簡直眼瞓到一條魚都釣唔到呀！ 見已經差唔多點半鐘喇，都係去瞓覺喇，留番今朝先再寫。所以自從要打理埋頭家之後，真係好唔夠時間用，一日起碼有番 30 個鐘就差唔多！

        好耐都無食過蒸雞喇，心血來潮又想食喎，咁咪整囉！用金針、雲耳同冬菇嚟蒸雞係好家常嘅菜式，以前媽咪間唔中就會整 o架喇！記得媽咪之前同我講個，如果要買雞就去「惠康」度買啦，可能因為乾淨衛生啲啩！所以噚日我就走咗上去「惠康」度買。見到個 counter 有啲包好咗嚟賣嘅雞，有隻賣 $18，另一隻就賣 $25，兩種都係半隻份量，都唔知有咩分別，於是問個阿姐，原來一隻係急凍、一隻係冰鮮！其實相差唔多，應該係買冰鮮嘅，不過，一來見過「唐順興」果啲冰鮮雞成隻都只係廿零蚊，二來又想試吓急凍雞係咪真係咁唔掂，所以最後就揀咗 $18 急凍果隻返屋企做試驗，睇吓係咪真係咁差先！臨走前仲叫個阿姐幫我斬件，因為驚返到屋企唔識用把剪骨較剪去剪開佢，老豆又唔喺度，去咗農場，到時就麻煩喇，唔通原隻雞擺喺配料上面蒸咩！

       

材料：
雞
冬菇
金針
雲耳
紅棗

醃料：
蠔油
薑絲
紹酒
糖

- 雞洗乾淨後瀝乾水份。

- 參考「浸發冬菇方法」處理冬菇，之後切片。

- 雲耳剪去底部木頭部份；金針如有硬蒂，同樣剪去，之後將兩樣材料洗乾淨，放
   入加有少少白醋嘅滾水內汆水，盛起後過冷河，瀝乾水，備用。

- 紅棗用熱水浸軟，洗淨後切開去核，再切粗絲備用。

- 將雞件同冬菇用醃料先醃半個鐘，之後將金針同雲耳鋪喺碟上，將醃好嘅雞件同
  冬菇放上面，最後灑上紅棗絲，就可以拎去蒸，大約蒸 8 - 10 分鐘就得喇。

        實驗結果證明，急凍雞真係唔可以要嚟蒸，因為完全無乜味，好彩我都醒目，醃果陣已經用蠔油，所以急凍雞最好都係要嚟煮，仲要有較濃味醬汁呀！

        下次蒸雞都係要買冰鮮雞，不過之前要問定我老豆點用果把骨剪！