2009年10月10日星期六

今日試吓學抆 cream 呀!

        星期六都居然咁得閒,阿珊話好攰唔嚟上堂;Lily 就要考試,仲由朝考到晚,勁慘!所以都唔嚟喇。咁,今日就剩係朝早教一個學生咋!


       咁得閒,有咩好做呢?反正之前又買咗個蛋糕轉盤,咁就試吓學抆 cream 啦!



 



要抆 cream,咁就梗係先要整咗個海綿蛋糕先啦!因為主角唔係
個蛋糕,而係cream,所以只係做個 mini
size,一隻蛋加 20 克粉咋!


 



先將個蛋糕上下切開兩份。


 



喺下面果塊蛋糕上面先塗上一層忌廉,然後上面鋪上切粒桃駁李。


 



之後再喺桃駁李粒上面再塗多層忌廉。


 



將另一半蛋糕放上去。


 



再將成個蛋糕抆上忌廉。原來都唔易 o架!抆咗好耐都係咁樣衰,
不過都已經比想像中抆得平滑 o架喇!


 




好在之前切定啲桃駁李片,所以一 call 即到,幫手遮醜,嘻嘻!


 




整好哂之後就梗係切嚟食啦!


 


        不過疑問就嚟喇,究竟點先可以將個蛋糕由個轉盤度搬去另一隻碟度呢?好易整到cream o架噃!咗好耐都唔知答案,最後就Louisa 買俾我果塊墊底鋁板 "涉" 落蛋糕底度嚟搬起去咋!有冇經驗 blog 友可以話俾我知呢?


        試過呢次抆 cream,就知道點解出邊賣嘅蛋糕多數都會擠花喇,因為原來要抆到cream 平滑係唔易 o架!要整到好似「美心」個天使蛋糕同魔鬼蛋糕咁靚、咁平滑,都幾考功夫 o架!所以擠花上去就完全解決哂呢個問題,乜醜都遮住哂,仲遮到 "陷 一陷" o添!


2 則留言:

  1. 應該好好玩! 我都抆過一次.
    [版主回覆10/11/2009 01:03:00]        都幾好玩 嘅,不過當發現抆極都抆唔靚時,就有少少唔耐煩囉!

    回覆刪除
  2. 你已經好叻架啦!!!!!我第1次都無咁叻.........
    我之前見d師傅用忟刀放在蛋糕底,另外一隻手托住蛋糕搬去第2度
    [版主回覆10/11/2009 01:07:00]        多謝妳呀!我 諗妳都係謙虛 啫!         咁樣移動,隻手唔會整倒 啲 cream 咩!

    回覆刪除