黑芝麻粉

        黑芝麻粉係我一定會整定擺喺屋企看門口，因為實在太有用喇，可以要嚟整芝麻糊、芝麻醬、麻蓉餡、伴食麥片，又可以要嚟做餅乾、麵包、蛋糕材料，用途多都數唔哂！之前整落個樽已經差不多用完，今日 dayoff 得閒，整定一樽先！

        材料好簡單，就係得黑芝麻一樣！做法亦唔難。

先將黑芝麻洗乾淨、瀝乾水。( 原來用洗米呢個篩嚟洗芝麻都幾方便喎！)

 

將芝麻用白鑊炒香後，盛起攤凍。

 

之後將芝麻放入攪拌機內，用乾磨刀打成粉狀。

 

咁就攪掂啦，係咪唔太難呢？

 

放入密氣樽內，並保存於陰涼乾爽位置，可存放好長時間 o架！

Notes：
- 一定要將芝麻徹底洗乾淨，因為有好多雜質。

- 炒芝麻時，若果見到芝麻開始變得乾爽，唔黐鑊鏟，靜止時聽到微弱嘅 "辟呢
  巴啦"聲，並見到芝麻會彈跳起，就代表已經炒好。

- 將芝麻打成粉時，切勿打得太耐，因為攪打時所產生嘅熱力會令到芝麻出油，混
  合埋一齊會變成芝麻醬。