日式吉士蒸蛋糕 Custard Steamed Cake in Japanese Style

        用「千呼萬喚始出來」嚟形容呢個蒸蛋糕真係非常貼切，點解？因為個 recipe 真係搵咗好耐先搵得到㗎！

        記得之前同 blog 友霞女傾開偈，發覺大家原來都好想將蒸蛋糕整到好似出面街賣果啲咁鬆軟，咁有彈性，但大家都研究咗好耐都唔知點樣整，佢仲專登走去買支乳化劑返屋企試整 o添，當然，都係唔得啦！

        一直以來我都無放棄過去搵食譜，點知早幾個禮拜終於俾我搵到 blog 友傻軒媽媽呢個日式蒸蛋糕嘅食譜，見佢喺個 blog 度話都幾似「山崎」個蒸蛋糕，我一睇到呢句就即刻 "叮" 一聲，雙眼發哂光咁，心諗，唔通呢個 recipe 就係「眾裡尋它」果個！！？？ 

        今日有時間就即刻試吓整，睇吓係唔係我想要果隻先！

材料：
低筋麵粉      180 克
吉士粉          10 克
泡打粉          4 茶匙
粟粉              10 克
雞蛋              2 隻
糖                  60 克
淡忌廉          100 毫升
水                  80 毫升
橄欖油          4 茶匙

- 先將所有粉類過篩 3 次。

- 雞蛋打發後分 3 次加入糖，打至發白。

- 加入淡忌廉、水及橄欖油，拌勻。

- 分次篩入粉類，拌至無粉粒。

- 焗模內放上蛋糕紙杯，將麵糊倒入紙杯內。

- 隔水蒸 13 - 15 分鐘至熟。
 

以上材料份量可做約 12 個 3 吋蛋糕仔。

食譜參考自傻軒媽媽嘅日式蒸蛋糕。

       係啦，係呢隻喇！！蛋糕真係好軟綿綿呀！ 雖然始終未及麵包西餅店果啲咁超軟 (其實我懷疑佢哋係加咗化學原料 )，不過我已經好滿足，起碼唔似傳統蒸蛋糕咁實淨。其實兩種口感都各有各好，不過始終都想整到軟綿綿嘅蛋糕呀！

 

        因為落咗吉士粉嘅關係，所以蛋糕顏色都比較黃，而且仲有好香奶皇味㖭，正呀！

 

 

 

 

 

 

總共整咗 6 個細蛋糕同 1個大蛋糕，其中 3 個細嘅係帶去俾伯伯。

 

大呢個就俾伯娘帶番屋企慢慢食。

 

自己就試食咗半個，順便影張相俾大家睇吓入面嘅組織。

 

 

 

 

呢個就係用 "孤寒刮" 刮埋刮埋嘅剩餘物資，用個超細型紙杯裝住，

放入微波爐內做實驗，果然勁快手，30 秒都唔駛就

已經 "叮" 好！咁睇果款都 OK，係咪？

 

 

 

 

其實背面係已經爆哂出嚟喇！至於食落口喇喎，質地當然

無蒸咁濕潤軟綿，但係都唔太差喎， OK 㗎！

Notes：

- 原食譜係用 200 克低筋麵粉，但我自己就用咗 10 克粟粉同 10 克吉士粉代替。
  吉士粉可以令到蛋糕顏色更加深黃、更加靚，仲可以增添奶皇香味；而粟粉就可
  以令到蛋糕更綿密。

- 如果無淡忌廉的話，可直接用 180 毫升牛奶代替水及淡忌廉。

- 原食譜係用 80 克糖，但因為怕怕唔可以食得太甜，所以我就減起咗 20 克。

- 蒸好之後，最好將蛋糕盡快拎離個蛋糕模，放上架上攤凍，因為底部會好濕。