2009年12月30日星期三

辣魷魚

        早前 Lily 去完旅行返嚟,入嚟學琴時就帶咗份手信俾我,係即食辣魷魚。單睇個包裝,你哋估唔估到佢去完邊度旅行返嚟呢?



        係台灣?新加坡?大馬?大陸?通通都唔係,係泰國至真!!佢去咗華欣玩呀!當佢拎俾我睇時,我第一個反應就係問佢:「乜妳唔係去泰國咩?」佢就話:「係呀!你見到個包裝以為我又去咗台灣呀?」


        無錯,我真係以為呢份係台灣手信,因為無諗過泰國果 packing 會係咁囉!不過原來佢話俾我聽泰國好出名 o架!


武藏野急凍烏冬

        最近發現原來「大昌」都有急凍烏冬賣,而且價錢同 Louisa 幫我哋買果隻稻庭風急凍烏冬都差唔多,所以我都買咗包嚟試



        呢隻急凍烏冬個牌子叫做「武藏野」,同樣都係日本製造,原價 $38,有會員折扣後,就變$34,一包有 5 大個,但一個 size 相等於稻庭風果隻2 個,所以其實都係一樣咁多。


        今晚我就煮咗一個嚟食,都唔錯呀,一樣咁滑,不過本人就略嫌唔係好夠煙韌,較為腍咗少少,唔知定係因為我今晚煮耐咗呢?


        Winnie,妳都不妨買包試吓!


英式烤餅 Scone

        一直擺喺個 "To Do List" 入面好耐scone,今日卒之整到啦!今次整呢個 scone,都可謂配合哂天時、地利、人和。

        

        今日係農曆十五,所以一早起身梳洗好就去抹乾淨佛壇,然後做早課,之後就落街買餸。買完餸返嚟,一開手提,就收到一個 message,原來係我老豆留言俾我,話今晚唔返嚟食。佢又唔早響喎,大佬呀,天氣咁凍,早講就唔落街買餸啦嘛!! 因為咁,所以又唔駛煲湯,又唔駛整定預備夜晚果餐,變得好得閒,於是又 "犯賤" 搵嚟攪。


        見今日天氣仲係咁凍,最好就係整 scone,因為唔駛怕啲牛油溶嘛!於是就上網睇睇個食譜,睇吓駛唔駛用蛋,如果要用的話,咁就要放棄喇,因為我食齋日係唔食蛋嘅,點知真係唔駛用蛋喎!咁就即刻開工喇。到量料時,發覺用剩嚿牛油又 fit 哂個食譜,無多無少,啱好就係 50 克!!


        天氣夠凍、食譜又唔駛用蛋、剩番嚿牛油又啱好夠用、老豆唔返嚟食又有大把時間,咁多樣嘢都夾啱哂,想唔整都搵唔到藉口啦!



一路焗緊嘅時候已經聞到好香,出爐後又焗到好靚嘅金黃色!


 


材料:
牛油              50 克
低筋麵粉      140 克
泡打粉          1 1/2茶匙
鹽                  少許
奶                  56 克

以上材料份量可做大 size 烤餅 3 個或細 size 烤餅 6個。


食譜參考RTHK「美味 DIY」提子士乾



- 先將麵粉同泡打粉量好,然後連同鹽一齊倒入不銹鋼兜內拌勻。



- 牛油放於麵粉上切成細粒,將表面先撲滿麵粉。


 



- 之後用手指頭將麵粉同牛油 "捽" 勻成麵包糠狀嘅碎粉粒。




帶住手套整就會乾淨好多,唔駛攪到成手油!


 


- 之後喺牛油粉粒堆中撥開一個窿並倒入奶,用手拌勻成一個軟粉糰。


- 先枱面灑上麵粉,然後將軟粉糰移到枱面上。


- 用擀麵棍將粉糰開約 2 cm 厚,跟住用 scone 模 "吸" 出麵糰,放上已鋪不黏紙
  嘅焗盤上



因為我個 scone 模借咗俾 Louisa 用,所以我就咁將個麵糰切開
4 份算數。
 


 


- 喺麵糰表面掃上奶,然後放入已預熱至 200°C 嘅焗爐內焗 15 分鐘。


 



- 出爐之後就將 scone 放上放涼架上攤凍。


 



新鮮出爐,熱辣辣兼香噴噴 scone ,梗係第一時間俾媽咪先啦!


 



搽上無花果醬 scone,再配一杯淡淡清香嘅洋甘菊花茶,就係
一個典型嘅英式下午茶。



        第一次整 scone 都算幾成功呀,好鬆脆,但內裡最中心部份就有少少軟心,唔知係未焗夠透心定係個粉糰有少少搓過龍呢!?不過,食第一啖時就即刻發覺出事喇,唔記得落鹽呀!!所以個餅好淡、好寡!! 好彩加埋果醬一齊食就唔覺。呢樽無花果醬係 Louisa 送俾我 o架,因為好少見到有得賣,所以佢送咗俾我咁耐都唔捨得食。果醬本身因為無額外加糖,所以味道好清甜,好好味。


        原來整 scone 都幾容易,由開始洗用具到焗好出爐,都只不過係用咗約個半鐘頭,暫時講,係繼麻糬波波之後,最簡單易做嘅烘焗點心。



Notes:
- 可直接用 140 克自發粉嚟代替低筋麵粉、泡打粉同鹽。

- 整個過程最好盡可能只用手指頭接觸牛油粉糰,避免用手掌接觸,因為掌心體
  溫會容易令牛油軟化,甚至溶化,做出scone 就會唔夠鬆化,所以最好就
  係天氣清涼時整。


- 除咗用果醬伴食之外,傳統英國人都會用鮮忌廉伴食。


- 記得之前唔知係邊度睇過,話 scone 粉糰最好就咁切件,唔好用模 "吸" 出嚟,
  因為 "吸" 完模之後剩低嘅麵糰要再搓過先再 "吸" 模,咁樣就會令到麵糰搓得
  太多
而變得結實,焗出scone 就會變得死死實。


2009年12月28日星期一

大製作 — 實習篇 I ( 補加相片 )

        真係諗都諗唔到,自己都會有機會參與 "大製作" 喎!所以上個禮拜一我同 Winnie 就一齊去Louisa 屋企進行實習,睇吓到時整邊樣會方便、易做啲。



首先整嘅就係呢個榛子醬 macaron。點解會綠色?因為 Louisa
貪得意加咗幾滴班蘭香油囉!


 



個杏仁餅糊攤乾之後,個表面都已經瀉得好平滑。


 



所以焗完出嚟之後都唔會有個 "尖尖",而且仲有裙邊 o添呀!


 



整好個榛子醬 butter cream 之後就可以將兩片杏仁餅黐埋一齊,
攪掂,好好味呀!


 


        真係好開心,我第一次整已經成功喇!對於整 macaron 幾有經驗 Keith 話過俾我聽,好多人都失敗過好多次先成功做到,佢自己都整3 次之後先得呀!


        其實除咗整 macaron,仲有整到 Winnie 最拿手嘅玻璃曲奇。不過因為整果陣時間比較趕,所以整得無咁靚,不過經 Louisa 嘅包裝之後,嘩!真係完全睇唔到破綻,望落仲勁 prof o添呀!




 


        同場加影:Winnie 生日蛋糕。



其實都係我上次整果個黃豆粉紅豆雪芳蛋糕嘅。


 



不過當 Louisa 抆好 cream 之後,再加上餅面裝飾,就完全係
另一回事。係咪靚好多呢?


 



嘩,Arthur 送咗份大禮物俾 Winnie 呀,連佢媽咪 Louisa 都
妒忌呀!哈哈!!


 



唱完生日歌,拆完禮物之後,Winnie 就切生日蛋糕喇! 
吓佢幾開心!


 



切開個蛋糕俾你哋睇啦!


 


        期待緊下次嘅實習呀!


第一個 order:黃豆粉紅豆雪芳蛋糕

        最近葉太返嚟香港,成 4 年無見喇!佢打電話俾我時,話要我教佢整蛋糕,吓,我何得何能呀!!!咁我就話不如整個蛋糕俾妳啦。我問佢鍾意咩味道,叫佢自己揀啦,於是佢就叫我整個紅豆蛋糕。咁我就整番上次果個黃豆粉紅豆雪芳蛋糕俾佢,反正呢個蛋糕個個都讚好味!



因為無大模,所以照舊用大模份量整 3 個細蛋糕。


 



同上次個咖啡朱古力雪芳蛋糕比,呢個焗得靚好多!


 



今次玩嘢,試吓先將少少紅豆餡放落個模度,之後先再倒麵糊
入模,睇吓得唔得,結果證實係唔得嘅,即刻有凹陷呀!


 



呢個就無玩嘢,所以非常靚仔!


 



上次見 Louisa 話用個 non-stick 模整得好成功,個蛋糕係名符其實
嘅 "彈糕",所以噚日吉之島 $10 店就買咗個迷你版non -
stick
嚟玩吓。真係得 o架喎,個形仲好靚 o添!


 



不過個模就唔係真係防黏囉,你睇,咪一樣咁黐!!蛋糕脫模
時,攪到個內圈爛咗 o添,仲以為焗好之後一翻轉個蛋糕
就成個自動跌落嚟! 呢個就留番聽朝做早餐啦!


 




包得靚靚個蛋糕之後先送俾葉太,希望佢鍾意兼滿意啦!


 


2009年12月26日星期六

聖誕禮物?

        一向對聖誕節都無乜特別感覺,就算之前未皈依時都唔會慶祝,所以我從來都唔會送聖誕禮物俾人,但朋友送禮物俾我,我都會照收,唔通同人講話我係佛教徒,所以唔收聖誕禮物咩!我唔會固執到呢個地步。



不過呢啲絕對唔係聖誕禮物,只係咁喺 12 月收到啫!


 



啲朱古力係我老豆個農場 friend 送嘅,係喺英國帶返


 



呢樽 handcream 係阿瑩上嚟做冬果日送俾我 o架!佢一向都好
有心,知我皮膚一到咗冬天就死梗,所以好多時佢都會
送唔同潤膚產品俾我。


 



嚴格上嚟講,呢 stick candy 唔係我嘅禮物,係 Winnie 俾我送俾
小朋友同學生嘅。我記得細個果陣時媽咪都有買過俾我同阿馳
食,不過我就唔係好好囉!啲薄荷味勁假!


2009年12月25日星期五

咖啡朱古力雪芳蛋糕 Coffee & Chocolate Chiffon

        今日因為係紅假,所以唔駛去老人中心教合唱團,而 Ryan 又要去參加婚禮而上唔到堂,所以今日就變dayoff 喇!咁喺屋企有咩好做呢?梗係開爐整嘢食啦!哈,學 Louisa 話齋,真係有病 o架,難得有假期又唔休息,硬係要搵嚟整,好似唔整就周身唔聚財咁!!


        今次我揀咗整咖啡朱古力雪芳蛋糕,因為諗都諗到好味道啦!




咖啡朱古力雪芳蛋糕


材料:
蛋白                  110 克
糖                      65 克
粟粉                  5 克
蛋黃                  40 克
淡忌廉              15 克
水                      35 克
植物油              36 克
苦甜朱古力      30 克
低筋麵粉          55 克
肉桂粉              3 克
可可粉              2 克
細磨咖啡粉      3 克


- 先將麵粉過篩 3 次;朱古力隔熱水座溶。


- 用電動打蛋器以低速將蛋白打至起泡,之後分次加入 55 克糖,用高速打至企身
  後,再加入粟粉繼續打至乾性發泡,做成蛋白霜。

- 蛋黃、淡忌廉、水、油同朱古力用打蛋器低速拌勻。


- 篩入麵粉,以低速拌勻成麵糊,之後再加入肉桂粉、可可粉、即磨咖啡粉及剩低
  10 克糖,同樣用低速拌勻


- 蛋白霜用膠刮分次拌入麵糊內,以切拌方式拌勻所有材料。


- 將已拌勻麵糊倒入雪芳模內,然後放入已預熱 160 °C 嘅焗爐內焗約 30 分鐘。


- 出爐後就立即將蛋糕倒扣放涼,攤凍後脫模。


 



一路焗緊嘅時候,已經不斷聞到好香嘅朱古力味、咖啡味同肉桂
味,好心急等住食呀!


 



原來右邊果個模有少少滲漏呀!


 

蛋糕裝飾


材料:
甜忌廉              140 克
即溶咖啡粉      2 茶匙
防潮可可粉      適量


- 先將甜忌廉隔冰水用電動打蛋器打發至企身。


- 用小量水將即溶咖啡粉溶解後,加入已打發忌廉內拌勻,做成咖啡忌廉。



以上材料份量可做 17cm 雪芳蛋糕一個。

食譜係參考Ozawo Noriko 嘅《戚楓蛋糕秘法傳授》。



 


組合蛋糕

- 用抆刀將咖啡忌廉抆上蛋糕表面及內圈。

- 再喺蛋糕面灑上防潮朱古力粉即成。


        真係好似 blog 友 A moon 咁講,啲朱古力會令到蛋白霜消泡 o架!當我將啲蛋白霜加落去朱古力麵糊度時,即刻聽到微弱 "吱吱咋咋" 聲 ,係啲蛋白霜消泡嘅聲音 o架,聽到都真係幾驚,好驚會失敗呀!因為消泡嘅關係,所以麵糊體積都減少咗。平時除咗可以做到兩個小型蛋糕外,仲會有少少麵糊剩,但今次就連裝兩個小型雪芳模都唔係好夠呢!


        唔知係咪因為消泡原因,個蛋糕攤凍後回縮得好勁,其中一個仲幾乎成個脫模咁滯!!



右面果個縮到得番好細個咋!


 



之前左邊果個脫咗模之後都 OK 喎,起碼無 "熟悉的凹陷位" 先啦!


 



右邊果個就真係想死呀!!攪到收哂腰,你估你係經典朱古力
蛋糕咩!!真係無眼睇呀! 


 



啲果個抆好 cream 之後都唔錯喎,不過我啲抆 cream 技術
就真係有排練喇!


 



之前喺「二德惠」度買pack 圓形蛋糕盒,要嚟送禮都幾得
體呀,好啦,聽日 Lily 嚟學琴時就送俾佢 啦! 


 



個 "A 貨" 經典朱古力蛋糕見到都無乜心機整靚佢,求求其其咁
抆完 cream 之後,就灑上朱古力粉,點知灑到一邊多一邊
少,於是將錯就錯,就將佢變咗做一個 "A 貨"
Tiramisu 喇!


 



因為靚果個要送俾 Lily,所以我同老豆就食樣衰果個。


 


        個蛋糕雖然係樣衰啲,但味道真係一流,無得頂!因為我用Valrhona 72% 嘅苦甜朱古力,所以朱古力味勁香濃,仲帶有少少我最鍾意嘅肉桂味 o添!個 cream 就仲正,咖啡味好濃,Lily 實鍾意!呢個雪芳蛋糕一定會不停咁 encore,不過就要試吓用其他食譜去整,唔想再有  "A 貨" 嘛!



Notes
- 蛋白霜打好之後,可放入雪櫃以保持蛋白霜內氣泡嘅穩定性。


- 根據食譜指示,如果蛋白霜變軟時,可以用打蛋器再次打發。


- 如果屋企有奶的話,可直接用 50 克奶代替水同淡忌廉。


- 細磨咖啡粉可放入攪拌機內打到更加幼細,以免蛋糕食落有粗粒口感。


- 唔用甜忌廉的話,可用淡忌廉加 13 克糖打發,之後再加入咖啡溶液即可。