JUSCO 吉日

        上星期六開始，係「吉之島」一連 5 日嘅會員購物日，唔執輸嘅我，當然又去捧吓場啦，唔好浪費咗我申請張 AEON 信用卡嗎！

        每次 JUSCO 做特價，我都必定會去 $10 店同超市掃貨，今次都唔例外，不過就唔係勁掃果隻，都係買咗啲日常會用嘅嘢。我依家就 show 小小喺  $10 店買嘅嘢同大家分享吓啦！

呢個密氣樽我覺得好抵呀，又靚又實用，用嚟裝香料同易受潮
嘅食材就最啱。

又再買多個密實玻璃碗，個蓋真係好密氣，勁難揭開呀！

 

        呢個粉藍色嘅梳乎里盅我好鍾意呀，前幾日先俾我喺旺角店發現到，諗住遲啲做特價九折先買，點知隔幾日就做會員講物日，真係勁開心囉！

 

一個好普通嘅圓形儲物盒，你哋估吓我買嚟做乜嘢？

裝味噌？

裝茶葉？

裝麵粉？

裝米？

裝錢？

通通都唔係，係用嚟 …………

 

"燈燈燈櫈"，就係倒轉佢嚟裝蛋糕喇！即刻變身成為咗個蛋糕盒！

 

        之前都無大小適合嘅盒可以用到，唯有用個玻璃煲裝住先。但個玻璃煲都唔細，放咗入個雪櫃之後，就阻咗好多位置，依家用個膠盒裝真係慳好多位，而且個盒蓋都算相對地密氣 o架，所以對於蛋糕保鮮都有一定幫助。

       

         學餅后 Vanlily 話齋，真係好鍾意去 $10 店度買嘢，款式多、價錢平，而且我仲好多時都專揀 "Made in Japan" 嘅嘢嚟買，真係乜都值番哂喇！