英式烤餅 Scone

        一直擺咗喺個 "To Do List" 入面好耐嘅 scone，今日卒之整到啦！今次整呢個 scone，都可謂配合哂天時、地利、人和。

        

        今日係農曆十五，所以一早起身梳洗好就去抹乾淨佛壇，然後做早課，之後就落街買餸。買完餸返嚟，一開手提，就收到一個 message，原來係我老豆留言俾我，話今晚唔返嚟食。佢又唔早響喎，大佬呀，天氣咁凍，早講就唔落街買餸啦嘛！！ 因為咁，所以又唔駛煲湯，又唔駛整定嘢預備夜晚果餐，變得好得閒，於是又 "犯賤" 搵嘢嚟攪。

        見今日天氣仲係咁凍，最好就係整 scone，因為唔駛怕啲牛油溶嘛！於是就上網睇睇個食譜，睇吓駛唔駛用蛋，如果要用的話，咁就要放棄喇，因為我食齋日係唔食蛋嘅，點知真係唔駛用蛋喎！咁就即刻開工喇。到量料時，發覺用剩嚿牛油又 fit 哂個食譜，無多無少，啱啱好就係 50 克！！

        天氣夠凍、食譜又唔駛用蛋、剩番嚿牛油又啱啱好夠用、老豆唔返嚟食又有大把時間，咁多樣嘢都夾啱哂，想唔整都搵唔到藉口啦！

一路焗緊嘅時候已經聞到好香，出爐後又焗到好靚嘅金黃色！

 

材料：
牛油              50 克
低筋麵粉      140 克
泡打粉          1 1/2茶匙
鹽                  少許
奶                  56 克

以上材料份量可做大 size 烤餅 3 個或細 size 烤餅 6個。

食譜參考咗 RTHK「美味 DIY」嘅提子士乾。

- 先將麵粉同泡打粉量好，然後連同鹽一齊倒入不銹鋼兜內拌勻。

- 牛油放於麵粉上切成細粒，將表面先撲滿麵粉。

 

- 之後用手指頭將麵粉同牛油 "捽" 勻成麵包糠狀嘅碎粉粒。

帶住手套整就會乾淨好多，唔駛攪到成手油！

 

- 之後喺牛油粉粒堆中撥開一個窿並倒入奶，用手拌勻成一個軟粉糰。

- 先喺枱面灑上麵粉，然後將軟粉糰移到枱面上。

- 用擀麵棍將粉糰擀開約 2 cm 厚，跟住用 scone 模 "吸" 出麵糰，放上已鋪不黏紙
  嘅焗盤上。

因為我個 scone 模借咗俾 Louisa 用，所以我就咁將個麵糰切開
4 份算數。 

 

- 喺麵糰表面掃上奶，然後放入已預熱至 200°C 嘅焗爐內焗 15 分鐘。

 

- 出爐之後就將 scone 放上放涼架上攤凍。

 

新鮮出爐，熱辣辣兼香噴噴嘅 scone ，梗係第一時間俾媽咪先啦！

 

搽上無花果醬嘅 scone，再配一杯淡淡清香嘅洋甘菊花茶，就係
一個典型嘅英式下午茶。

        第一次整嘅 scone 都算幾成功呀，好鬆脆，但內裡最中心部份就有少少軟心，唔知係未焗夠透心定係個粉糰有少少搓過龍呢！？不過，食第一啖時就即刻發覺出事喇，唔記得咗落鹽呀！！所以個餅好淡、好寡！！ 好彩加埋果醬一齊食就唔覺。呢樽無花果醬係 Louisa 送俾我 o架，因為好少見到有得賣，所以佢送咗俾我咁耐都唔捨得食。果醬本身因為無額外加糖，所以味道好清甜，好好味。

        原來整 scone 都幾容易，由開始洗用具到焗好出爐，都只不過係用咗約個半鐘頭，暫時嚟講，係繼麻糬波波之後，最簡單易做嘅烘焗點心。

Notes：
- 可直接用 140 克自發粉嚟代替低筋麵粉、泡打粉同鹽。

- 整個過程最好盡可能只用手指頭接觸牛油粉糰，避免用手掌接觸，因為掌心體
  溫會容易令牛油軟化，甚至溶化，做出嚟嘅 scone 就會唔夠鬆化，所以最好就
  係天氣清涼時整。

- 除咗用果醬伴食之外，傳統英國人都會用鮮忌廉伴食。

- 記得之前唔知係邊度睇過，話 scone 粉糰最好就咁切件，唔好用模 "吸" 出嚟，
  因為 "吸" 完模之後剩低嘅麵糰要再搓過先再 "吸" 模，咁樣就會令到麵糰搓得
  太多而變得結實，焗出嚟嘅 scone 就會變得死死實。