糖醋排骨菜飯

        之前整過一次上海排骨菜飯，今次就整番個糖醋排骨菜飯先！
 
        平時食糖醋排骨，多數都會用腩排整，但我今次就揀咗用一字排，一來貪佢賣相靚啲，二來因為逢星期六教完琴都懶得落街買餸，所以就預早幾日前買定啲急凍金沙骨，咁就可以行少轉！況且個糖醋汁咁濃，就算用新鮮肉整都食唔出個鮮味啦，因為實俾個汁冚過哂啲鮮味！

        正宗嘅糖醋排骨做法應該係先炸後炆，但我就慳功夫，唔將排骨炸過就直接放入糖醋汁料內煮。我自己好滿意個糖醋汁，味道調得啱啱好，唔會太酸，又唔會過甜。菜飯味道亦啱啱夠味，而且飯粒清爽又唔會太濕，不過菜就略為腍身，下次可以再遲啲先放落飯煲度煮。

糖醋排骨

 

材料：
急凍一字排 ( 金沙骨)

醃料：
鹽
紹酒

汁料：
鎮江醋
生抽
老抽
冰糖
紹酒
水

- 排骨解凍洗乾淨，瀝乾水份，用醃料醃好，備用。

- 將汁料全部倒入煲內煮滾，之後放入排骨，用慢火將排骨炆腍及將汁收乾就攪
  掂。

菜飯

 

材料：
小棠菜
珍珠米
清雞湯
薑茸

調味料：
鹽
糖
紹酒
麻油

- 菜洗乾淨，瀝乾水兼略榨乾水份，之後切碎。

- 燒熱油鑊，爆香薑茸，將菜略炒、灒酒，加鹽、糖調味，灑上麻油後熄火兜勻，
  盛起備用。

- 米洗乾淨後加入清雞湯同煮，煮好後加入已炒熟嘅菜粒，拌勻即成。

 

等咗咁耐，卒之可以開飯喇！

 

       

Notes：
- 用冰糖煮糖醋汁，顏色會比較 "ling3" 身有光澤。

- 若排骨已煮好但有好多汁料剩時，可先將排骨盛起，將汁料繼續煮至濃稠，之後
  再將排骨放番入汁料內煮至收汁即可。

- 如果唔想菜飯太濃味，可改以一半清雞湯加一半清水煮飯，或依個人口味調節。