禮物真係收完一份又一份！
早前我叫 Winnie 陪我去睇吓啲銀包，睇咗好多款都唔啱，點知前幾日約佢出嚟交收 Louisa 送俾佢果個計時器時，佢話買咗個銀包送俾我，攪到我都有啲唔好意思 o添！見到個包裝紙係「永安百貨」，都知道平極有限 o架喇，點知打開一睇，心裡面即刻嘅反應係：嘩，駛唔駛咁重手呀！！
原來係 「Pierre Cardin」銀包嚟 o架！啲皮好靚、好軟熟 o架！
個銀包好啱用呀，因為有好多位俾我插卡，非常方便。
真係好唔好意思，攪到好似叫佢送個銀包俾我咁！我都唔識買番啲咩嘢送俾佢 o添，成世人都無買過嘢送俾女性，就算以前媽咪喺度，我都甚少買嘢送俾佢，因為真係唔識買 "女人嘢" 呀！
暫時嚟講，我最多都係識做 "阿茂" 咋 ( 即係整餅囉 )！遲啲要整番個重量級蛋糕送俾佢至得喇！
Winnie，喺呢度再次多謝妳呀！
沒有留言:
發佈留言