噚日居然會收到份大禮，無錯，真係一份大禮嚟 o架，無論係 size、重量、價值，抑或係心意，都非常之大，所以我好開心，好鍾意呢！
真係諗都無諗過自己都會擁有一個 Le creuset 嘅煲或者 pan，因為價錢唔平嘛！但最重要都仲係佢嘅 "重量級"！我成日都同 Louisa、Rachel 講笑，如果我用個 LC 煲嚟煮嘢，煮完之後，根本都無力將煲餸拎出去飯廳，哈哈！！
其實好早之前都已經見過呢隻牌子嘅 product，不過果陣孤陋寡聞，唔識貨。
記得以前仲係喺黃埔教琴時，我間中就會叫媽咪同老豆出嚟等我放工，之後就喺黃埔啲商場行街同食 dinner。當時我哋好多時都會去果間超大型嘅「百佳」睇嘢，因為果間分店其實即係相等於依家嘅「Taste」( 果陣時仲未有呢個品牌 o架 )，有好多特別貨品賣。好記得有次媽咪專登叫我行過去個 counter 度睇吓啲煲，我話有咩特別，顏色鮮豔？佢就叫我試吓拎起個煲，我心諗，唔通個煲係超輕！？點知，當我準備一拎起時 ……… 哈哈，唔駛講都知我個反應係點啦！！當時我就同媽咪講，都唔知做乜鬼整到個煲咁重，邊有人買 o架！點知，到近呢兩年因為開始寫 blog 同睇其他 blogger 嘅 blog，先發覺佢嘅好處，先知到自己當年有眼不識泰山！
之前 Louisa 去法國旅行時，其實我都已經搭佢幫我買呢隻迷你版 grill pan，但係當時搵唔到，連之前「Le creuset」開倉都無，我就諗住反正唔係趕用，慢慢等到有啦！點知 Louisa 之前喺「Citysuper」見到佢又做 promotion，仲要係有呢隻迷你版，見到個 promotor 用佢嚟煎緊 4 隻雞翼，佢心諗個 pan 可以煎到 4 隻雞翼，咪啱啱好夠我同我老豆一餐飯！所以就決定買嚟送俾我。Louisa，真係多謝妳呀！！
呢隻漸變酒紅色好靚，好陶醉！
我嘅第一件 "製成品" 幾時面世？快喇、快喇，下星期一就會亮相喇！因為我叫咗阿馳同阿瑩果日返嚟做冬，Louisa 知道我果日就可以將呢隻 pan 大派用場，所以就專登提早送呢份聖誕禮物俾我囉！到時希望我嘅 "製成品" 唔會失禮個 pan 同浪費咗 Louisa 番心意啦，嘻嘻！
真係羨慕死人喇...有人送！ 等睇你啲好餸呀吓...... 個 cookie 譜我加咗上去喇！
回覆刪除[版主回覆12/16/2009 17:48:00] 妳駛乜羨慕我呀，妳都有妳個 honey 買 咗幾個 LC 俾妳啦！仲話要換哂屋企 啲舊煲 o添！我記得妳仲讚妳老公好可愛！！ 我羨慕都 嚟唔切呀！ 係呀，我睇 咗個 recipe 喇！ Thank you very much！ 不過用 cup 嚟 量麵粉同牛油好似好唔準咁，麵粉 pack 得實同鬆都唔同 咗重量喎！牛油就更加唔知點量出一杯 o添！
記得開鍋,可參
回覆刪除http://blog.yam.com/tzui/article/15445820
http://blog.yam.com/jplaying/article/17357774
[版主回覆12/16/2009 18:00:00] 好多謝 seven 你 嘅分享， 啲次料好有用呀！ Thanks so much!
oh...你朋友超nice!!!
回覆刪除[版主回覆12/18/2009 17:18:00] 係呀，佢真係勁好好好好好好好 ……… 人呀！仲好老友 o添！
又真係好令人羨慕呀, 我剛在藍色大門PARTY都收到我的第1件LC
回覆刪除[版主回覆12/18/2009 17:16:00] 咁真係要恭喜哂妳呀！
哇！！！！！！！！羨慕死人！
回覆刪除[版主回覆12/18/2009 17:15:00] 你都有 friend 送你 Crabtree & Evelyn 喎，我都羨慕你呀！