其實呢個西檸煎軟雞已經係第二次整 o架喇，不過上次掛住食，唔記得咗影相，所以無 post 到上嚟。
今次整好之後趁記得就即刻影相喇！
材料：
急凍雞扒
粟粉
雞蛋
檸檬
醃料：
鹽
糖
雞粉
生抽
紹酒
麻油
芡汁料：
檸檬汁
白醋
糖
鹽
吉士粉
- 雞扒解凍後洗乾淨，用抹手紙索乾水，之後用醃料醃一個鐘以上。
- 雞蛋拂打成蛋液，將醃好嘅雞扒蘸上蛋液，再撲上粟粉。
- 燒熱油，先將雞皮果一面煎至金黃香脆，之後翻轉將另一面煎熟，盛起。
- 檸檬刨皮後，榨出檸檬汁，連同檸檬皮茸、白醋、糖同鹽一切煮滾。
- 吉士粉用小量水開勻後，倒入煮滾嘅汁料內埋薄芡。
- 將芡汁淋上已切件雞扒即成。
Notes：
- 雞扒唔駛撲上太多粉，否則就會食到一層厚厚嘅硬粉。
- 煮芡汁時可酌量加水以調校合適嘅稠度。
呢個好正呀..........攪到我好鬼餓
回覆刪除[版主回覆12/21/2009 14:34:00] 睇到肚餓呀，快 啲郁 手整 嚟食啦！
正喎...乜原來咁咁死多料??????
回覆刪除仲以為煎好雞扒再淋d檸檬汗就食得添...
都係食好過整啦~
[版主回覆12/22/2009 23:24:00] 其實都唔係好多料 o架咋，只係醃料個欄嚇怕你 啫！基本上所有 肉類都係用呢幾樣調味料醃 啫！ 至於果芡汁，係我自己加白醋 啫！加吉士粉係 喺 Vanlily 度學番 嚟 o架！
Hihi kestrel:- 想請教下，如整2塊雞扒，茨汁份量應該係點？thx a lot!!!
回覆刪除[版主回覆02/05/2012 16:44:49]首先喺度同妳講聲唔好意思，因為我真係答唔到妳呢個問題，請見諒！
煮餸同整糕餅好唔同，整糕餅某程度上係一門科學，所以材料份量準確度比較講究，但煮餸時材料多寡不會影響餸菜成功與否，最多只係味道唔太好。我煮餸時無特別講究材料份量，多數都係邊煮邊試味，邊煮邊增加調味料，慢慢調校至自己滿意嘅味道或濃稠度，所以我無刻意將份量記低。
妳可以先將檸檬汁、白醋、糖同鹽放煲內煮好試味，之後再用吉士粉水埋芡。如果太稀的話就再多加吉士粉水；但如果太 "杰" 的話，妳就酌量加水開稀，即使煮好後發覺份量不夠兩塊雞扒的話，可以用之前差不多份量比例再煮多少少，呢個就係我煮食嘅習慣。
就算我寫好材料份量，但因為各人口味不同，都未必會認同我嘅食譜，所以妳可以大膽嘗試自己調校出最適合自己及家人口味嘅檸檬芡汁，大廚都係試菜無數次先得出最後成功嘅美味菜式呢！
加油呀 siu sin！