2010年12月29日星期三

香蕉全麥班戟 Whole Wheat Banana Pancake

        今日晏晝突然間想食一樣好耐都無整過嘢,就係 pancake 喇!咁啱屋企又有隻勁爆梅花點嘅香蕉,於是就跟 P 姐個食譜整咗呢個班戟。

 


 

材料:
香蕉          2 隻
全麥粉      120 克
泡打粉      2 茶匙
玉桂粉      1/2 茶匙
雞蛋          1 隻水1杯
油              30 毫升

 

食譜參考自 T&P Banana Pancakes

 

 

- 香蕉用叉壓成香蕉蓉備用。

 

- 將其餘材料全部混合好,拌勻。

 

- 加入香蕉蓉,拌勻後靜置一小時。

 

- 燒熱平底鑊,倒入適量粉漿,用慢火煎至表面出現氣泡。

 

- 之後將班戟翻轉,煎至金黃熟透即可。

 


班戟好軟熟,仲有淡淡嘅香蕉味。


 


糖漬橙蜜伴食都係一個唔錯嘅配搭


 

Notes:
- 若果香蕉蓉唔夠甜的話,食時可加蜜糖、果醬或糖膠。

 

- 全麥粉可用普通麵粉代替。

 


        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans

2010年12月26日星期日

日式咖喱吉列豬扒

        一直都好想試吓自己整吉列豬扒,但係每次一諗起炸鑊油就驚,所以遲遲都無行動。直至早排「JUSCO」會員日時喺超市度買咗包日式麵包糠返嚟,今日都卒之起心整喇!



材料:
脢頭豬扒
紅蘿蔔
蘋果
急凍粟米粒
椰菜
乾蔥頭
日式麵包糠
麵粉
雞蛋


醃料:


日本醬油
清酒


調味料:
日式咖喱磚


- 豬扒洗乾淨,用抹手紙索乾水份後用刀背將豬扒兩面拍鬆,之後再推回原狀。


- 用醃料將豬扒醃好備用。


- 蘋果去皮去芯、切粒;紅蘿蔔刨皮,切去頭尾後切粒;粟米解凍後沖水洗淨。


- 將紅蘿蔔同粟米汆水,瀝乾水份;乾蔥頭去衣、切去頭尾後開邊;椰菜洗淨、
  切絲。


- 將雞蛋拂打成蛋液,豬扒沾滿麵粉後再蘸滿蛋液,最後沾滿麵包糠。


- 豬扒放入180 °C 滾油內炸熟至金黃色,其間需將豬扒翻轉。


- 炸好嘅豬扒放上吸油紙上,然後切件。


- 另燒熱油鑊,爆香乾蔥頭,之後加入蘋果、紅蘿蔔同粟米兜炒。


- 加入適量水煮至蘋果略軟身,然後加入調味料,煮至咖喱磚完全溶解即可。


- 椰菜絲鋪喺碟上,放上豬扒,然後淋上咖喱即成。



整起時熱辣辣又脆身,睇見都想死,可惜今日咁鬼死凍,
影完相之後都已經凍哂,仲有少少腍 o添呀!


 



食就好食喇,不過炸完嘢之後真係有排攪,成個爐頭都係哂油,
好彩地下唔係太多油咋,如果唔係就抹餐死喇,
食幾多都補唔番!真係炸一次驚一次!!


 


Notes
- 若豬扒周邊有筋膜的話,最好喺四邊輕輕切一下,咁樣煎出嘅豬扒就唔會鬈
  起。

豬扒炸好後最好趁熱切件,可避免炸面被切爛。

- 蘋果與日式咖喱係最佳配搭。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年12月22日星期三

偷懶日

        本來逢星期二都要去 Louisa 屋企教 Arthur,但係 Arthur 噚晚打電話俾我,話佢今日唔得閒上堂,所以今日就無端端變dayoff 喇!


        噚晚臨瞓前原本諗住今日反正無嘢做,不如解凍定啲材料今日整蛋糕,但係我都好有自知之明,好清楚自己會懶得就懶,尤其天氣咁凍,到最後都係會唔願郁,所以都係無將材料解凍,費事解完凍後唔整又放番上冰格。果然,今日真係無整啦!仲一瞓就瞓到差唔多成點鐘先起身,真係好耐都無試過咁瞓法喇!完全體現到 Motonako A. 所講,瞓到自然醒果種爽法!


        我不嬲都好懶落街,唔駛出去教的話,盡可能都唔會出街,所以好習慣一日買定幾日餸,但係因為無諗過今日會唔駛出街兼要喺屋企煮嘢食,所以之前買就無預備到今日,咁就唯有食屋企存貨喇!


        晏晝好簡單,食兩塊麵包,仲杯咖啡就算喇!



吓我幾懶,焗番熱個麵包就當一餐,連咖啡機都懶用,
即沖三合一攪掂。


 



呢個麵包來頭不少,喺台灣坐飛機返嚟 o架!係 Louisa 個姨甥買返嘅,
叫做「天下第一包」喎!Louisa 叫我自己切啲拎走,
咁我就唔客氣咁切咗一角。


 



用錫紙包住焗番熱嚟食,真係唔錯喎,皮脆肉軟。最特別係啲餡,
有合桃同乾果,如果無估錯的話,啲乾果應該係圓肉嚟 o架,
真係未試過,下次整包包時都試吓用圓肉先!


 


        至於夜晚果餐,當然又係屋企有乜就食乜啦!所以材料都好簡單:risotto、乾菌、蒜頭、乾蔥頭、煙肉同香腸就攪掂!



好簡單嘅一個小食,香腸煙肉卷,無論點茄汁定係芥末蛋黃醬,
都一樣咁好食。


 



仲有簡化版嘅雜菌 risotto,蒜茸同乾蔥茸起鑊炒香姬松茸同牛肝菌,
又無用白酒,又無落雞湯,淨係用咗浸菇水,加啲雞粉、
鹽、香料同黑椒粉調味就算數。


 


        食完飯,整個蘋果做飯後果,咁就完成咗全日嘅飲食,我係咪好懶呢! 不過咁,懶還懶,兩餐都總算係健康過出街食快餐或煮即食麵啦,係咪?


        懶咗一日,瞓醒後就要迎接每星期最討厭嘅一日,就係星期三嘅清潔日,咁多種家務之中,我最憎就係做清潔 o架喇,洗碗都一樣咁憎!! 依家諗番起上嚟,以前媽咪真係好叻,正確嚟講,應該係話佢好捱得,因為以前我都無乜點幫佢做清潔,淨係做埋哂啲好 "輕 can" 嘢,老豆都只係一年一度嘅大清洗,媽咪佢一個人攪掂哂全屋,又拖地、又抹地方又抹窗,依家自己同老豆 share 各做一半,我都覺得好辛苦,唔怪得之以前媽咪有時唔開心或激氣時,真係會乜都鬧得出口,梗係啦,佢做嘢做得咁辛苦,又要煮飯,仲要全部都係 "義工",我哋都只係幫得少少手。唉,可能就係因為咁而積勞成疾,所以咁早就離開咗我!依家先後悔已經太遲喇,一切已經返唔倒轉頭喇!!!!


2010年12月16日星期四

翠玉瓜雞柳炒韓國年糕

        原來已經半年有多無整過韓國年糕喇,今晚又再整嚟食先!


        不過今次煮法同上次唔同,諗呢次煮法應該正宗啲,因為我YouTube 度睇到好幾位韓國人示範,佢嘅煮法都係差唔多,所以我估應該係正宗韓式煮法。當然,配料我就無跟足啦,都係跟自己口味而選擇啫!



材料:
韓國年糕
翠玉瓜
急凍雞扒
蒜茸


醃料:
雞粉

生抽
紹酒
粟粉


調味料:


生抽
韓國辣椒醬
辣椒粉
雞粉


- 雞扒解凍後切去皮及脂肪,沖洗乾淨後切成雞柳,用醃料醃好


- 年糕放入滾水內煮約 4 - 5 分鐘,之後過冷河,瀝乾水份。


- 翠玉瓜洗淨後去蒂,切件備用。


- 慢火熱鑊,將調味料及蒜茸放入鑊內拌勻,加入雞柳用中火兜炒至半熟。


- 加入年糕及適量水,用中慢火繼續煮。


- 當年糕煮至軟身及汁開始變得濃稠時,就加埋翠玉瓜落鑊一齊煮。


- 翠玉瓜煮到適當腍度時就可以熄火上碟。


-上碟後灑上炒香白芝麻即可享用。



今次跟咗正宗嘅方法去整,年糕不但軟糯凐韌,連味道都好味好多呀!


 



食完辣嘅炒年糕,最好就係整番碗桂花海底椰雪梨糖水潤番下,
咁就唔駛怕熱氣啦!


 



Notes
- 煮年糕時記得間中兜炒一下,以防黐底,若中途水份唔夠的話,需酌量加水。


- 若果用上湯代替水就唔駛再落雞粉。


- 想翠玉瓜保持爽口的話就唔好煮太耐。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


桂花海底椰雪梨糖水

        今晚煲個桂花海底椰雪梨糖水,簡直又暖、又甜、又滋潤呀!




材料:
雪梨
新鮮海底椰
南北杏
糖桂花
冰糖

- 海底椰切去外皮後切粒;南北杏洗淨後用清水浸15分鐘;雪梨去皮、去芯,切
  粒備用。


- 將以上三樣材料凍水落煲,煲滾後轉慢火繼續煲。


- 差不多煲好後就加入冰糖,直至冰糖完全溶解。


- 最後加入適量糖桂花,拌勻即可。



Notes
- 想方便的話,可買現成糖桂花代替。


- 新鮮海底椰用唔哂的話,可放入冰格保存,解凍後即用。


- 加入糖桂花後可先試味,若果唔夠甜的話,可再加冰糖。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年12月14日星期二

抹茶雙色餅乾 Duo Colour Matcha Biscuit

        繼續整餅,今次試整嘅係和風餅乾,仲要玩埋螺旋雙色 o添呀!



料:
牛油              100 克
糖霜              80 克
低筋麵粉      165 克
抹茶粉          15克
雞蛋              1隻


以上材料份量可做 20 - 25 塊餅乾。


食譜出自福田淳子《我愛和風洋菓子》。




- 牛油於室溫放軟;麵粉及抹茶粉分別過篩;將蛋黃及蛋白分開。


- 牛油同糖霜用電動打蛋器打至發白,之後加入蛋黃拌勻,平均分成兩份。


- 將 100 克麵粉篩入其中一份蛋油混合物內;剩低嘅 65 克麵粉與抹茶粉混合好,
  篩入另一份混合物內。


- 兩份混合物分別搓成麵糰,用保鮮紙包好,放入雪櫃內雪約 1 個鐘。


- 拎出雪凍麵糰,用擀麵棍將麵糰分別幹開成3毫米厚、約 20 厘米長嘅方形麵
  皮。


- 蛋白略拂勻,然後均勻地搽適量喺白麵皮上。


- 放上綠色麵皮,切齊四邊,之後再喺綠色麵皮上搽適量蛋白。


- 捲起麵皮,用保鮮紙包好,放入雪櫃內雪約 1 個鐘。


- 拎出麵糰,每隔5毫米闊切開,然後放上已鋪牛油紙嘅烤盤上,放入已預熱至
 
170 °C 嘅焗爐內焗 15 - 20 分鐘。


- 出爐後攤凍即可享用。



爐溫唔得平均,有啲焗得比較深色,而且捲麵皮時又唔係咁熟手,
所以捲得唔夠靚,下次要留意。不過味道絕對唔差,
好濃綠茶味呀!


Notes
- 原食譜係用糖粉而唔係糖霜。


-麵糰放入雪櫃雪凍時間以麵糰雪至硬身為準。


-麵糰放上烤盤時,麵糰之間記得預留位置膨脹。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


花生醬曲奇 Peanut Butter Cookie

        接到 Winnie order 要幫佢整曲奇送禮,今日 dayoff 喺屋企就試做個花生醬曲奇。呢款曲奇簡單易做,而且花生醬又夠香口,對方應該都會鍾意。



材料:
牛油              100 克
花生醬          100 克
糖                  100 克
雞蛋              1 隻
低筋麵粉      150 克
泡打粉          1/2 茶匙
鹽                   少許


以上材料份量約可做20塊曲奇。


食譜自潘行莊《妙趣曲奇》。



- 牛油於室溫放軟;雞蛋拂打成蛋液;麵粉及泡打粉過篩 3 次。


- 將牛油、花生醬同糖拌勻,加入蛋液混合,之後篩入粉類及鹽,搓成麵糰。


- 將麵糰分別搓成直徑約 2 厘米小球,放上已墊入爐紙烤盤上,然後壓平。


- 烤盤放入已預熱至 190 °C 嘅焗爐內焗約 12 分鐘即成。



鍾意花生醬嘅朋友,真係唔好錯過呢個花生醬曲奇呀!



Notes

- 個人覺得成品較甜,所以糖嘅份量可以酌量減少。

- 搓麵糰時覺得比較軟身,所以額外加多少少麵粉。


- 如果鍾意食到有花生碎的話,可用粗粒花生醬製作。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans 啦!