2010年12月22日星期三

偷懶日

        本來逢星期二都要去 Louisa 屋企教 Arthur,但係 Arthur 噚晚打電話俾我,話佢今日唔得閒上堂,所以今日就無端端變dayoff 喇!


        噚晚臨瞓前原本諗住今日反正無嘢做,不如解凍定啲材料今日整蛋糕,但係我都好有自知之明,好清楚自己會懶得就懶,尤其天氣咁凍,到最後都係會唔願郁,所以都係無將材料解凍,費事解完凍後唔整又放番上冰格。果然,今日真係無整啦!仲一瞓就瞓到差唔多成點鐘先起身,真係好耐都無試過咁瞓法喇!完全體現到 Motonako A. 所講,瞓到自然醒果種爽法!


        我不嬲都好懶落街,唔駛出去教的話,盡可能都唔會出街,所以好習慣一日買定幾日餸,但係因為無諗過今日會唔駛出街兼要喺屋企煮嘢食,所以之前買就無預備到今日,咁就唯有食屋企存貨喇!


        晏晝好簡單,食兩塊麵包,仲杯咖啡就算喇!



吓我幾懶,焗番熱個麵包就當一餐,連咖啡機都懶用,
即沖三合一攪掂。


 



呢個麵包來頭不少,喺台灣坐飛機返嚟 o架!係 Louisa 個姨甥買返嘅,
叫做「天下第一包」喎!Louisa 叫我自己切啲拎走,
咁我就唔客氣咁切咗一角。


 



用錫紙包住焗番熱嚟食,真係唔錯喎,皮脆肉軟。最特別係啲餡,
有合桃同乾果,如果無估錯的話,啲乾果應該係圓肉嚟 o架,
真係未試過,下次整包包時都試吓用圓肉先!


 


        至於夜晚果餐,當然又係屋企有乜就食乜啦!所以材料都好簡單:risotto、乾菌、蒜頭、乾蔥頭、煙肉同香腸就攪掂!



好簡單嘅一個小食,香腸煙肉卷,無論點茄汁定係芥末蛋黃醬,
都一樣咁好食。


 



仲有簡化版嘅雜菌 risotto,蒜茸同乾蔥茸起鑊炒香姬松茸同牛肝菌,
又無用白酒,又無落雞湯,淨係用咗浸菇水,加啲雞粉、
鹽、香料同黑椒粉調味就算數。


 


        食完飯,整個蘋果做飯後果,咁就完成咗全日嘅飲食,我係咪好懶呢! 不過咁,懶還懶,兩餐都總算係健康過出街食快餐或煮即食麵啦,係咪?


        懶咗一日,瞓醒後就要迎接每星期最討厭嘅一日,就係星期三嘅清潔日,咁多種家務之中,我最憎就係做清潔 o架喇,洗碗都一樣咁憎!! 依家諗番起上嚟,以前媽咪真係好叻,正確嚟講,應該係話佢好捱得,因為以前我都無乜點幫佢做清潔,淨係做埋哂啲好 "輕 can" 嘢,老豆都只係一年一度嘅大清洗,媽咪佢一個人攪掂哂全屋,又拖地、又抹地方又抹窗,依家自己同老豆 share 各做一半,我都覺得好辛苦,唔怪得之以前媽咪有時唔開心或激氣時,真係會乜都鬧得出口,梗係啦,佢做嘢做得咁辛苦,又要煮飯,仲要全部都係 "義工",我哋都只係幫得少少手。唉,可能就係因為咁而積勞成疾,所以咁早就離開咗我!依家先後悔已經太遲喇,一切已經返唔倒轉頭喇!!!!


8 則留言:



  1. 冬至快樂!

    [版主回覆12/22/2010 15:20:00]        冬至快樂呀!妳屋企會做節嗎?

    回覆刪除
  2.  
    你真係懶得有道理啦...煙肉燶哂唔好再食呀..超致癌...
    冬至快樂
    [版主回覆12/22/2010 15:27:00]        冬至快樂呀!         其實 啲煙肉都唔係太 燶 o架咋,不過影相唔夠光,咪睇落好 燶囉!  查實因為我成日驚煎完之後會 "有油賺",所以落好少油好煎,點知煎 咗 無幾耐已經黐鑊!

    回覆刪除
  3. 冬至快樂!!!!
    [版主回覆12/22/2010 15:28:00]        冬至快樂呀!妳今晚會落廚煮飯做節嗎?

    回覆刪除
  4. 冇喇...去咗大家姐度打邊爐呀! 嘩....你咪鬼嚇我至得架???我屋企都係我一個搞掂晒架咋....咁我咪???
    [版主回覆12/22/2010 15:41:00]        妳果邊已經過咗冬至咩?         鬼得閒嚇妳咩,妳咁本事,煮一餐大菜點會難到妳呀!駛乜變哂骷髏頭咁呀!!

    回覆刪除
  5. 未....今日齊人咪慶咗佢先囉!你今晚又煮大餐呀? BTW, got your e-mail finally, thanks million!!!!
    [版主回覆12/22/2010 17:11:00]         唔煮大餐啦,得我一個人咋,做乜鬼節 啫,而且仲要教琴 o添!         卒之都收到 嗱,咁就安樂哂囉!快 啲郁手整啦,整完記得 post 上 嚟俾我睇呀!         妳唔駛多謝我,多謝 Louisa 啦,係佢叫我 send 俾妳 o架!  

    回覆刪除
  6. Kestrel ,
    Merry Christmas !

    [版主回覆12/25/2010 19:16:00]        Merry Christmas!!

    回覆刪除
  7. 聖誕節快樂呀!
    [版主回覆12/25/2010 19:16:00]        Merry Christmas!!

    回覆刪除
  8. 雖然知你唔拉更聖誕節 , 但都係咁易講聲Merry X'mas & all the best !!!
    呀...係喎...唔記得帶腐乳,南乳同蝦醬添...自己去買啦...
    [版主回覆12/25/2010 19:19:00]         作死妳咩!唔帶禮物過 嚟不特只仲叫我自己去買!!!  係呀,我新年會有特備節目,就係用腐乳、南乳同蝦醬 嚟整番個「混醬」炒毛豆!         Merry Christmas!!

    回覆刪除