2013年8月31日星期六

有無攪錯呀,要終止 blog!!!!!?????

諗大家都應該睇到頭頂嗰堆紅字啦,真係有冇攪錯呀, 突然間話停就停,得嗰幾個月通知,臨時臨急,完全無心理準備下要即刻搵新竇,你哋知唔知邊個 blog 方便又易用呀!!

剛 click 過紅字的 link,發現原來編輯部之前有篇通告係話 Yahoo 早前收購Tumblr blog,有冇 blog 友用過呢?

2013年8月26日星期一

黑糖甘筍蛋糕

呢幾日去街市買餸,去到菜檔見到啲價錢牌真係嚇死,幾乎樣樣嘢都十幾蚊斤,苦瓜 $16 斤、菜芯$13/ $14 斤、絲瓜 $14 斤、連青瓜都 $12 斤,真係死得喇!!睇住個價錢都真係買唔落手,你估全部都係有機蔬菜咩!!菜檔阿姐話:「無辦法喇,大陸水浸嘛,依家啲大陸人好識要錢,有好多菜我哋都唔敢攞呀!」


 


我習慣十點零十一點鐘度先落街買餸,平時呢個時間靚嘢都已經賣得七七八八,但今日就多多都有得你揀,見到菜檔阿哥仲喺度將某部份唔太賣得嘅蔬菜收起,之後就聽到有個師奶話:「啲菜賣到咁貴,我哋買唔落手之餘,你哋都無生意!」唉,都唔知要捱貴菜捱到幾時,唔通日日食椰菜同蘿蔔咩!


 


咁攪法,真係要慳啲先至得!上星期買個南瓜,一半煲糖水,一半就用嚟燜排骨;星期日就用咗半條紅蘿蔔炒韓國粉絲,剩番嗰半條就留嚟今日整甘筍蛋糕,夠哂資源增值喇啩!







原本已經係減糖㗎喇,唔想咁甜嘛,之但係唔記得咗黑糖係相對比較濕,
應該要再減多少少,所以呢次個蛋糕偏濕,都係鍾意乾
texture







 




今次無將合桃混入麵糊裡面,就咁灑喺面,合桃就香脆得多哦!






想知道點整嗎?快啲睇番《美式甘筍蛋糕》個食譜啦!

2013年8月24日星期六

南瓜栗子燜排骨

每次整完瑞士雞翼之後,瑞士汁總係會有排擺,但擺得耐又會變,即使放雪櫃都會發霉,但係我又好唔鍾意短期內食重覆餸,起碼幾個月後先會再整同一樣嘢,所以個汁都會用嚟煮餸調味同燜餸。


 


之前買咗個南瓜,一半用嚟煲渣咋,另一半就留番嚟燜餸。栗子燜雞就整得多兼食得多,今次攪攪新意思,栗子南瓜加瑞士汁燜排骨啦!







材料:
排骨
南瓜
栗子
冬菇
素雞
京蔥
乾蔥頭
薑片
蒜子


醃料:


生抽
紹酒
粟粉


 


調味料:
丁香
八角
月桂葉
蠔油
瑞士汁
冰糖



麻油


 


- 排骨洗乾淨後用醃料醃好;南瓜洗刷乾淨外皮,切去上下瓜蒂,開邊後去瓤,切細件。



-
栗子去衣去殼;冬菇用清水浸發後切去菇蒂;素雞沖洗後切粗片。



-
京蔥切去頭尾,將白色部份切粗片;乾蔥頭去衣,小部份開邊,備用。



-
燒熱油,將素雞片落鑊煎至金黃,盛起。



-
部份京蔥、開邊乾蔥頭、薑片及蒜子落鑊爆香。



-
加入排骨,灒酒,兜炒片刻,然後加入調味料及適量水。



-
翻滾後加入栗子同冬菇,轉慢火燜至排骨八成熟。



-
加入素雞、南瓜及剩餘乾蔥頭及京蔥,繼續燜至南瓜腍身。



- 最後灑上麻油,兜勻後即可上碟。




未食過咁香噴噴嘅栗子燜排骨,梗係啦,落咁鬼多料頭
同調味料去燜,想唔香都幾難啦!











因為唔想食太多肉,所以加咗條素雞落去撐場。





 

Notes
-
請參考《醃肉基本法》內基本醃肉步驟。



-
栗子去殼方法,可參閱《栗子去殼及去衣方法
》。



-
想於短時間內浸軟冬菇,請參考《浸發冬菇方法
》。



- 若材料已經燜好但仍留有大量汁時,可用粟粉水埋薄芡。

2013年8月23日星期五

肉鬆芝麻包

呢個包其實應該係星期一嘅出品,之但係嗰日個人勁攰,又有少少頭痛,加上大懶蟲爬咗入我個身體裡面,真係唔願攪咁多嘢,即使前一日已經準備好哂其他副材料都係無動力郁手整包,最後就淨係煎幾塊 pancake 食算數!


 


見今日突然可以 dayoff,加上天氣又涼咗好多,搓包都唔使身水身汗咁辛苦,就的起心肝整啦!







材料:
高筋麵粉 250
斯佩特粉
50
老麵
50
即用酵母
4
10
1 茶匙

150 毫升
橄欖油 8
炒香芝麻
15
豬肉鬆 適量

即食紫菜 適量
白芝麻 適量
蛋黃醬 適量


 


- 將麵粉、老麵、酵母、鹽同糖混合,逐少加水搓至起筋。



-
加油搓成麵糰後,繼續搓揉及摔打成光滑麵糰。


-
包入芝麻,以摺覆動作將芝麻均勻散佈整個麵糰。



-
將麵糰滾圓,放入已灑粉嘅兜內,用保鮮紙封好,發酵 45 分鐘。



-
麵糰排氣後平均分割成 4 份,分別滾圓,靜置鬆弛 10 分鐘。



-
麵糰壓平,將左邊 1/3 麵糰向內摺入,捏緊邊緣。



-
再將右邊 1/3 麵糰向內摺入,捏緊收口,將兩端輕輕搓尖成欖核形。



-
放上已墊入爐防黏蓆嘅烤盤上,發酵約 30 - 40 分鐘至兩倍大。


- 用水噴濕麵糰表面,灑上少量高筋粉。


- 放入已預熱至 190 嘅焗爐內,焗約 35 分鐘至麵糰熟透。


- 出爐後立即移至架上攤凍。

-
將紫菜剪碎,加入豬肉鬆及白芝麻混合好。

-
麵包頂部切開缺口,唧入少量蛋黃醬,之後再加適量豬肉鬆,即成。

以上材料份量可做約 12 厘米長麵包 4 個。






麵糰發到脹卜卜,白雪雪,好可愛;出爐後仲好似蛋撻王子同
Reko 咁講,四條友仔喺度猛唱歌,勁開心呀!








好明顯,呢條友仔唱得最大聲啦!








我一向都唔太鍾意食有餡包,因為覺得個包會相對濕,但呢個餡
就比較乾身,完全唔會有我唔鍾意嘅情況出現,
加埋 mayonnaise,好味!








Notes
-
老麵做法請參閱《燕麥包》。

-
斯佩特粉可用一般全麥粉代替。


2013年8月19日星期一

榴槤慕斯 Durian Mousse

後宮佳麗已經超過三千,確有人滿之患,為騰空出更多空間,要開始逐步向各佳麗下驅逐令。首當其衝嘅係榴槤貴人同蛋白貴人!




 

材料:
急凍榴槤果蓉   500
魚膠片   8
糖   90
  30毫升

蛋白   45
淡忌廉 250

-
果蓉平均分成兩份,其中一份座熱水保暖。


-
將魚膠片放入凍水中浸至完全軟身,撈起,略為瀝乾水份後加入座熱果蓉內攪拌至完全溶解。


- 糖加水放入小煲內,開火加熱至 117 煮成糖漿。


- 糖漿開始滾時,用電動打蛋器將蛋白打至起泡。


- 糖漿煮好之後,逐少倒入蛋白內,邊倒邊繼續打至 8 成企身成意式蛋白霜。


-
淡忌廉用電動打蛋器打至 7 成企身後,加入蛋白霜,輕手拌勻。

- 凍果蓉與暖果蓉混合,攪拌均勻,之後拌入蛋白忌廉混合物內。


- 將果蓉混合物倒入杯內,放入雪櫃內雪至凝固即可享用。




呢款膠杯真係好好用,不但連膠蓋,杯身質地亦好硬淨,
可重覆多次使用都唔易爛,而且外觀都不俗哦!







 



Winnie 幫我買呢隻 D24 急凍榴槤果蓉超正,勁香甜,即使溝
蛋白同 cream
嚟整 mousse 都不減風采,而且價錢
又唔太貴,相對合理,讚呀!






Notes
-
魚膠片必須逐片放入水中,確保每塊都接觸到水,易於浸軟。

 

- 混合咗魚膠溶液嘅果蓉必須座熱水保暖,避免魚膠有製作過程中慢慢凝固。



- 蛋白要放室溫回溫,若果太凍的話,當熱糖漿加入時會立即凝固成粒。

至愛麻婆豆腐

睇得我個 blog 耐而又細心嘅朋友都會知道我嘅口味,鍾意食乜,唔鍾意食乜都應該估到,卒之俾班太發現我勁鍾意食辣嘢㖭!






鍾意佢辣、鍾意佢易煮、鍾意佢好送得飯!!








咪睇見個 "血池" 就俾佢嚇嚫呀,查實都係整色整水,得個樣㗎咋!






想要食譜就睇番《麻婆豆腐》啦!

2013年8月18日星期日

咖啡伴侶

        大家唔好誤會,我唔係幫某商品最代言人推廣產品,我講緊嘅係 biscotti 呀!



香口兼硬脆嘅 biscotti 配咖啡一齊食確實一流!
 






今次用咗開心果、杏仁、糖漬橙皮同迷迭香嚟整,超香口呀!  


 



食譜請參考《迷迭香紅莓乾意式果仁脆餅》。



2013年8月15日星期四

阿茂們又開工

Lemon curd 真係咁有魅力!?


 


對於啲 酸精嚟講,梗係奉 Lemon curd 為極品啦!之但係,對於一個只有歲零兩歲 BB 都有一定嘅吸引力就真係不可思議,即使酸到咪哂眼都不斷要問人拎嚟食,真係超癲呀!!


 


又有 blogger 跟我個食譜整過之後,對佢愛不惜手,短短幾個月就已經整過十幾樽,呢個就真係仲癲㖭!佢朋友食過佢整嘅檸檬醬之後大讚,仲叫佢整嚟放喺佢舖頭度寄賣㖭!乜真係咁好食咩!?  對我嚟講,Lemon curd 係好味道,如果唔係我都唔會再整啦!但就唔係好都超鍾意嗰隻囉,如果有得揀的話,我會比較鍾意 marmalade 多啲囉!


 


呢次我整咗兩樽 Lemon curd,一樽已經俾咗 Winnie,另一樽睇怕都有排先食得哂。所以星期日又叫埋兩名阿茂一齊,用佢嚟整檸檬醬罌粟籽蛋糕,咁就可以快少少食哂佢。






牛油蛋糕係老表嘅至愛,但係經過呢次自家製作之後,佢知道原來要用
咁多糖同牛油嚟整,即刻話呢個蛋糕好唔健康喎!唉,
食街賣啲仲 "贈送" 添加劑同防腐劑㖭!










出爐後趁熱搽好檸檬糖水,即刻用保鮮紙包好,
攤凍後放入雪櫃,
3 日後先食。











磅蛋糕類蛋糕通常即日食都會無咁好食,因為相對比較乾身,
3 日之後就回油,蛋糕 texture 會比較油潤,好食好多㗎!






參考食譜:


檸檬蛋醬


 



2013年8月10日星期六

華記果菜有限公司

        噚日突然間改到 5:00 pm 先開工,所以開工前變成有好大段時間得閒無嘢做,而且反正都過開去港島嗰邊,又去多轉蘇豪區,睇吓搵唔搵到「華記」先!



2013年8月9日星期五

海鮮價仲勁過恆指

早排成日落雨,好彩我唔係貴人,每次出街時都唔係真係勁大雨嗰隻,嗰幾個星期,印象中都只係開過幾次遮咋!


 


出門口前已經落雨的話,我就可以揀對防水鞋嚟著,但唔好處係好重、好焗,所以唔落雨的話我一定唔會著,但係如果出門口時無預佢落雨,我就會著波鞋返工,萬一中途落起雨上嚟咁就出事喇,因為對波鞋身經百戰,個底開始穿,咁咪入哂水,如果唔好彩的話,對腳分分鐘 足大半日,從來無腳汗嘅我都 到腳都臭,仲勁唔舒服啦!而且近排先發現連對勁重嘅「Timberland」個底都開始擘大個口,上次一路行緊時,幾驚佢中途突然甩底,咁就真係勁樣衰囉!所以都係要的起心肝去買對新波鞋!!


 


講開買波鞋,我諗都無乜人會好似我咁樣,十幾年嚟都只係買同一牌子、同一款式兼同一顏色,點解要咁?皆因我對腳係有啲事,類似扁平足、高足弓嗰類問題,再加上 O 形腿問題都幾嚴重,用腳掌外側落地行路,所以行無耐已經覺得好攰,而且我係上門教學生,行路又特別多,所以著對有前後 cushion 嘅波鞋就舒服好多。但問題係,著波鞋返工又好似唔係咁似樣,話哂都係老師,教自己私人學生還好,如果係返中心同琴行教就唔係咁好喇!所以之前媽咪就話一定要買對全黑嘅波鞋,望落唔係咁覺眼。之但係,行勻成條波鞋街,有邊隻牌子有出到全黑色兼仲要前後都有 cushion 呢?答案咪就係得「Reebok」一隻囉!所以自此之後就再無買過其他牌子款式喇!








上星期其實已經出去旺角波鞋街睇過哂,格過哂價,間間都 $4XX - $5XX 呢個價,睇見都呆咗,因為咁多年以來都係賣緊大約 $350 ,做乜突然貴咁多嘅,完全 out of budget,但都無辦法啦,鬼叫一定要買佢咩!行吓,唔經唔覺,原來時間已經差多要教學生,但仲未食 lunch,咁就所以無買。點知噚日返工前又再出去買過,發覺好多間都做緊特價,$3XX - $4XX 已經有交易,行哂咁多間舖頭格價之後,最終以 $345 扑槌成交,真係人都癲呀,早一個星期同遲一個星期買,價錢可以相差咁大,好彩上次唔夠時間買啫,如果唔係就 到爆,我個心肯定俾我到去背脊呀!!

2013年8月5日星期一

參巴海鮮

咗參巴辣椒醬,唔會淨係用嚟點嘢食咁齋,打番開食譜睇睇,原來都有好幾個食譜都好吸引,又煮魷魚、又煮蝦、又煮魚,個個我都想試,貪心嘅我卒之嚟個海鮮大集匯,一次過滿足哂幾個願望!







材料:
魷魚


青口
帆立貝


翠玉瓜
蒜片


 


調味料:
參巴辣椒醬
阿參醬
青檸


 


- 魷魚去衣、去骨、去墨囊,洗淨後切圈;蝦背切開,去腸後洗乾淨。



-
青口同帆立貝洗乾淨;翠玉瓜洗淨,切頭尾,用滾刀切件;青檸刨出皮茸及榨汁



-
將以上全部材料逐一汆水,之後過冷河,瀝乾水份備用;阿參醬用少量熱水開勻



-
燒熱油,將參巴辣椒醬爆香,之後加入阿參汁略炒。



-
放入翠玉瓜及蒜片兜炒,然後將全部海鮮料加入,快手炒兩下,加入其餘調味料兜勻即可上碟。


 


 




有無發覺今次碟餸比起上次煮嗰個辣椒醬紅好多呢?哈哈,做咗小小手腳嘛!
加咗少少韓國辣椒粉落去整色整水,而且辣味又再香濃
㖭!
加埋阿參醬同青檸汁一齊煮,酸酸辣辣,都幾醒胃㗎!












翠玉瓜
不嬲都係就咁放落鑊炒就掂,之但係聽完食物安全中心話炒翠玉瓜
釋放出最多致癌物,最好炒之前先汆水,咁就可以減低致癌物釋放,
為健康著想,就算麻煩都唯有照做啦,反正其他海鮮料都汆水。



Notes
-
參巴辣椒醬做法請參閱《參巴辣椒醬》。


-
想知多啲關於阿參醬資料,請參考《泰式酸辣雜菜湯》。