早排成日落雨，好彩我唔係貴人，每次出街時都唔係真係勁大雨嗰隻，嗰幾個星期，印象中都只係開過幾次遮咋！
出門口前已經落雨的話，我就可以揀對防水鞋嚟著，但唔好處係好重、好焗，所以唔落雨的話我一定唔會著，但係如果出門口時無預佢落雨，我就會著波鞋返工，萬一中途落起雨上嚟咁就出事喇，因為對波鞋身經百戰，個底開始穿，咁咪入哂水囉，如果唔好彩的話，對腳分分鐘 “噏“ 足大半日，從來無腳汗嘅我都 “噏“ 到腳都臭，仲勁唔舒服㖭啦！而且近排先發現連對勁重嘅「Timberland」個底都開始擘大個口，上次一路行緊時，幾驚佢中途突然甩底，咁就真係勁樣衰囉！所以都係要的起心肝去買對新波鞋！！
講開買波鞋，我諗都無乜人會好似我咁樣，十幾年嚟都只係買同一牌子、同一款式兼同一顏色，點解要咁？皆因我對腳係有啲事，類似扁平足、高足弓嗰類問題，再加上 O 形腿問題都幾嚴重，用腳掌外側落地行路，所以行無耐已經覺得好攰，而且我係上門教學生，行路又特別多，所以著對有前後 cushion 嘅波鞋就舒服好多。但問題係，著波鞋返工又好似唔係咁似樣，話哂都係老師，教自己私人學生都還好，如果係返中心同琴行教就唔係咁好喇！所以之前媽咪就話一定要買對全黑嘅波鞋，望落唔係咁覺眼。之但係，行勻成條波鞋街，有邊隻牌子有出到全黑色兼仲要前後都有 cushion 呢？答案咪就係得「Reebok」一隻囉！所以自此之後就再無買過其他牌子款式喇！
上星期其實已經出去旺角波鞋街睇過哂，格過哂價，間間都賣 $4XX - $5XX 呢個價，睇見都呆咗，因為咁多年以來都係賣緊大約 $350 ，做乜突然貴咁多嘅，完全 out of budget，但都無辦法啦，鬼叫一定要買佢咩！行吓行吓，唔經唔覺，原來時間已經差唔多要教學生，但仲未食 lunch，咁就所以無買到。點知噚日返工前又再出去買過，發覺好多間都做緊特價，$3XX - $4XX 已經有交易，行哂咁多間舖頭格價之後，最終以 $345 扑槌成交，真係人都癲呀，早一個星期同遲一個星期買，價錢可以相差咁大，好彩上次唔夠時間買啫，如果唔係就 “豬” 到爆，我個心肯定俾我揼到去背脊呀！！
你終於出手買鞋啦,呢對鞋幾好睇呀,又型添,唔錯,但你隻腳有咁多問題雖要看醫生嗎?
回覆刪除[版主回覆08/14/2013 21:56:28]咪係囉！
[緊張大師-小女人回覆08/13/2013 17:22:50]我先生又係咁呀,但他話無用的,現在無著到,你們這情況係無得醫的
[版主回覆08/10/2013 22:46:30]無法啦，原來以為無事嗰對都唔掂，唔買唔得啦！
我之前已經去過屯門醫院矯形部睇過醫生，佢話無得攪，只可以度身訂做一個特別鞋墊俾我咋！
嘩~~
回覆刪除你隻腳有咁多問題...有冇睇過E生呀~
我係外8字...行路係腳"盞"掂地先....同埋腳型好奇怪...
我EVEN著平底鞋/ 有AIR既波鞋...行半個鐘就會勁腳痛呢~
[版主回覆08/17/2013 23:24:32]我無睇過，因為覺得價錢都唔平！
[梁少奶 ^v^回覆08/17/2013 11:10:14]我都有朋友叩我著DR KONG >.<
不過D鞋款好難番工呀
[版主回覆08/16/2013 00:02:55]可能著特製鞋，或者「Dr Kong」啩，樓上位 blogger F 都有提議，妳可以參考一下！
[梁少奶 ^v^回覆08/15/2013 23:47:35]著拖鞋 = 隻腳通爽d咋
我都唔知可以著咩先岩...唉
[版主回覆08/14/2013 21:57:55]嘩，著拖鞋行街點會舒服呀，個底咁薄，我覺得同赤腳行無乜分別！！
[梁少奶 ^v^回覆08/13/2013 23:59:57]係啦~~
行路痛好辛苦!!!!
我著拖鞋隻腳就最舒服
不過行得內..又冇air同墊就會好攰囉
[版主回覆08/10/2013 22:49:35]喺醫院矯形部睇過醫生喇，佢話無嘢可以做到，只係度身訂做一個特別鞋墊俾我咋！
我都有少少外八字腳呢！總之就係辛苦啦！
你呢種問題在我們呢边醫生會提意着Vans呢隻牌子...尤其針對扁平足而設計架! 又唔貴添呢!
回覆刪除[版主回覆08/10/2013 22:47:09]係咩類型鞋呢？香港有無賣呢隻牌子呀？
其實加個矯形鞋墊會有幫助, 如果唔係會影響膝關節同脊椎
回覆刪除[版主回覆08/12/2013 19:52:50]其實我之前去醫院矯形部做特製鞋墊時，都係俾呢對鞋佢跟住個形做呀！不過用得耐個鞋墊爛，對鞋個氣墊又穿咗！
返工鞋有無試下clarks /rockport/ecco D鞋? 斯文款一定有, 而且佢地D墊好舒服(唔嫌款少既, 仲可以搵下護士鞋). 不過你話你有足弓問題, 咁可能你就要加買D有足弓支持既鞋墊加入去, 裕華/永安之類公司會有賣.
回覆刪除係就係貴, 但腳板問題唔理佢就會惡化, 然後會影響到膝痛至腰痛, 到時手尾長, 慘呀.
花多DD錢買對好鞋都算物有所值. 寧願其他地方暫時慳多少少抵銷左佢.
[版主回覆08/16/2013 02:11:45]又無睇過呢幾隻牌子哦，因為諗住啲 "斯文" 鞋唔會有氣墊，淨係波鞋先有。
之前去「Dr Kong」買個一對鞋墊喇，成四、五百蚊呀！不過個鞋墊好硬，著起上嚟唔多舒服。
醫院啲醫生話無手術可以做，都只係幫你造個特製鞋墊舒緩不適！
足弓問題無得醫真係好可惜架, 無法子. 只可用鞋墊防惡化. "足弓位"硬係必需既, 就好似危樓需要外用鋼筋支撐一樣. 不過, 如果唔岩位而硬, 咁頂住就真係唔好. tailor-made鞋墊會最好.一年一對, 千幾蚊, 約$5一日. 唔知政府醫院有無? 如果有應該平好多. 不過可能要排得耐.
回覆刪除"氣墊"就真係波鞋先會有(但波鞋同樣係無足弓支持). 但係舒服既厚墊, 皮鞋都會有. 我建議果幾個牌子, 佢地主打selling point係吸震舒適. 佢地D款初時好basic好basic, 係近幾年先多好多花款. 護士鞋就出名舒服, 因為預左俾佢地全日係企係度做野(所以我見到好多售貨員同待應都著佢).
p.s. 噢, 岩岩去clarks個website度八一八,原來佢某D鞋係有"氣墊"架. 而rockport就用addidas科技既鞋墊.
[版主回覆09/04/2013 03:21:13]唔好意思，隻虎又無電郵通知我，我依家入到嚟先知妳留言俾我咋！
嘩，妳好 prof 喎！我之前去醫院做的鞋墊係軟膠質地，不過幫助唔係好大。
我搬咗嚟呢度呀：http://kestrelkwan.blogspot.hk/