2014年6月30日星期一

芥菜南瓜泡菜

        中國人不嬲都鍾意用芥菜嚟做醃菜,好似雪菜、梅菜同鹹酸菜咁,都係用芥菜醃製而成,原來韓國人一樣都會佢嚟醃泡菜。踏入夏天,街市開始有芥菜賣,我自己都幾鍾意食,特別鍾情佢有點微微甘苦嘅味道,等我都試吓用佢嚟整泡菜先!
 
        買開南瓜煲綠豆沙,順便又試埋用南瓜整泡菜。
 
 

南瓜麥米綠豆沙

        唔敢飲涼茶,就食碗綠豆沙清熱啦!
 
 

2014年6月29日星期日

紅米 1s

        一直以為身邊得我一個仲未轉用智能手機,但原來都仲有好幾人都同我一樣,有啲甚至仲係用緊 keyboard 機,相比起上嚟,我用 touch screen 都已經唔太 out,哈哈!
 
        依家用緊部手機都開始出問題,無端端會自動轉做離線模式,又或者由路線 1 轉為路線 2,我都唔知發生咩事,淨係知道打唔出又打唔入;有陣時又會無啦啦自動關機;試過有次仲差啲俾部手機累死!如果我要比平時早好多起身的話,除咗校床頭鬧鐘之外,我仲會校埋手機個鬧鐘,保險啲嘛。俾床頭鬧鐘嘈醒之後,當然唔願起身啦,同自己講,瞓到手機鬧鐘都響埋先起身啦,點知一路瞓一路等,等等吓發覺唔多對路,無理由隔咁耐都仲未響,於是起身一睇,原來個手機係有自動開啟到,但入到個 logo 畫面就 hang 咗機,定哂格,好彩我無真係完全瞓著咋,如果唔係就出事喇!到最近發覺兩嚿電池都開始老化,都唔知買唔買新電池好,最怕呢頭買咗新電池,嗰頭就即刻壞機,咁就真係多得佢唔少!
 
        阿馳同 Lily 都知我對手機要求唔高,只要有最基本功能就得,所以佢兩個都建議我買「小米」部紅米手機,因為夠平嘛!於是我都上過官方網站睇資料,發覺唔係隨時隨地上網就買到,原來係要𥄫住佢公佈幾時開賣先可以同其他人一齊搶貨,亦睇到好多網友都話試過幾次都買唔到,見咁 24 Jun 首次在港公開賣紅米 1s,於是就登記預約。自己一向都咁黑仔,諗住都唔會買到,純粹只係想實習一吓個購買流程,畢竟我都完全無網上購物嘅經驗,點知又會咁鬼好彩,一擊即中,當堂打個突。其實我都猶疑緊繼唔繼續落去買部機,因為依家真係好積極咁喺度量地同拍烏蠅,會失預算,但啲人又講到咁艱難先買得到,難得我咁好彩又無理由放棄㗎,算啦,買定部機喺度做後備都好,費事依家用緊部機突然間 “certified” 時都無機用。 
 
        有時嘢都真係整定㗎,原來手機開賣當日,兩期 iBond 同「中移動」都分別派息,夾埋都有幾千蚊,部新手機咁平,額外買多兩部都唔使入肉哦,呵呵! ^^ 
 
 

2014年6月26日星期四

黑糖橄欖油香蕉蛋糕 Dark Brown Sugar Olive oil Banana Bread

        之前用液體油脂代替固體油脂整糕餅》內同大家分享咗少少資料,咁咗理論之後,當然最重要係實習啦!咁啱手頭上有香蕉,就搵香蕉蛋糕做實驗啦!今日晏晝趁個 focaccia 麵糰發酵緊時候,我就著手去做呢個實驗。  


新鮮迷迭香

       禮拜一喺大角嘴教完琴之後,要趕喺八點鐘之前到旺角政府合署交啲文件,落堂時都已經七點零鐘,所以都好趕,一直急急腳無停咁行,加上天氣又熱又濕,真係趕到身水身汗,所以交完文件之後就走咗過去「新世紀」度 過冷河
       入到商場就直接走去「一田」超市歎冷氣兼睇吓有無米麴賣,其實都預咗佢無得賣,因為旺角店面積都唔係好大。反而行到放蔬菜個雪櫃時,見到有新鮮香草賣,而且仲好新鮮,我立即睇中咗 rosemary,賣 $30 / 100g,比起「City Super」價錢唔算太貴。
 

用液體油脂代替固體油脂整糕餅

        一直以來都對 food substitution 嘅網頁好有興趣,因為有好多食材喺香港唔係咁容易買到,即使俾你買到,但可能其實都只係用好少份量,真係唔想為咗用少少又走去買,呢個時候用代替品就最好,試過食譜之後覺得好先再買都未遲,但更重要嘅係,希望學識用唔同嘅食材去代替雞蛋同奶類製品,不但只係因為我唔鍾意奶類製品嘅臊味,食齋日我係連蛋都唔會食㗎!就算唔好話係因為個人問題,用其他天然食材去代替奶類製品某程度上都係有利健康,大家都值得參考一下。

        最近就睇咗唔少關於烘焙包餅時用液體油脂代替固體油脂嘅資料,例如用菜油代替牛油。雖然有好多網頁都有唔同嘅見解,但綜合咗各方面資料,有幾點係比較重要,想同大家分享一下。

2014年6月21日星期六

抹茶紅豆糯米糍

        糯米糍都唔係第一次整喇,不過之前嘅做法係好似整湯丸咁,包好哂餡先放滾水內煮熟。今次呢個就試吓先將粉漿蒸熟之後再包餡,以前成日都形住熟粉糰會好黏手,做起上嚟會好呢 hea,但原來都唔係想像中咁差哦!
 
 

2014年6月19日星期四

陳醋麵包多士 Balsamic Toast

        又試咗另一個特別麵包機食譜喇!真係未見過用 balsamic vinegar 嚟整麵包,原本食譜係無用到任何油脂嘅,不過我自己就加咗初榨橄欖油落去,咁就連油醋汁都慳番,哈哈!!講笑吧,風味完全唔同呢,只係想增加個麵包保濕能力啫!
 
        麵包味道有少少酸味,但比起酸種麵包易入口好多,因為 balsamic vinegar 味道比較醇厚,而且有種特別香味,大家不妨試試。
 

2014年6月12日星期四

甜酸麵筋

         今日係十五食齋,所以噚晚咗呢個甜酸麵筋做餸。
 

2014年6月9日星期一

芝麻雪菜銀魚乾炒飯

        前兩個禮拜去過「誠品」睇書,見到 Masa 有本 brunch 食譜,於是就拎起快手 scan 過全書,當中有兩個食譜都好想試整,其中一個係雪菜、白飯魚芝麻炒飯,真係從來都無諗過用呢幾種材料嚟炒飯呀!

       啱得咁橋,屋企真係有用剩嘅雪菜喎,咁就可以即刻試做。至於白飯魚哩,我就無買到喇,用現有嘅銀魚乾代替啦,之後再發揮自己嘅小宇宙,加入其他副材料同調味去炒飯吧!

 

老黃瓜粟米豬橫脷湯

        呢排天氣又熱又濕,攪到個人就身都唔自在,仲會成日覺得好攰、好眼瞓,所以要飲多碗袪濕湯先得!
 
        炒扁豆、赤小豆煲老黃瓜最啱,不單只可以袪濕,仲可以清熱解暑,加粟米一齊煲的話,記得連埋粟米衣同粟米鬚一齊煲,利水利尿,好過特登走去藥材舖買啦!
 

薑味焦糖雪芳蛋糕 Ginger Caramel Chiffon

        之前咪整咗脆焦糖嘅,跟住咪話明明有時間都用麵包機整麵包,仲同步整多樣嘢嘅,咪就係為咗整呢個雪芳蛋糕囉!
 
 

黑糖蜜黃豆粉麵包 Molasses Kinako Bread

        早前喺圖書館借咗本麵包食譜書,係專門為用麵包機整麵包而寫,而且作者所用嘅麵包機牌子同型號正正就係我用緊嗰部,所以都有啲興趣參考一下佢啲食譜。有好幾個食譜所用嘅食材都好特別,我自己就完全無諗過會用嚟整麵包,所以嚟緊嘅時間都會逐一試做。
 
        用麵包機整麵包,除咗唔使自己出氣出力去搓麵糰之外,最重要係如果完全無時間整麵包的話,可以預校時間自動製作,即使係有充足時間俾我去整,有時我都會照樣假手於 ,因為騰空出嘅時間我可以做其他嘢嘛,同步製作兩樣嘢,合乎經濟效益哦!噚日我就實踐咗呢個理念喇!
 

2014年6月8日星期日

麥芽糖清貨第三擊

         用剩少少麥芽糖,繼續努力清貨!!今次用嚟整脆焦糖。
 

番茄雜菜燜排骨

        煮呢個餸都係完全為咗清貨,包括:整完 muffin 用剩嘅南瓜;之前煮肉骨茶時買多咗放冰格嘅一字排;供完佛嘅蘋果;以及上次整番茄全麥麵包用剩嘅罐頭番茄同茄膏,你話呢個係咪一個 環保菜式呢,哈哈!!
 

2014年6月4日星期三

涼瓜兩食

        每年一踏入夏天,有幾種瓜我都必定會食,包括青瓜、老黃瓜、苦瓜同絲瓜,而當中嘅苦瓜,我由細個已經開始鍾意食,係咪好少見呢?
  
       記得好耐以前媽咪同老竇返鄉下時,姨媽一家同佢哋去酒樓食飯,媽咪話食過一道菜叫炒涼瓜皮,非常好食,好爽口,因為只係將苦瓜最外層凹凸表面切落嚟快炒,所以特別爽脆。呢件事我記到今時今日,之前其實都好想煮,但係諗吓都要買好幾個苦瓜先可以湊夠一碟餸,都幾煩,所以一直都無煮。 
 
 

2014年6月3日星期二

放肆的一天

        日紅假唔使教琴,難得一日唔使做嘢兼決定唔煮飯,一於瞓餐飽,瞓到夠為止!

       無落街買餸都唔緊要,因為屋企有好多嘢食等我慢慢去 發掘 瞓到成點鐘先起身,第一餐可以唔使食喇,至於第二餐,不嬲都好簡單、好求其,有老表嘅自家製麵包、車厘茄同蒸番薯,加埋杯鴛鴦就攪掂一餐晏喇!至於第三餐哩 ………
 

 
 

2014年6月2日星期一

夏天的西南風

        成日都話,如果再買樓或搬屋的話,一定、一定、一定、一 ~~~~ ~~~~ 唔會再住西斜樓,住足三十年,真係住到驚,嗰種熱法真係唔係人咁品,加上我家係勁開揚,完全無遮無擋,真係曬到爆,夜晚十一、二點摸落幅牆度都仲係暖㗎!所以新屋嗰邊見係東南先敢買,但原來朝早十二點前都係好甘,就算未瞓醒都一定會熱醒,加上又係無遮無擋咁望住個海,不單只無景好睇,仲將陽光反射番哂入屋,一樣咁熱,所以望海樓都係唔好再買
 
        話雖如此,香港嘅夏季多數都係吹西南風,所以屋企無遮無擋都有一定好處,勁通風涼爽,晾衫唔使兩個鐘就已經乾哂收得!唔好話唔使開冷氣,就連風扇我都好少開,呢幾日咁熱夜晚瞓覺我都唔使開風扇,有時天濛光時份仲會涼到要冚被,所以真係慳番唔少電費㗎!翻查紀錄,我已經好耐無交過電費喇,對上一次交電費已經係 2012 9 月份嘅事喇,近呢一年「中電」仲話我達到某個慳電指標,又再額外扣多某個 percentage 電費以作鼓勵㖭!你哋咪以為我真係為咗錢慳成咁呀,只係因為有政府補貼 $300 先會咁,其實每兩個月都要交二百零蚊電費,但都仲係用唔哂全部補貼,之後又再帶落下一期,咁咪所以攪到咁耐都唔使交電費囉!不過呢枝歌都就快無得唱 lu,因為財爺已經宣布咗唔會再有電費補貼,撞啱呢排收入又大減,死未!!
 
 

多謝老表的心意

        一直以嚟,每逢齋期、佛誕、觀音誕,以及初一、十五都會同媽咪一齊食齋,所以中國傳統四大節日之中,已經有兩個節日會食齋,但估唔到七年前開始連端午節都變成食齋日,因為七年前嘅今日,應該係我成世人之中最黑暗、最低潮的一日!雖然我嘅人生都仲未走完,但係應該都再無乜嘢可以對我做成咁大打擊、咁大嘅折磨!!以前一直都好介意事業不順,收入減少之類嘅問題,但近排開始出現入不敷支嘅情況,理應會有個天冧落嚟嘅感覺,但居然出奇地無乜太大感覺,氣定神閒咁慢慢搵工、諗辦法,所以經歷過七年前嘅今日,我估都再無乜嘢可以推到我落低谷深淵,反正呢七年嚟都係靠自己一個人撐落去、捱過去!
 
        禮拜六嗰日突然收到 Lily 嘅電話,打嚟問我關於整麵包同 biscotti 嘅嘢,心諗,呢隻懶鬼卒之都肯的起心肝去做阿茂喇!到禮拜日佢入嚟上堂學琴時,原來佢帶埋啲傑作入嚟,話要孝敬姑姑喎!佢自己都話,其實佢都唔多願整㗎,如果唔係因為知道跟住第二日係端午節的話,都唔會咁有心去整包餅,仲話完完全全係為咗姑姑而 出山㗎!
 

冰涼甜點

        一係就落雨落唔停,一係就熱到爆,仲一直維持酷熱天氣警告㖭,想點呀!!
 
        唔好話食涼拌菜,連甜品都要透心涼呀!所以就整咗日式水羊羹。
 

2014年6月1日星期日

焦糖南瓜鬆餅 Caramel Pumpkin Muffin

        之前整好嘅焦糖醬,除咗可以當麵包、蛋糕抹醬之外,仲可以用嚟代替部份糖去整西點,成品多份焦糖香甜味哩!