2014年6月9日星期一

芝麻雪菜銀魚乾炒飯

        前兩個禮拜去過「誠品」睇書,見到 Masa 有本 brunch 食譜,於是就拎起快手 scan 過全書,當中有兩個食譜都好想試整,其中一個係雪菜、白飯魚芝麻炒飯,真係從來都無諗過用呢幾種材料嚟炒飯呀!

       啱得咁橋,屋企真係有用剩嘅雪菜喎,咁就可以即刻試做。至於白飯魚哩,我就無買到喇,用現有嘅銀魚乾代替啦,之後再發揮自己嘅小宇宙,加入其他副材料同調味去炒飯吧!

 

材料:
雪菜
銀魚乾
白芝麻
雞蛋
乾蔥頭
蒜蓉
薑蓉

蔥花

調味料:
味醂
日式料理酒
魚露
 
- 雪菜先用清水浸約 15 分鐘,洗乾淨後切碎,用糖略醃。

- 銀魚乾略沖洗,之後用抹手紙索乾水份;芝麻放篩內洗淨,瀝乾水備用。

- 雞蛋拂打成蛋液,加入少許味醂及料理酒;乾蔥頭去衣後切碎。

- 燒熱鑊,芝麻用白鑊炒至乾身及香味出,盛起;銀魚乾同樣略為炒乾。

- 加入適量油燒熱,倒入部份蛋液炒成蛋碎,盛起;雪菜落鑊兜炒爆香,盛起。

- 再燒熱適量油後轉慢火,將剩餘蛋液倒入後立即將飯落鑊,快手兜炒至飯粒沾上蛋液。

- 當飯炒熱至乾身後,加入蒜蓉、薑蓉及乾蔥蓉兜勻。

- 雪菜、蛋碎及銀魚乾回鑊,兜炒片刻,加糖及魚露調味。
 
- 最後加入炒香芝麻及蔥花,兜炒均勻就可以上碟。


估唔到雪菜、銀魚乾同魚露味道咁夾,鹹鮮味
好突出,加埋芝麻同香辛料就香上加香!





炒飯內有咁多料,唔使要其他餸都得喇!




Notes
-
味醂同料理酒分別代替糖同鹽嚟用,加入蛋液內就唔怕唔會溶及攪拌唔均勻。

- 如果你都係好似我咁用較少油炒飯的話,其實會比較容易黐底,所以當發覺有黐鑊情況出
  現時,就沿鑊邊灒酒,由於酒精比較易揮發,所以唔會好似落水咁出現糊化作用而變得更
  加黐鑊,相反,灒酒後會越炒越唔黐,連原本已經黐鑊的飯焦都會炒炒吓都消失埋!

- 炒飯唔一定要用隔夜冷飯,用即日煮好嘅飯嚟炒都可以,秘訣係煮飯時要刻意比正常落少
  啲水,令到煮熟嘅飯可以變得相對乾身,咁就唔使放入雪櫃隔夜抽乾水份都可以炒到粒粒
  乾身嘅飯粒。
 



16 則留言:

  1. 明白, 下次炒飯要落酒了。^^

    回覆刪除
    回覆
    1. 試試啦,幾好用,不過如果妳落夠油的話就唔使用呢招喇!

      刪除
  2. 好創意喎,唔使次次都义燒疍炒飯呀!

    回覆刪除
    回覆
    1. 哈哈,我之前炒嚫飯多數都係呢兩樣材料,嘻嘻!

      刪除
  3. 回覆
    1. 最主要係煮飯時我落少好多水呢!

      刪除
  4. 炒飯同炒粉最好,自己落咩配料都得^^
    你個少油秘訣好啱用,下次試下先~~

    回覆刪除
    回覆
    1. 係呀,亨飪做好玩就係可以自我變化,創造出自己喜愛嘅味道。

      妳下次炒飯都不妨試吓呢個方法啦,健康啲呀!

      刪除
  5. 謝謝分享呀!啱啱買咗白飯魚,可以試吓炒飯呀!

    回覆刪除
    回覆
    1. 唔使客氣!

      但如果妳用新鮮白飯魚整的話,留意水份控制哦!

      刪除
  6. 炒飯的另一選擇,多謝分享

    回覆刪除
  7. 其實你有無覺得你好有煮食的天份,你慢慢再練下真的好成功.

    回覆刪除
    回覆
    1. 點會呀!我多數都只係跟人家食譜照做咋喎!

      刪除