紅米 1s

        一直以為身邊得我一個仲未轉用智能手機，但原來都仲有好幾人都同我一樣，有啲甚至仲係用緊 keyboard 機，相比起上嚟，我用 touch screen 都已經唔太 out，哈哈！

 

        依家用緊部手機都開始出問題，無端端會自動轉做離線模式，又或者由路線 1 轉為路線 2，我都唔知發生咩事，淨係知道打唔出又打唔入；有陣時又會無啦啦自動關機；試過有次仲差啲俾部手機累死！如果我要比平時早好多起身的話，除咗校床頭鬧鐘之外，我仲會校埋手機個鬧鐘，保險啲嘛。俾床頭鬧鐘嘈醒之後，當然唔願起身啦，同自己講，瞓到手機鬧鐘都響埋先起身啦，點知一路瞓一路等，等等吓發覺唔多對路，無理由隔咁耐都仲未響，於是起身一睇，原來個手機係有自動開啟到，但入到個 logo 畫面就 hang 咗機，定哂格，好彩我無真係完全瞓著咋，如果唔係就出事喇！到最近發覺兩嚿電池都開始老化，都唔知買唔買新電池好，最怕呢頭買咗新電池，嗰頭就即刻壞機，咁就真係多得佢唔少！
 

        阿馳同 Lily 都知我對手機要求唔高，只要有最基本功能就得，所以佢兩個都建議我買「小米」部紅米手機，因為夠平嘛！於是我都上過官方網站睇資料，發覺唔係隨時隨地上網就買到，原來係要𥄫住佢公佈幾時開賣先可以同其他人一齊搶貨，亦睇到好多網友都話試過幾次都買唔到，見咁啱 24 Jun 首次在港公開賣紅米 1s，於是就登記預約。自己一向都咁黑仔，諗住都唔會買到，純粹只係想實習一吓個購買流程，畢竟我都完全無網上購物嘅經驗，點知又會咁鬼好彩，一擊即中，當堂打個突。其實我都猶疑緊繼唔繼續落去買部機，因為依家真係好積極咁喺度量地同拍烏蠅，會失預算，但啲人又講到咁艱難先買得到，難得我咁好彩又無理由放棄㗎，算啦，買定部機喺度做後備都好，費事依家用緊部機突然間 “certified” 時都無機用。 

 

        有時啲嘢都真係整定㗎，原來手機開賣當日，兩期 iBond 同「中移動」都分別派息，夾埋都有幾千蚊，部新手機咁平，額外買多兩部都唔使入肉哦，呵呵！ ^^ 

 

 

「小米」官方網站介紹，個螢光幕係同「Sharp」同廠出品。

而相機就係「Samsung」，有 800 萬像素。

 

 
 
 
 

 

$999 包括手機、電池、充電器及一條 cable，「小米」指定物流公司

係「順豐」，高過 $150 就免費送到上門，可惜我接唔到佢哋

電話，攪到要去分店取貨，好彩「順豐」最近喺我新屋

個商場度開咗新舖，行過去拎都好方便。最正

係個紙盒，硬到好似木板咁，就算啲物流

人員唔同你錫住件貨都唔使驚！

 

 

 

 

 

我最怕就係轉手機，不單只要將舊機資料轉移，又要重新適應

過個操作系統，超煩，我對住部機都唔知點好，整整吓仲

悶到瞓著咗㖭！！淨係最基本個時間都未知點調校，

你睇吓顯示出嚟嘅日期仲係我嘅上一世就知啦！

 

 

 

 

 

 

喺 Facebook 專頁度見到官方公佈，話兩分半鐘內沽清哂

10,000 部手機，真係超癲！！佢哋呢個銷售手法

真係成功，而且又唔使舖租、又唔使俾錢賣廣

告，難怪早前《財經透視》都採訪佢哋！

 

 

 

 

 

  

需要充足安全感嘅我，一直都唔敢喺網上買嘢，但呢次

就無得揀，硬著頭皮都要，好彩都算服務周到，

只要 login 番入個登記戶口，就可以追蹤

住個交易過程，咁都叫做安心啲。