甜酸麵筋

         今日係十五食齋，所以噚晚煮咗呢個甜酸麵筋做餸。

 

材料：
炸麵筋
青椒
番茄
罐頭菠蘿

調味料：
茄膏
茄汁
白醋
冰糖
鹽
菠蘿糖水
鮮醬油

- 麵筋汆水，去除多餘油份，瀝乾水後剪開一半。

- 青椒洗淨後去蒂、去瓤，然後切件；番茄同樣洗淨後去蒂、切件。

- 菠蘿瀝乾後切件，糖水留用。

- 燒熱油，落青椒爆炒，盛起。

- 鑊內加適量水及菠蘿糖水、茄膏、茄汁、白醋同冰糖，煮滾。

- 放入麵筋煮至入味及水份略為收乾。

- 青椒回鑊煮至稍為軟身，之後將番茄同菠蘿落鑊，加少許鹽、糖及鮮醬油調味。

- 兜炒均勻後即可上碟。

 

 

查實呢味餸咪就係齋鹵味裡面個酸齋囉，不過

加埋其他配料一齊煮，感覺豐富好多！

 
 
 
 
 
 

特別煮多一份俾學生 Ryan 個婆婆，因為佢依家病得好嚴重，醫生講明

無得醫，身體機能只剩三成，所以不但心情唔好，連胃口都無，

Ryan 媽咪話婆婆乜都唔想做，講晦氣說話，話喺度等死！

不過就好鍾意食酸甜食物，生炒排骨就經常食，

所以我煮開呢個餸就預埋婆婆一份，

幫佢打打氣啦！

 

 

 

Notes：
- 麵筋勿汆水太耐，只需將表面油份去除即可，否則容易煮得過腍。
 

- 煮麵筋時必須間中翻動兜炒，以免黐底。

 

- 加冰糖煮麵筋，可以令到顏色較有光澤。