芥菜南瓜泡菜

        中國人不嬲都鍾意用芥菜嚟做醃菜，好似雪菜、梅菜同鹹酸菜咁，都係用芥菜醃製而成，原來韓國人一樣都會佢嚟醃泡菜。踏入夏天，街市開始有芥菜賣，我自己都幾鍾意食，特別鍾情佢有點微微甘苦嘅味道，等我都試吓用佢嚟整泡菜先！

 

        買開南瓜煲綠豆沙，順便又試埋用南瓜整泡菜。

 

 

材料：
南瓜
芥菜
京蔥
蔥
粗鹽

醃料：
糯米糊
蒜蓉
薑蓉
魚露
糖
韓國辣椒粉

- 南瓜切去外皮，略沖洗後開邊，去瓤去蒂，然後切件，每件約 1 厘米厚。

- 將粗鹽灑入南瓜件內，拌勻後醃約 1 個鐘至出水。

- 南瓜件過水數次，將多餘鹽份洗走，略榨乾水份。

- 芥菜葉同莖均灑上粗鹽，醃至大量出水，菜莖略為軟身即可。

- 同樣過水數次洗走多餘鹽份，之後榨乾水份、切件。

- 京蔥洗淨後切厚片；蔥洗淨後切段。

- 醃料全部拌勻，加入京蔥片及蔥段，攪拌均勻。

- 將瀝乾水份嘅南瓜同芥菜加水，與醃料拌勻。

- 將泡菜放入容器內，包好保鮮紙後冚蓋，室溫發酵 1 -2 日。

- 發酵好之後放入雪櫃儲存。

近排發現「華潤」超市間中會有京蔥賣，價錢超抵，$5.5

有兩大條，而且仲要係上面深綠色 “掃帚” 部份

已經切走，反正都唔食得，唔使計埋價錢

之餘，拎住返屋企都方便啲。

真係睇見都流哂口水，一路整就一路偷食，哈哈！！

最鍾意見到滿滿一大盒泡菜，又開心、又滿足。

 

 

 

Notes：
- 用日本種南瓜製作泡菜比較適合，因質地比較粉及結實，中國南瓜出水後會較軟身。

- 糯米糊做法，請參閱《自家醃製韓式泡菜》。

 

- 泡菜發酵時間可視乎個人口味而定，發酵時間越長，味道就會越酸。