2011年1月30日星期日

台灣手信 — 鳳梨酥

        又收到禮物喇!今次係中心學生 Ken 送俾我嘅,既係佢去完台灣旅行帶俾我嘅手信,亦係送俾我做新年禮物。



就係台灣特產凰梨酥。


 



中心咁多個學生中,Ken 係彈得最好嘅一個,
亦係最有禮貌、最尊敬我嘅學生。


 



呢隻鳳梨酥都幾好食呀,唔會太甜,最重要係無乜牛油味,好!


長崎蛋糕 Nagasaki Castella

        早排見到 Motonako. A 整長崎蛋糕蜂蜜蛋糕整得咁開心,星期五朝早整完 brownie 之後,見有時間,就試吓整長崎蛋糕,因為貪佢簡單易做又快手,前後都唔駛一個鐘就有得食。



材料:
雞蛋              4隻
低筋麵粉      240克
糖                  240克


以上材料份量可做 10 厘米 X 18 厘米長型蛋糕 3 個。


食譜出自小松本太太嘅《日式和菓子》。



- 麵粉過篩 3 次;雞蛋加糖,用電動打蛋器打至濃稠企身。


- 麵粉篩入蛋漿內,拌勻至無粉粒。


- 將麵糊倒入模內,放入已預熱至 180 °C 嘅焗爐內焗 20 分鐘即成。

 


今次先試做一隻雞蛋嘅份量。可能因為蛋糕本身並無油份,
所以成品比較乾、比較嚡!


 



蛋糕好似 Motonako. A 咁講,有好香濃蛋味。


 


Notes
- 原食譜用嘅糖係三溫糖。


- 個人覺得成品比較甜,可將糖嘅份量稍減。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011團年飯

        噚晚我哋食咗團年飯喇,為咗準備呢餐團年飯,真係由朝做到晚。


        一早起身梳洗過後就落街買餸,返到嚟屋企先食早餐,食食吓就聽到 Lily "叮噹",咁就唯有一邊上堂一邊食喇!上完堂之後就已經開始入廚房郁手整嘢,中間偷幾個字時間食 lunch,之後又繼續過,一路到夜晚九點鐘先至攪掂,咪睇見餸好似普普通通,原來咁都要做足成日喇


        好啦,依家就睇噚晚我哋食咗乜啦,去片!



首先飲碗肉骨茶暖一暖身先啦!


 



呢碟係炒到手都軟嘅臘味糯米飯,阿馳同阿瑩都讚好,夠乾身。


 



第一次整嘅三杯雞,酒味香濃,可惜九層塔味道唔夠,略為遜色。


 



洋蔥煙肉吞拿魚焗薯仔。


 



豉椒味菜炒青口,夠惹味。


 



當然唔少得飯後甜品啦,係我鍾意brownie 呀!


 



Brownie 係星期五返工前整定 o架,今次用咗橄欖油代替牛油溶液,
唔知係咪因為咁嘅關係,餅底比較黏,連用防黏模都黐到好實,
不過 Lily 就話咁樣好食啲,無咁 "漏" 喎。


2011年1月26日星期三

提早的新年禮物

        噚日去咗教 Arthur,幫佢作最後衝刺,因為嚟緊星期六佢要考 theory 呀,希望佢可以成功 pass 到啦!


        去到 Arthur 屋企時,Louisa 仲未走,我哋傾咗一陣間,佢臨出門口前佢送嘢俾我呀!



就係呢對矽膠攪拌匙同膠刮,淺粉藍色,好靚哦!


 



仲有呢盒超大粒士多啤梨,好好食 o架,我已經好耐都無食過咁甜
嘅士多啤梨喇!


 


        教完 Arthur 之後就即刻趕過去 Miss Cheng 屋企教 Aaron,佢同樣都係星期六考 theory,所以一樣係幫佢臨尾衝刺。食完飯、上完堂之後,臨走時 Miss 又送盒朱古力俾我,話我成日咁夜先食飯,等我可以教到中途食少少嘢頂肚喎!



睇見個包裝就覺得好好味喇,係原粒酒浸櫻桃朱古力嚟 o架!


 


        多謝哂 Louisa 同 Miss 提早嘅新年禮物!


2011年1月15日星期六

老少平安

        老少平安一直都係我嘅 "飛佛" 餸菜,自從開始要自己煮飯之後,就覺得呢味餸更加可愛,更加得我心,皆因易整嘛,將鯪魚肉同豆腐撈勻,蒸熟就攪掂喇,最啱就係呢啲咁凍嘅天氣整,不單材料簡單,仲做少好多功夫!



材料:
腍豆腐
鯪魚肉
蔥花


調味料:
生抽

胡椒粉
紹酒


- 豆腐沖水洗淨;鯪魚肉加入調味料拌勻。


- 用叉將豆腐壓爛,加入魚肉混合好,倒入碟內。


- 煲滾水後,將魚肉豆腐隔水蒸熟。


- 灑上蔥花,蒸多一分鐘即成。


- 喺魚肉豆腐面灑上少量生抽即可享用。



非常嫩滑,大人細路都啱食。



Notes
- 可參考《鯪魚肉處理方法》將魚肉調味。


- 蒸好之後先將多餘水份倒走先加生抽,可避免味道被水份減淡。


- 如果鍾意的話,可在灑上蔥花後再灒少少熟油,咁就唔駛再將蔥花蒸熟。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


第一次煲藥

        睇完西醫之後,已經叫做好咗七、八成,但係都未完全清得哂,而且右面肋骨仍然勁痛,夜晚瞓覺轉身都痛醒呀,係時候要去見吓大夫把吓脈喇!


        睇完醫生,醫生除咗話我感冒未清之外,應該因為之前咳得太犀利而扯傷咗右面肋骨位附近嘅神經線,所以攪到咁痛,佢仲問我平時係咪好易痾 o添!真係始終都係中醫把脈掂好多,上次去睇西醫,個醫生問我有咩病癥,之後就開藥。唉,有時病人點講得咁仔細呀,反而中醫一把脈就立即知道內裡乾坤。


        本來我都想喺埋診所度煲埋藥,費事自己煲咁煩嘛,既要睇火,又怕煲乾水煲燶藥,但係夾唔啱時間,之後要趕住返中心教琴,咁就唯有拎返屋企自己煲囉!


        咁大個仔都係第一次煲藥,以前有媽咪幫我煲嘛!呢頭放好哂藥入個藥煲,倒水入去,果頭就發現個煲裂底,一路滴水,可能因為無用得耐啦!於是老豆就即刻落街買過個新藥煲返嚟,點知佢話鋪頭職員教佢浸水一、兩日先好用,咁我咪迫住用過真空煲內鍋嚟煲囉,雖然明知用金屬煲煲藥唔係咁好,但都無辦法啦,下一服藥先至用番藥煲煲囉,用不銹鋼煲煲藥都好過用其他金屬煲嘅!


        原來煲藥比相像中輕鬆得多,好彩醫生話咗俾我聽大約煲一個鐘度就煲好,校好 timer,鐘一響就去斟啲藥。嘩,真係好準,一斟就已經啱好兩碗多少少,咁倒番哂落煲後,加埋幾包後下,煲多三分鐘就攪掂!



前面果碗即刻飲,後面果盅就聽日燉番熱再飲,前後總共
要飲四碗藥。


 


        睇見碗藥,係咪即刻覺得好深色,一定勁苦哩!咁你就估錯喇,呢碗藥居然入口有少少甜,無錯,係甜而唔係甘,所以呢碗應該係我呢世人飲過咁多碗中藥中最易入口嘅一碗,真係小朋友都未必會抗拒呀!


2011年1月12日星期三

觀音素餅

        阿馳同阿瑩早前上咗深圳華僑城玩,順道買咗盒觀音素餅返嚟俾我同老豆。



阿瑩話佢哋係喺當地觀音寺買嘅,我諗應該係盒面印住嘅大華興寺


 



其實都係一般中式酥餅做法,不過個餡就係全齋嘅,有花生、綠豆、
茶葉同杏仁,甜度啱好,唔會太甜,而且
我都幾鍾意食綠豆餡呢!


 



最特別就係個餅盒,除咗印有金色嘅觀音像之外,
仲印埋一篇般若波羅密多心經喺上面 o添!


超感動!!

        由細到大,每年都例必最少講一次:冬天有咩好~~~~~~!!


        每年冬天都係好辛苦咁 "捱" 過:手指、腳趾爆拆,裂到流哂血;手腳冰冷,同雪條無分別;凍到人都懶,朝早就算已經瞓醒,都要成粒鐘後先至 "夾硬" 起身,浪費哂啲時間!


        今年仲慘,病鬼埋 o添!呢個星期超凍不特只,仲咳到甩肺,連聲都失埋!上星期五喺中心教到最後一個學生時,明明 45 分鐘嘅堂,教到變75 分鐘,點解?因為果陣時教琴就好似臨終交帶遺言咁款,講幾隻字就要抖一抖氣,間中仲咳到講唔到嘢 o添!成堂大部份時間都係要嚟抖氣,咁你話我點夠膽準時落堂呢,如果唔係,一陣間個學生仲以為我呃鐘 o添呀!!


        睇完醫生,食咗藥都係照咳,越夜就越咳得犀利,瞓著覺都可以咳醒,問你服未!唔係講笑,真係咳到個身側邊啲肌肉都勁痛,睇嚟都就快咳到有六嚿腹肌 o架啦!


        做咗十幾年嘢都好少請假,就算病都會死撐,請假日子真係五隻手指數得哂,今次都唔例外,照教可也!返到老人中心照教唱歌,班學生仲講笑咁話:「今日我哋可以 "蝦" 阿 sir 喇!」中心姑娘 Helen 入到嚟,其中一位學生就即刻叫佢俾個咪我用,唔駛我講咁大聲, Helen 見到我失聲,就即刻去沖杯暖嘅蜜糖水俾我飲;下晝返到社區中心,經理見我咁嚴重,重即刻拎出佢嘅私伙羅漢果枇杷膏俾我沖水飲,其他同事睇到都 "眼紅" 呀!!呢兩杯 "特飲" 令到我好感動,簡直係雪中送炭!雖然只係小小一杯普通不過嘅蜜糖同枇杷膏,但背後嘅心意卻無比偉大!


        星期日打電話俾 Louisa,話俾佢聽我唔舒服兼失聲,想俾把聲休息吓,所以星期二唔過去同 Arthur 上堂。到咗夜晚,Arthur 同 Genevieve 都分別 send SMS 俾我、問候我,我一睇見真係心都甜哂,依家真係好少學生會咁做 o架喇!尤其係 Arthur,由於佢係讀國際學校嘅關係,所以嬲中文都唔係太好,但今次佢仲專登用中文字 send SMS 俾我,我真係好感動呀!


        希望呢個冬天快啲過去啦!


2011年1月8日星期六

新年見面禮 — 字母小蛋糕

        約好咗聽日上去 Miss Cheng 屋企同 Aaron 上堂,之後 Winnie 都會上埋嚟,一齊新年 gathering。話哂都係今年第一次同 Miss 見面,整兩袋字母小蛋糕送俾 Aaron 兩兄弟,吓佢哋開心啦!



今次用咗白朱古力寫字。不過因為天氣太凍,啲朱古力話咁快就凝固,
攪到我寫得幾劃又要拎番入微波爐度熱溶,走來走去,煩死人!


 



咗香蕉蛋糕,我仲整咗朱古力蛋糕 o添!


 



蛋糕仔分兩袋入好,Aaron 同 Bill 一人一袋,到時如果佢
砌唔番自己個名就無得食,呵呵!


2011 新年伴手禮 — 雙籽燕麥朱古力曲奇

        上次整過一次蛋糕返去俾中心班同事食之後,佢哋成日都問我幾時再整,連經理都係咁!好啦,趁住新一年,就整曲奇星期四果日帶返去做伴手禮送俾哋啦!



今次好有心機,每位同事都寫隻字俾佢。


 



前一日預先 cut 好紙仔。


 



之後寫上字句。


 



星期四果朝起身就整曲奇。都係整番燕麥朱古力曲奇
不過今次就加多咗南瓜籽同葵花籽。


 



焗好出爐,攤凍。


 



每袋兩塊包裝好,之後用封口機封好。


 



將每袋曲奇再放入靚靚包裝袋內,放埋紙仔入去就攪掂喇!


 


        佢哋個個收到都好開心,唔怪得之媽咪成日都話,如果洗少少錢或做少少嘢就可以令到人開心,咁就何樂而不為呢!


2011年1月4日星期二

2011 新年派對

        噚日約埋明仔、Winnie 一齊上去 Louisa 度開 party,原本 Li Kien 都話去 o架,點知最終又係放飛機甩底!



今次我哋都帶咗好多禮物上去,睇見都好似聖誕重臨咁款!


 



話咁快,Louisa 就已經將所有禮物拆哂喇!


 



認得嘛,呢份咪係我 o架囉!


 



明仔買嘅香薰座。


 



Winnie 買cake stand,一物三用 o架!


 



呢個咁靚嘅禮盒係 Winnie 送俾 Louisa 嘅什錦曲奇,我之前幫 Winnie 整
嘅送禮曲奇咪就係呢盒囉!經佢包裝後即刻變得好有睇頭。


 



食完 lunch 之後就開工整餅喇,首先就係整竹炭黑芝麻瑞士卷。


 



吓個成品幾靚,仲好好味 o添!


 



跟住就到我、Winnie 同明仔三個整咖啡瑞士卷。整好之後,我
三條友仔都唔夠膽捲,驚捲爛嘛,所以最後都係由大師出馬!


 



你睇,一樣咁靚 o架,咖啡味仲好香濃 o添!


 



Ladies & gentlemen, it's the dinner time!


 



煙肉煮青口。


 



我整芥末火腿麥穗包


 



煎鴨肝法包伴沙律菜。


 



Louisa 專登喺北海盜買返嘅長腳蟹。


 



白汁煙肉長通粉。


 



呢個飯後甜品就精彩囉,係明仔整嘅焦糖燉蛋朱古力慕斯蛋糕。


 



個蛋糕真係正到無朋友呀!啲朱古力香濃到呢 …………  
明仔真係好心機,淨係個古古力波波都整咗成粒鐘呀!


 


        大家盡興之後,就要冒住嚴寒歸家喇!