由細到大，每年都例必最少講一次：冬天有咩好~~~~~~！！
每年冬天都係好辛苦咁 "捱" 過：手指、腳趾爆拆，裂到流哂血；手腳冰冷，同雪條無分別；凍到人都懶，朝早就算已經瞓醒，都要成粒鐘後先至 "夾硬" 起身，浪費哂啲時間！
今年仲慘，病鬼埋 o添！呢個星期超凍不特只，仲咳到甩肺，連聲都失埋！
睇完醫生，食咗藥都係照咳，越夜就越咳得犀利，瞓著覺都可以咳醒，問你服未！唔係講笑，真係咳到個身側邊啲肌肉都勁痛，睇嚟都就快咳到有六嚿腹肌 o架啦！
做咗十幾年嘢都好少請假，就算病都會死撐，請假日子真係五隻手指數得哂，今次都唔例外，照教可也！返到老人中心照教唱歌，班學生仲講笑咁話：「今日我哋可以 "蝦" 阿 sir 喇！」中心姑娘 Helen 入到嚟，其中一位學生就即刻叫佢俾個咪我用，唔駛我講咁大聲， Helen 見到我失聲，就即刻去沖杯暖嘅蜜糖水俾我飲；下晝返到社區中心，經理見我咁嚴重，重即刻拎出佢嘅私伙羅漢果枇杷膏俾我沖水飲，其他同事睇到都 "眼紅" 呀！！呢兩杯 "特飲" 令到我好感動，簡直係雪中送炭！雖然只係小小一杯普通不過嘅蜜糖同枇杷膏，但背後嘅心意卻無比偉大！
星期日打電話俾 Louisa，話俾佢聽我唔舒服兼失聲，想俾把聲休息吓，所以星期二唔過去同 Arthur 上堂。到咗夜晚，Arthur 同 Genevieve 都分別 send 咗 SMS 俾我、問候我，我一睇見真係心都甜哂，依家真係好少學生會咁做 o架喇！尤其係 Arthur，由於佢係讀國際學校嘅關係，所以不嬲中文都唔係太好，但今次佢仲專登用中文字 send SMS 俾我，我真係好感動呀！
希望呢個冬天快啲過去啦！
開唔倒聲.....可試用龍利葉冲氷飲.....好有效。 咳就最麻煩.....建議出外一定要帶頸巾, 保持頸部溫暖好緊要！飲蜜糖水可能更嘢痰....多飲熱開水OK架喇！試吓煲川貝飲吖.... 我呢邊仲 C 呀......噚日零度....今日得四度....我都有想死嘅感覺呀！出外冇條頸巾真係唔掂架！
回覆刪除[版主回覆01/12/2011 18:26:00] 龍 脷葉係用新鮮定乾品呢？要煲幾耐呀？ 頸巾已經係我冬天外出必備 o架啦！ 係啦，好多朋友都叫我飲蜜糖，但我都係飲過一次咁大把，咪就係怕惹痰囉！我今日用雪梨、瘦肉、沙參、無花果煲湯，原本都 諗住落川貝 o架，但係原來屋企無喎。咁鬼凍，得果幾度，都費事專登落街買囉，一陣間落街又試凍嚫就大鑊喇！ 妳都覺得想死呢，真係都唔知仲要捱多幾耐 o添呀！
咳吾係講笑, 藥就更加吾講得少, 我個人覺得西藥醫咳真係麻麻地.
回覆刪除[版主回覆01/12/2011 18:28:00] 妳無講錯，今日 啲藥 就快食完，都依然係咁咳，死得喇！
有冇去睇醫生呀...你除左飲止咳野..仲可以買返d川貝,煮飯放係飯面蒸左黎連飯一齊食...止咳都好有效....
回覆刪除平時做下運動提升下體能先得家....咁弱不禁風..點行走漿糊呀..
[版主回覆01/12/2011 18:33:00] 本來我今日都 諗住用川貝煲湯，但係原來屋企無喎，天氣咁鬼凍，得果幾度，都唔想專登落街買川貝，一陣間落街又試凍嚫就仲大鑊喇！……就咁蒸 嚟食！？唔係呀嘩，苦到阿媽都唔認得 o架喎！！ 我出 嚟行走 "漿糊" 都已經十幾廿年啦，一直都好少病到咁厲害，真係十年都唔逢一潤呀！
祝您快點好番. 近來的天氣真的好凍, 好容易病. 多多保重.
回覆刪除[版主回覆01/16/2011 00:26:00] 多謝妳關心呀！ 唔係講笑，真係凍到震 o架，我住屯門，仲對住個海，真係凍到發瘟呀！
龍 脷葉係乾架......好似冲茶葉咁焗吓就飲得架喇！
回覆刪除[版主回覆01/17/2011 20:12:00] 咁方便？又幾好喎！