芥末火腿麥穗包 Mustard & Ham Wheatear Bread

        雖然 Louisa 搬咗入新居已經一段時間，而我亦去過好多次，但係 Winnie、明仔同 Li Kien 佢哋幾個就未去過，所以聽日就約埋哂一齊上去 Louisa 屋企開 party。

        由於要預備多人嘅食物，而 Louisa 又去咗旅行，要今晚凌晨先返到，無時間預備定食物，所以我同明仔就幫手預先喺屋企整定小小食物，到時帶過去。由於明仔負責整蛋糕，咁我就整麵包同一個小食啦！呢個麥穗麵包係參考咗《自家製麵包》裡面兩款麵包而做成，外形吸引之餘，味道仲好特別㖭！

 

材料：
高筋麵粉          130 克
低筋麵粉          50 克
即用酵母          2.5 克
鹽                     2 克
溫水                 100 克
火腿                 2 片
英式芥末          適量
芥末籽醬          適量
香草蒜蓉醬      適量
乾羅勒             適量

- 將所有粉類材料、酵母同鹽倒入食物處理器內混合，加水搓成光滑麵糰。

- 拎出麵糰，喺枱面搓揉及摔打至起筋。

- 將麵糰滾圓，黏緊收口後放喺已灑粉嘅兜內，用保鮮紙冚好，發酵 45 分鐘。

- 當第一次發酵完成後，將麵糰排氣，然後分割成兩份並滾圓，冚上保鮮紙鬆弛
  10 分鐘。

- 與此同時，將適量嘅英式芥末同芥末籽醬混合好，備用。

 

 

 

- 之後用擀麵棍將麵糰擀平成長方形，薄薄搽上一層芥末醬，再放上一片火腿。

- 將麵皮連火腿捲成長條狀，捏緊收口及頭尾兩端，放上已鋪防黐蓆嘅烤盤上，冚
  上保鮮紙作最後發酵。
 

- 當麵糰發酵到大約兩倍大時，用較剪斜剪開口，但唔好剪斷，之後將麵糰左右攤
  開成麥穗狀。

 

- 麵糰表面噴水後，放入已預熱至 200 °C 嘅焗爐內焗 20 - 25 分鐘。

- 拎出麵包，趁熱喺開口位置上搽上蒜蓉醬並灑上羅勒，立即放番入焗爐內用餘溫
  焗多 5 分鐘即可享用。

 

 

原本左右分開得好好，點知一入爐焗遇熱膨脹就走番哂原位咁滯！

 

 
 
 

麵包外脆內軟，加上芥末及火腿，味道一流呀！

 

 

 

 

蒜蓉醬同羅勒亦為麵包帶來另一份香味。

Notes：
- 麵皮盡量擀薄少少，捲起時會比較容易。

- 芥末醬可加少量糖混合，味道會更加好。

- 蒜蓉醬可用牛油代替。