2011團年飯

        噚晚我哋食咗團年飯喇，為咗準備呢餐團年飯，真係由朝做到晚。

        一早起身梳洗過後就落街買餸，返到嚟屋企先食早餐，食食吓就聽到 Lily 嘅 "叮噹"，咁就唯有一邊上堂一邊食喇！上完堂之後就已經開始入廚房郁手整嘢，中間偷幾個字時間食 lunch，之後又繼續過，一路到夜晚九點鐘先至攪掂，咪睇見啲餸好似普普通通，原來咁都要做足成日喇！

        好啦，依家就睇吓噚晚我哋食咗乜啦，去片！

首先飲碗肉骨茶暖一暖身先啦！

 

呢碟係炒到手都軟嘅臘味糯米飯，阿馳同阿瑩都讚好，夠乾身。

 

第一次整嘅三杯雞，酒味香濃，可惜九層塔味道唔夠，略為遜色。

 

洋蔥煙肉吞拿魚焗薯仔。

 

豉椒味菜炒青口，夠惹味。

 

當然唔少得飯後甜品啦，係我鍾意嘅 brownie 呀！

 

Brownie 係星期五返工前整定 o架，今次用咗橄欖油代替牛油溶液，
唔知係咪因為咁嘅關係，餅底比較黏，連用防黏模都黐到好實，
不過 Lily 就話咁樣好食啲，無咁 "漏" 喎。