黑芝麻素班戟配藍莓糖漿 Black Sesame Vegan Pancake with Blueberry Syrup

        先講句題外話先，回應番之前篇《突如其來的消息》。正話返工前經過「樹記」，真係無做喇，拉哂閘兼掛個牌出嚟寫住「貨品賣清 停止營業」！ 

 

        好，講番今日嘅嘢喇！因為我一向都唔鍾意食奶類製品，而且我亦有食全素嘅時候，所以我都經常會瀏覽一啲 food substitution 或者 vegan recipe 嘅網頁。最近，我喺 YouTube 度搵到一個日本型仔廚師嘅頻道  Peaceful Cuisine，佢專係教整 vegan food，所謂 vegan food 即係純素食品，唔單只唔用肉類食材，連奶類製品及雞蛋都唔會用，甚至連精製糖、蜂蜜及麩質麵粉都一樣唔會用，因為呢幾樣食材都係唔啱對食物敏感嘅人食，我之前成日提到嘅《不使用砂糖的自然派 sweet 甜點》都係屬於 vegan recipe。 

 

        今日係初一，最啱時候去試整吓型仔廚師嘅食譜，我先揀咗個比較易整嘅 vegan pancake，佢原本係用蕎麥粉，我自己就改用低筋粉加全麥粉；再用黑芝麻鈣思寶代替無糖豆漿。跟住再試埋好耐之前睇過 Nigella Lawson 教整嘅 homemade blueberry syrup，呢次就用咗金黃糖漿代替楓糖漿。

 

 

突如其來的消息

        我呢啲咁晏先瞓醒起身嘅人，平時都無乜可能拎到《頭條日報》，咁啱噚日三、四點鐘去到 Miss 屋企，見到仲有最後一份，拎上手一睇，個頭版就係話「樹記」老闆兩兄弟傾唔掂數，索性將間已有 60 年歷史嘅老舖執咗佢，一拍兩散咁話，最快 5 月 1 號摺埋。反正都已經喺旺角、深水埗區，咁梗係順便走過去入埋貨啦，早幾日先應承咗 Ernest 媽咪話幫佢買嘢！

 

 

又去「缸瓦佬」入貨

        我一個星期只會煮三至四餐飯，每餐份量都係 double 上，一半即食，一半留隔夜，到收工夜返無時間煮飯時都有啖好食嘛。雖然好多人都會覺得食隔夜飯餸無益，但鬼唔知阿媽係女人咩，有邊個唔知新鮮熱辣整好嘅飯餸好食好多喎，夜返都已經夠哂攰兼無時間煮，我總唔信食隔夜飯餸會差得過食罐頭同街外垃圾食物囉！！

 

        要留飯餸，自然會用到好多碗碟同食物盒，有時又要用嚟裝起啲未處理嘅食材，整整吓啲碗碟都唔夠用。早幾日去屋企附近商場間家品店睇過，原來一隻中 size 嘅碟都唔平，閒閒哋都要三、四十蚊隻，而且啲花都唔係咁靚，好鬼死 “娘”！咁啱「AEON」又做會員九折，即刻走去「Living Plaza」度睇，點知原來係無呢個 size 嘅碟賣，真係激鬼死，無平碟買！

 

        咁啱噚日出開旺角，突然醒起 blog 友 Moonmoon 話「缸瓦佬」搬返去旺角，但我又唔記得咗個地址喎，好彩行吓行吓，終於都俾我喺洗衣街搵番佢！

 

素雞雜菜米紙卷

        食完星馬嘅肉骨菜，轉過頭就飛到越南食米紙卷喇！

 

 

肉骨茶

        啲嘢擺得耐真係好容易會唔記得咗，尤其我有老人癡呆㖭！啲肉骨茶包都唔知幾耐無見過光喇，趁呢幾日氣溫稍稍回落即刻煲，如果唔係，又係得個放字，都唔知幾時先煲！

 

 

買到筍嘢

        做完阿茂，食過包、飲完咖啡之後，就去咗「AEON」超市入貨，因為紅假呢幾日又做會員九折優惠呀！

 

        次次做會員特價時，最鬼憎就係喺番屯門店買嘢，真係幾乎買乜無乜，好多貨架都係 “吉” 嘅，以為淨係我先至會咁黑仔啦，但其實一路行都不斷聽到其他人話：「唔係嘛，賣到無哂！」喺銅鑼灣店都好少會咁，樣樣想買嘅都買得到。所以其實今晚都唔係有太多收鑊！

 

 

老表學整包

         老表都準備加入 “阿茂” 行列喇，因為 Winnie 將部舊麵包機讓咗俾佢。咁今日就順便約埋 Winnie 過嚟一齊整包。

 

 

韓式炸雞伴甜酸辣醬 Yangnyeom Tongdak

        雖然《來自星星的你》一早已經播完哂，但係我都係直到近排先有時間開始睇，噚日先啱啱睇完第六集。雖然我只係睇咗 1/3 度，但就發覺套劇情緒起伏好大，初初睇第一集時仲以為呢套係攪笑劇，之後就發覺原來都好多感性位，可能我份人都比較情緒化啩，每次睇嚫個心情都好似坐過山車咁，一陣間笑到拍哂枱，轉過頭又會喊！噚日睇第六集時真係超有感覺，因為朝鮮時代嘅千頌伊做咗我嘅代言人，代我發言！

 

        你話啲韓國人無整容，真係打吓問吓都唔信，同以前啲祖先都完全唔同哂樣，跟日本人一樣，變到眼大鼻高鼻尖瓜子臉，連男仔都係咁，真係靚好多！金秀賢其實都唔算得靚，不過就笑容親切，仲有我最 like 嘅單眼皮。朴海鎮同飾演劉世美個警察阿哥吳尚鎮，個樣就真係靚到完全認唔出係韓國人囉！講開朴海鎮，最近先上 Youtube 睇番上個月尾湖南衛視請朴海鎮做嘉賓嗰集《快樂大本營》，主持人何炅爆料原來輝京一角原本係另一個演員做，朴海鎮係做載經 (節目中都有播佢載經個做形)，但因為後來做輝京嗰位演員有事退出劇組，之後就改由朴海鎮做輝京，而載經就由申成祿出演。之前女主持謝娜亦曾經提及過載經一角，但其他人都好似無乜反應，何炅即刻回應話，講載經係無人知，講 "轉戒子" 就係人都知邊個！哈，果然大家即刻有反應！有興趣的話，可以睇番嗰集《快樂大本營》，仲有其他朴海鎮爆料，以及即場整韓式烤肉同考佢演技，朴海鎮超入戲哦！

 

        套劇除咗爆紅咗三個演員之外，仲爆紅埋炸雞啤酒呢！上次整泡菜薯仔煮鯖魚時，突然想起 Maangchi 姨之前都有教過點整韓式炸雞，咁噚日反正都炸開 doughnut 喇，咁就跟手整埋個炸雞試試先！
 

 

試做 doughnut

        以前未識整麵包嗰陣，去麵包店買麵包時，間中都會買個朱古力 doughnut 食，不過有時會食到好油，嚴重的話重會即係去痾，所以都唔會經常食。

 

       記得好耐之前跟 Louisa 一齊整過一次，非常好食，除咗係因為新鮮即整即食之外，個 texture 都好唔同，而且完全唔會有油膩感覺，比起街賣嗰啲清爽好多，所以我都決定點都要自己試吓整一次！

 

 

向好方面諗真係有用咩！？

        一直以來，呢個世界幾乎都係小數服從多數，一但你係小眾而又唔認同大眾的話，你就係唔啱，你就係有問題，你就係唔正常，你就係反叛！

        咁好彩，我喺好多方面都係跌入小眾群內，無論人生、思想、興趣、健康等等，真係五隻手指都數唔哂！我雖然朋友唔多，但我知道身邊大多數嘅朋友都認為我思想唔夠健康、唔夠積極、負面、負能量 …… 一大堆形容詞，久而久之，我都聽到慣哂，無乜感覺。但係其實我都想講，點解唔可以面對現實，硬係要逃避現實呢？

西式味道

        每次食西式冷盤、沙律，甚至係三文治，都總會食到一種好特別嘅味道，但又總係講唔出係乜嘢味道，直到早排去 ”隧道” 買三文治食，終於都知道嗰種係咩味道喇！

        若果大家有買過佢哋嘅三文治食的話，都會知道自己可以揀好多配料，多到有點煩呢！其中一樣配料就係酸菜，當中醃過嘅洋蔥或乾蔥頭，原來就係我一直想知道嘅味道來源，由於中菜好少會用到生洋蔥，所以我對呢隻味道好陌生！

南瓜番薯綠豆湯水

        由細到大，我都係比較鍾意食綠豆沙多過紅豆沙，覺得個味道較為清淡，無咁濃。噚晚煲嘅綠豆沙就比較玩嘢，加咗南瓜同番薯，仲落埋麥米㖭！

 

 

娘惹阿紮 Nyonya Archar

        嗱嗱嗱，你哋唔好問我咩係阿紮呀，我唔識馬拉文，我都唔知點解，淨係知道好好食㗎咋！

 

        好耐之前 Ernest 媽咪整過一次俾我食，味道超正，酸酸辣辣好開胃，最啱天熱無乜胃口時食。最近打開本娘惹食譜搵靈感時，原來有呢個阿紮食譜，即刻整！

 

 

懶得就懶

        自從買咗麵包機之後，真係懶得就懶，反正我對食都唔係太講究，所以少咗整包放入爐焗，預校時間等部機整嚿多士出嚟填飽個肚就算！

 

        睇番隨機附送嘅食譜，原來如果由搓麵糰、發酵到烤焗，全程都用機整的話，最好就係跟足隨機食譜材料份量，否則會有失敗情況出現。最近就跟食譜試整咗個米飯麵包。

 

 

 

泡菜薯仔煮鯖魚

       呢個韓國菜式又係跟 Maangchi 姨學嘅，原本佢係一個 camping stew，所以用咗罐頭魚柳同汁嚟煮，但係我又唔係去路營，又唔知邊度會有佢講嗰兩款罐頭賣，所以我就用上急凍鯖魚柳加清雞湯嚟煮，仲正呀！

 

        因為係 for camping 嘅關係，所以做法唔會太複雜，原本做法真係好簡單，一鑊熟攪掂，但係自己喺廚房煮的話，可以做好少少，咁多樣材料都用唔同時間去煮熟、煮腍，一鑊熟的話，肯定有啲會煮過龍或煮得太腍，所以我自己就改咗少少做法及處理步驟。

 

焦糖杏仁猶太麵包 Caramel Almond Bagel

        早排喺圖畫館一次過借咗幾本食譜，一本係上次嗰本鹹蛋糕食譜啦、一本係麵包機食譜、而另一本就係 bagel 食譜。
 
       呢本 bagel 食譜分成兩部份，分鹹同甜兩款味道。鹹嘅我都已經整過幾次，今日就試吓整個甜啦！