焦糖杏仁猶太麵包 Caramel Almond Bagel

        早排喺圖畫館一次過借咗幾本食譜，一本係上次嗰本鹹蛋糕食譜啦、一本係麵包機食譜、而另一本就係 bagel 食譜。
 
       呢本 bagel 食譜分成兩部份，分鹹同甜兩款味道。鹹嘅我都已經整過幾次，今日就試吓整個甜啦！ 

焦糖

材料：
糖            30 克
水            10 毫升

- 將糖及 5 毫升水放小煲內，加熱煮至糖溶並轉變成淺啡色。

- 倒入剩餘 5 毫升水，快手搖勻並立即倒喺入爐防黏蓆上。

- 當焦糖凝固變硬後就切成細塊，備用。

 

麵糰

材料：
高筋麵粉      200 克
即用酵母      3 克
糖                10 克
鹽                 3 克
水                 約 125 毫升
橄欖油          5 克
蛋白             適量
杏仁片          適量

- 將麵粉、酵母、鹽同糖混合，逐少加水搓至起筋。

- 加油搓成糰，之後繼續搓揉及摔打成光滑麵糰。

- 將麵糰平均分割成 3 份，分別滾圓，靜置 10 分鐘。

- 用手壓扁麵糰排氣，然後用擀麵棍擀薄，將焦糖粒排上麵皮上。

- 將麵糰捲起，邊捲邊輕力按壓出空氣，捏緊收口。

- 搓長麵糰至約15 厘米長，將其中一端壓扁，包住麵糰另一端做成圈狀。

- 麵糰放上牛油紙上，發酵約 20 – 30 分鐘。

- 煲滾水，加入適量糖煮至溶解後，將火力調至最低。

- 之後將麵糰連牛油紙放入熱水內煮 30 秒，麵糰向下，紙向上。

- 撕走牛油紙後反轉再煮 30 秒，撈起麵糰瀝乾水份，放上已墊入爐防黏蓆嘅烤盤上。

- 麵糰表面掃上蛋白，撒上杏仁片。

- 放入已預熱至 210 ℃ 嘅焗爐內，焗約 15 – 18 分鐘至表面金黃即成。

- 出爐後移到架上攤凍。 

以上材料份量可做直徑約 12 厘米麵包 3 個或直徑約 6 厘米麵包 8 個。

 

食譜出自藤田千秋嘅《輕食貝果 & 甜點貝果》。
 

   

上次同 Ernest 婆婆一齊整 bagel 時咪話學識咗一個技巧嘅，

就係將麵糰放上獨立牛油紙上發酵呀！之前跟嗰個食譜

無教咁做，每次將麵糰拎起放入熱水時都會變形

兼洩氣，因為始終唔多唔少都黐實張紙，

稍為大力少少就實唔掂，依家可以連

埋張紙一齊搬過去就實無事啦！
始終都係要靠經驗至得。

 

 

 

 

 

 

麵糰包餡都包唔少，但包入焦糖都第一次見！

不過包得唔好，其中有兩個包包啲焦糖

焗溶後流哂出嚟兼焗到燶哂呀！！

 

不過唔緊要，廢物利用，做裝飾啦！

 
 
 

Notes：
- 食譜原本係用蛋液掃面，但我唔想為咗用少少蛋液又開一隻雞蛋，所以解凍咗冰格嘅
  蛋白代替；而搓麵糰用嘅係牛油。

- 用糖水煮麵糰可以令麵糰焗完之後表面變得金黃色兼有光澤，份量比例為每 1 公升水
  加大約 3 湯匙糖。但我又偷懶，煮完焦糖之後唔洗煲，即刻倒熱水入內再上火加熱至
  焦糖溶解，之後就用嚟煮麵糰。

- 若麵糰未焗好但中途杏仁片已經焗到好深色的話，可用錫紙蓋面繼續焗，避免焗燶。