韓式炸雞伴甜酸辣醬 Yangnyeom Tongdak

        雖然《來自星星的你》一早已經播完哂，但係我都係直到近排先有時間開始睇，噚日先啱啱睇完第六集。雖然我只係睇咗 1/3 度，但就發覺套劇情緒起伏好大，初初睇第一集時仲以為呢套係攪笑劇，之後就發覺原來都好多感性位，可能我份人都比較情緒化啩，每次睇嚫個心情都好似坐過山車咁，一陣間笑到拍哂枱，轉過頭又會喊！噚日睇第六集時真係超有感覺，因為朝鮮時代嘅千頌伊做咗我嘅代言人，代我發言！

 

        你話啲韓國人無整容，真係打吓問吓都唔信，同以前啲祖先都完全唔同哂樣，跟日本人一樣，變到眼大鼻高鼻尖瓜子臉，連男仔都係咁，真係靚好多！金秀賢其實都唔算得靚，不過就笑容親切，仲有我最 like 嘅單眼皮。朴海鎮同飾演劉世美個警察阿哥吳尚鎮，個樣就真係靚到完全認唔出係韓國人囉！講開朴海鎮，最近先上 Youtube 睇番上個月尾湖南衛視請朴海鎮做嘉賓嗰集《快樂大本營》，主持人何炅爆料原來輝京一角原本係另一個演員做，朴海鎮係做載經 (節目中都有播佢載經個做形)，但因為後來做輝京嗰位演員有事退出劇組，之後就改由朴海鎮做輝京，而載經就由申成祿出演。之前女主持謝娜亦曾經提及過載經一角，但其他人都好似無乜反應，何炅即刻回應話，講載經係無人知，講 "轉戒子" 就係人都知邊個！哈，果然大家即刻有反應！有興趣的話，可以睇番嗰集《快樂大本營》，仲有其他朴海鎮爆料，以及即場整韓式烤肉同考佢演技，朴海鎮超入戲哦！

 

        套劇除咗爆紅咗三個演員之外，仲爆紅埋炸雞啤酒呢！上次整泡菜薯仔煮鯖魚時，突然想起 Maangchi 姨之前都有教過點整韓式炸雞，咁噚日反正都炸開 doughnut 喇，咁就跟手整埋個炸雞試試先！
 

 

韓式炸雞

材料：
急凍雞下髀

粟粉        1/2 杯
麵粉        1/4 杯
糯米粉    1/4 杯
泡打粉    1 茶匙
雞蛋        1 隻

醃料：
鹽
黑椒

 

- 雞髀解凍後洗乾淨，用抹手紙索乾水份，用醃料醃好備用。

 

- 之後將其餘材料一次過加入雞髀內撈勻。

 

- 燒熱油至 170 – 180 ℃，放入雞髀炸 10 分鐘，盛起。

 

- 將雞髀再回鑊炸約 10 分鐘至表面金黃即可盛起，瀝乾油份。
 

甜酸辣醬

 

材料：
蒜蓉                適量
茄汁                1/3 杯
金黃糖漿         1/3 杯
韓國辣椒醬     1/4 杯
白醋                1 湯匙

 

- 燒熱鑊，爆香蒜蓉。

 

- 將其餘材料加入，煮滾至濃稠即成。

 

 

食譜出自 Maangchi 嘅 Korean Fried Chicken。

 

 

 

 

依家寫 blog 打食譜先至發覺原來我唔記得咗加雞蛋！！不過

唔緊要，個外皮都一樣炸得超脆口哦，難怪千頌伊咁鬼

鍾意食啦！原本 Maangchi 姨個方法係將雞髀放入

辣醬內撈勻，但我怕咁樣會整腍咗個香脆

外皮，所以就將個辣醬分開上。

因為信仰關係，我係滴酒不沾嘅，所以啤酒就欠奉喇，

不過唔緊要，取而代之嘅係 Ernest 爹啲送俾我嘅

台灣「微熱山丘」鮮榨鳳梨汁，超香濃呀！

 

 

 

 

Notes：
- 我用嘅材料跟原食譜有啲唔同，因為手頭上無齊哂咁多樣哦！大家可以睇番個 video
  就知道正式材料與做法。
 

- 雞髀回鑊再炸，可以將之前多餘嘅油份迫出，令到雞肉唔會太油膩之餘，亦會更多香脆。

- Maangchi 姨仲有其他炸雞食譜㗎，大家都可以試試其他做法。