突如其來的消息

        我呢啲咁晏先瞓醒起身嘅人，平時都無乜可能拎到《頭條日報》，咁啱噚日三、四點鐘去到 Miss 屋企，見到仲有最後一份，拎上手一睇，個頭版就係話「樹記」老闆兩兄弟傾唔掂數，索性將間已有 60 年歷史嘅老舖執咗佢，一拍兩散咁話，最快 5 月 1 號摺埋。反正都已經喺旺角、深水埗區，咁梗係順便走過去入埋貨啦，早幾日先應承咗 Ernest 媽咪話幫佢買嘢！

 

 

去到離遠都已經見到條龍，但以依家呢個突發情況，

相比起平時就相對唔算多人，離舖面都

唔係好遠，都應該買到嘢嘅。

 

 

 

 

 

 

之前都聽到有啲人話都已經無乜嘢賣，見到平時擺開

腐皮碎位置空空如也，都心知不妙喇！

 

跟住見到平時買開嘅枝竹都已經沽清。

 

果然，真係乜都無喇，梗係啦，報紙一出，啲人肯定即刻

飛去搶啦！我去得到都差唔多六點半喇，乜都

俾人搶哂，唔怪得之條龍咁短啦！！

 

得番啲枝竹碎賣，都唔平呀，買成 $30 包，真係碎得好 “交關”，

都唔知要嚟做乜，我唔會學人無執輸咁乜鬼都照買。排到

我時，我問職員係咪仲有腐皮賣，因為之前仲見到

有人買到，佢問我要幾多塊，我話要 4 塊，

咁個職員先入去拎 4 塊出嚟俾我咋！

        其實佢唔係完全無貨㗎，入面仲有其他職員做緊嘢，聽過話好似係要留番哂交俾啲食肆。因為我今日又會到大角咀教琴，於是我就問個阿姐今日仲會唔會有貨，佢話無㗎喇，做埋今日就閂門喎！不過陣間教完琴，順路經過都再去𥄫𥄫先！