又去「缸瓦佬」入貨

        我一個星期只會煮三至四餐飯，每餐份量都係 double 上，一半即食，一半留隔夜，到收工夜返無時間煮飯時都有啖好食嘛。雖然好多人都會覺得食隔夜飯餸無益，但鬼唔知阿媽係女人咩，有邊個唔知新鮮熱辣整好嘅飯餸好食好多喎，夜返都已經夠哂攰兼無時間煮，我總唔信食隔夜飯餸會差得過食罐頭同街外垃圾食物囉！！

 

        要留飯餸，自然會用到好多碗碟同食物盒，有時又要用嚟裝起啲未處理嘅食材，整整吓啲碗碟都唔夠用。早幾日去屋企附近商場間家品店睇過，原來一隻中 size 嘅碟都唔平，閒閒哋都要三、四十蚊隻，而且啲花都唔係咁靚，好鬼死 “娘”！咁啱「AEON」又做會員九折，即刻走去「Living Plaza」度睇，點知原來係無呢個 size 嘅碟賣，真係激鬼死，無平碟買！

 

        咁啱噚日出開旺角，突然醒起 blog 友 Moonmoon 話「缸瓦佬」搬返去旺角，但我又唔記得咗個地址喎，好彩行吓行吓，終於都俾我喺洗衣街搵番佢！

 

總共買咗四隻碗碟，埋單盛惠 $80，都已經算係平喇，

如果同「Living Plaza」比，咁就梗係無得比啦！

 

 

 

 

 

上面隻細碟就貪靚先買，$15 隻；下面隻大碟個花其實我都唔多鍾意，

又係大花大朵 ”娘” 到爆，而且嫌佢唔夠深，如果碟餸多汁

的話就好麻煩，但無辦法，成間舖都係得呢隻個 size

比較啱，但點知拎到返屋企，原來差少少先

放得落個電飯煲個蒸架度，激死我！！

 
 
 
 
 
 

呢兩隻我比較鍾意，隻碗好有和風 feel，同埋夠大夠深，

裝湯麵最正！下面隻碟個花清清哋，啱我 style，

個款仲有啲似古玩膺品哦，哇哈哈哈 ……