與 blog 友交流煮食心得，分享生活點滴。
早前 blog 友 Keith 問我有冇試過 A1 Bakery 果個德國合桃提子稞麥包，睇個名，初時仲以為即係佢嘅至愛麵包，因為果隻叫做裸麥合桃提子包，後尾親身去過 A1 一趟，見到個德國合桃提子稞麥包嘅真身，原來同裸麥合桃提子包完全唔同，一睇個款我就知道呢隻應該比果隻更加吸引我。不過個價錢就一啲都唔吸引我囉！賣成 $36 一個，我覺得都幾貴呀，所以我都係等佢夜晚買唔哂時做優惠先再考慮。
點知，過多一個禮拜，我再去 A1 時，發覺喺「麵包優惠」果個 shelf 真係有呢隻包包做特價，半個買 $14 咋！咁就真係啱哂，唔單只有平包買，仲可以只係買半個嚟試食，真係正！
睇個樣就已經知道，呢個德國合桃提子稞麥包比裸麥合桃提子包
扎實好多。
包包裡面同樣有合桃及提子乾，不過個麵包扎實之餘，而且仲係用
酸種整，我諗 Keith 應該唔啱食，因為佢食慣軟包。
一向我都好鍾意喺 A1 買歐陸麵包食，因為佢係完全無蛋、
無牛油 o架，非常健康。
Keith，我諗你都唔駛再考慮呢個包啦，因為完全唔係你果杯茶囉！
上星期整完蘋果撻之後，今晚繼續 "清" 蘋果行動，不過唔再整甜品喇，係用嚟煮餸。
呢個黑椒蘋果炆鹹豬手唔係我創嘅，係媽咪以前間中煮嘅餸，我都幾鍾意食 o架，因為豬手夠惹味，蘋果索哂啲醬汁同肉汁，好入味呢！
材料：
急凍去骨黑椒鹹豬手
蘋果
蒜片
月桂葉 ( Bay Leave)
羅勒 ( Basil )
迷迭香 ( Rosemary )
調味料：
糖
白酒
蠔油
OK 汁
喼汁
雞粉
- 豬手解凍後切件，放滾水內汆水，之後過冷河，備用。
- 燒熱油，爆香蒜片，放豬手落鑊一齊爆香，之後灒酒。
- 加適量水、香草及調味料，用慢火將豬手炆腍。
- 蘋果去皮、去芯後切件，豬手炆至半腍時就加入蘋果一齊炆。
- 當豬手完全炆腍後，校高火，將汁收乾即成。
部份蘋果煮到溶咗，令到個汁好濃，送飯一流！
Notes：
- 唔食得辣嘅話，可買原味鹹豬手。
- 如果想食到原粒蘋果的話，蘋果落鑊後就唔好煮太耐。
- 炆緊豬手時，要留意住水份，如果汁已煮乾但豬手仍未炆腍的話，就要酌量加
水。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
知道噚晚會好夜先收工返屋企，所以噚日朝早起身時就用真空煲煲定啲紅腰豆同三角豆，準備夜晚返到嚟做沙律，咁就可以快手有得食，點知最後教完 Aaron 之後，Miss Cheng 留我喺佢屋企食飯，費事我咁夜返到屋企先食飯喎，咁我就老實不客氣啦！所以煲落咗啲豆就留返今日晏晝整沙律做 lunch 囉！
材料：
紅腰豆
三角豆
長通粉
罐頭粟米粒
意大利陳醋沙律汁
- 豆類洗乾淨，用清水浸過夜，之後第二日再過多次水。
- 用真空煲內鍋煲滾水，落鹽，放入豆類。
- 煲番滾之後，轉慢火煲多 20分鐘，之後放番入個外鍋度繼續煲至完全腍身。
- 另外再煲滾水，落鹽，放入長通粉，依照包裝袋上說明時間煮熟通粉。
- 通粉瀝乾水後過冷河；罐頭粟米瀝乾水份。
- 將通粉、粟米粒及豆類混合好，再淋上沙律汁，拌勻後即可享用。
Notes： - 最好事先用凍滾水製成冰粒及冰水作過冷河之用，咁會比較衛生。 - 想方便省時的話，可用罐頭紅腰豆及三角豆，即開即用。
- 長通粉可用不同款式通粉代替。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
今日晏晝整沙律食，本來想整個 Italian dressing 做沙律汁，可惜屋企材料唔齊，於是就參考咗其中幾種重要材料，變化出呢個意大利陳醋沙律汁。
材料：
鹽
糖
蒜茸
牛至 ( Oregano )
百里香 ( Thyme )
羅勒 ( Basil )
黑椒粉
水
白醋
初榨橄欖油
意大利陳醋
- 先將所有乾料放入碗內，混合好備用。
- 將水、橄欖油同陳醋混合，之後加入乾料，拌勻即成。
味道唔錯，陳醋味道好香濃，又唔會太酸，值得推介呀！
Notes：
- 所有材料並無特定份量，依個人口味調配即可。
- 陳醋份量應比較多，白醋只需少許作調味之用。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
雖然我係一個經常打爛嘢嘅人，但係我反而勁鍾意用玻璃器皿嚟裝嘢食，貪佢唔會上色、可以裝酸性食物、入得微波爐、容易清洗 ……… 實在太好用啦！所以，當我見到「百佳」有玻璃盒換時，簡直雙眼發光！！不過當時都無諗住要換，一來屋企一早已經有呢個牌子最大 size 果款玻璃盒，而且老豆又另外喺深圳買咗個細一皮嘅 "A 貨"；二來，我一向都比較少幫襯「百佳」，要儲千幾分絕對唔係易事，所以一直都無呢個 "鬥心"。
點知有次去「百佳」買嘢時，無端端心血來潮走去部機度 check 吓分，發覺原來自己都有成過千分，雖然距離換到一個啱 size 兼實用玻璃盒嘅分數仲有一段距離，但就起碼唔係遙不可及，於是就開始留意「百佳」"行情"，當然，我唔會為咗攞分而去買埋哂啲無謂嘢啦，只不過係多啲留意有冇啲常用物品減價，又或者如果價錢同「惠康」差唔多的話，我就會放棄喺佢個 "死對頭" 度買，寧願行遠少少去幫襯佢。
心裡其實一早已經敲定換第二大果款長方形盒，因為 size 比較合用之餘，離達標分數亦無咁遠。有次又再去部機度 check 分時，發覺原來我之前買嘢超過咗佢指定嘅數額，所以得到額外十倍積分，突然之間多咗成 600 分，咁就連最大果隻 size 都免費換得到啦！不過最後都係維持原判，決定換第二大果款，因為老豆都話最大果隻太過大，唔係咁有用。
就係咁，不費吹灰之力就可以換到個玻璃盒返嚟喇！
唔知下期兩間超市又有冇啲啱用嘅嘢換呢！
八月初嘅時候，我曾經問過大家嘅意見，我啲信用卡積分用嚟換咩禮品好，當時幾個 blog 友都話換咖啡機同平底鑊好啲，所以我都聽大家話，換咗呢兩樣嘢，上星期四已經將佢哋帶咗返嚟喇！
你哋睇吓，原來個咖啡機好細個，同個 pan 差唔多大咋！
初時我仲擔心一次過拎唔到兩樣嘢，要分兩次拎，點知禮品中心個職員話俾我聽，個 size 好細，一定拎到！咁仲好，一來唔駛我走多轉去換領，二來呢個 size 慳位好多，唔駛煩搵地方擺，而且都係得我同老豆兩個用，個壺嘅容量夠哂二人份量啦！
Winnie，幾時得閒過嚟玩吓部咖啡機呀？
上次整肉絲炒麵時，因為係第一次整，所以唔知道要買幾多個麵餅先夠食，所以一次過買咗兩個，到用水浸開時，發覺原來一個已經夠哂，所以就留起咗另外果個麵餅，放入雪櫃保存，今晚就用埋佢嚟整豉椒味菜鮮魷炒麵。
今次我無將啲麵煎到香脆，因為始終都係唔係咁好脆卜卜果種口感，所以都係就咁炒到乾身就算，脆卜卜果隻就留番俾 Motonako. A 整俾少爺仔食啦！
材料：
炒麵麵餅
咸酸菜
魷魚
青椒
紅椒
洋蔥
醃料：
糖
胡椒粉
調味料：
豆豉醬
糖
紹酒
粟粉
麻油
- 咸酸菜洗乾淨，用清水浸 30 分鐘，之後將水份搾乾，用糖醃一陣。
- 魷魚去衣、去眼，清除內臟及軟骨，沖洗乾淨後切件，用少少胡椒粉醃一醃。
- 麵餅用凍水浸軟、鬆開後瀝乾；青、紅椒洗淨，去蒂後切件；洋蔥去衣後切件。
- 燒熱油鑊，放麵餅落鑊炒至乾身鬆散，盛起備用。
- 爆香洋蔥及燈籠椒，之後加埋咸酸菜，兜炒一陣，灒酒。
- 加少少水，冚上鑊蓋，將材料略煮腍。
- 加糖及豆豉醬，兜炒均勻後，落埋魷魚，快手兜炒至魷魚卷起。
- 用粟粉水埋薄芡，灑上麻油後兜勻即可上碟。
色、香、味都一流呀！
是日晚餐：豉椒味菜鮮魷炒麵 & 粟米紫米露。
Notes：
- 咸酸菜一定要浸水，將鹹味降低。
- 如果想將麵煎香脆的話，可參考肉絲炒麵做法。
- 魷魚非常易熟，當炒至卷身即可，煮得太耐會變韌。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
每年中秋，Winnie 都會有勁多月餅，今年雖然佢話已經少咗，但係都有成 17 盒咁多，真係嚇死人！所以佢都俾咗一盒我，我仲專登叫佢每個牌子俾一個我試 o添！
上星期五因為返工時間勁長，去唔到 Winnie 屋企拎月餅，所以我就叫咗我老豆上去攞，到我放工返到嚟，老豆話俾我聽，Winnie 仲俾咗盒士多啤梨同一個巨型裝水晶梨。個水晶梨真係好大 o架，唔駛問都肯定係日本水晶梨，因為 Winnie 每年中秋都一定會買日本水晶梨食。至於盒士多啤梨都唔弱，一樣咁巨型！
啲士多啤梨大到一盒得四粒咋！
你睇，唔係講笑，幾個士多啤梨都係差唔多有我隻手掌咁大 o架！
今朝早我就將其中兩個切粒，拌入士多啤梨乳酪，再加埋我至愛嘅
燕麥方脆，就係我今朝嘅健康早餐喇！
多謝 Winnie！！
一直都對紅豆情有獨鍾，尤其係日式嘅抹茶紅豆，真係絕配！個人比較喜歡日式紅豆餡多過中式豆沙，一來有原粒紅豆做餡，比較有 o趙頭，唔似豆沙咁 "一 pat pat"；二來豆沙係用油炒成嘅，唔及得日式紅豆餡咁清爽。所以今日整呢個桂花紅豆包，雖然係中式包點，我都用咗日式紅豆餡嚟整呀。
材料：
中筋麵粉 250 克
糖 20 克
黃豆粉 6 克
即用酵母 2 克
泡打粉 4 克
水 110 毫升
日式紅豆餡 200 克
桂花糖 2 茶匙
以上材料份量可做紅豆包約 10 個。
- 將麵粉、黃豆粉、泡打粉、糖同酵母拌勻，然後加水，搓成光滑麵糰。 - 將麵糰滾圓，收口向下，冚上保鮮紙發酵 15 分鐘。 - 紅豆餡同桂花糖混合好，備用。 - 發酵完成後，將麵糰分割成每個重 30 克嘅小麵糰。 - 之後用擀麵棍將小麵糰擀成圓麵皮，每張麵皮包入 20 克紅豆餡。 - 將包好嘅紅豆包隔水蒸約 10 分鐘即成。 啱啱蒸起時脹卜卜、熱辣辣，忍唔住即刻食咗一個。 紅豆餡帶著淡淡嘅桂花香，好正呀！ - 黃豆粉純粹為增添豆香，可以唔用。 - 約果紅豆餡太濕的話，可以放入微波爐內 "叮" 至較乾身，咁就比較容易包入成
Notes：
- 無中筋麵粉的話，可用高筋麵粉溝低筋麵粉代替，份量為 1：1。
餡。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
之前已經預告咗，今日用 Winnie 俾我果條牛鰍嚟煲湯，湯已經煲好喇，依家同大家一齊分享喇！
材料：
牛鰍
雪梨
雪耳
淮山
茨實
無花果
蜜棗
- 無花果、蜜棗、淮山同茨實用暖水浸軟、洗淨備用，無花果開邊。
- 雪耳用水浸發，剪去底蒂，洗淨後汆水。
- 雪梨去皮、去芯後切件；牛鰍打鱗、洗淨，燒熱油，放薑片起鑊，將魚煎至金黃。
- 與此同時，所有材料凍水落煲，煲滾後將已煎好嘅牛鰍放埋落去一齊煲。
- 煲好後加鹽調味即可。
Notes：
- 將雪耳汆水可以去除 "噏" 味。
- 放薑片煎魚可有助辟腥味。
- 若果想湯更加濃的話，可加豬腱或瘦肉一齊煲。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
前幾個星期同 Louisa 個工人 Jovi 傾開偈，佢話原來係菲律賓除咗有普通嘅茄汁外，仲有一種係香蕉 "茄" 汁。吓，香蕉 "茄" 汁！？我問佢係咪成枝黃色 "茄" 汁，佢話唔係，一樣係紅色嘅，咁我問佢香港有無得賣，佢話有，仲話遲啲買枝返嚟俾我見識吓。咁噚日佢就真係買咗返嚟，個款真係同一般茄汁無異喎！
呢枝香蕉 "茄" 汁其實一啲番茄成份都無 o架，純粹係校色。
噚日我問 Jovi 夜晚會要嚟煮咩餸，點知佢話係專登買俾我嘅，我話點好意思，要俾番錢佢，佢又話唔駛。等我諗吓用嚟煮咩餸先！
上星期日放咗工，搭緊車返屋企時，收到 Winnie 嘅電話，佢話佢阿爸出海打咗啲魚，所以將部份細條嘅俾我，咁我梗係好歡喜啦，有免費游水海魚食喎！
如果無老人癡呆發作的話，呢一家四口應該叫做「滑仔」，
果然名符其實咁 "滑"，仲好鮮甜 o添！
呢條係牛鰍，當然梗係要嚟煲湯啦！我今日用咗雪耳、雪梨、淮山
同茨實嚟煲湯。今晚煲好湯後再同大家一齊分享啦！
