冷藏儲存香蕉 I

         我都幾鍾意食香蕉，貪佢又香又甜，高纖維得嚟又飽肚，除咗可以就咁食之餘，食麥皮時加香蕉粒仲可以代替糖、壓成香蕉茸搽上烘脆多士上可以當果醬用，當然，更加可以用嚟整蛋糕啦！我依家只會去超市買果啲已經開始熟嘅香蕉，一來平啲，二來就係唔駛慢慢等佢熟，有時即日買返屋企已經可以食得，方便好多，唔駛慢慢等熟，有得睇無得食。

        但係，香蕉有樣嘢麻煩，就係一但出現梅花點後，就幾乎全部一齊熟哂，有時食唔切的話，會變得熟過頭、好腍，甚至會發黑，為咗唔想嘥嘢，以前我會同老豆兩個人夾手夾腳嗱嗱聲全部食哂佢，但係依家可以唔駛咁啦，因為 Louisa 教咗我將啲熟香蕉剝皮，之後放入盒內，再放入冰格雪藏，咁就唔駛夾硬食哂佢啦！

        解凍後嘅香蕉同新鮮香蕉無乜分別，唯一唔同嘅係水份相對比較多，所以唔好太早拎出嘅解凍，棧越整越濕！而且，冷藏過嘅香蕉解凍後一樣會變黑，所以最好都係臨用之前半個鐘先拎出嚟解凍。如果真係變得深色的話，可以加入適量檸檬汁拌勻，咁香蕉就會變番白 o架喇，因為檸檬汁係一樣抗氧化能力好高嘅食材，可以將已經氧化變黑嘅香蕉回復原本顏色。

        今日晏晝先啱啱用咗啲冷藏香蕉嚟整合桃香蕉蛋糕，聽日會拎一條過去送俾學生 Michelle。至於味道同效果，同用新鮮香蕉整完全無異，一樣咁香濃，好味！