Glasslock 玻璃盒

        雖然我係一個經常打爛嘢嘅人，但係我反而勁鍾意用玻璃器皿嚟裝嘢食，貪佢唔會上色、可以裝酸性食物、入得微波爐、容易清洗 ……… 實在太好用啦！所以，當我見到「百佳」有玻璃盒換時，簡直雙眼發光！！不過當時都無諗住要換，一來屋企一早已經有呢個牌子最大 size 果款玻璃盒，而且老豆又另外喺深圳買咗個細一皮嘅 "A 貨"；二來，我一向都比較少幫襯「百佳」，要儲千幾分絕對唔係易事，所以一直都無呢個 "鬥心"。

        點知有次去「百佳」買嘢時，無端端心血來潮走去部機度 check 吓分，發覺原來自己都有成過千分，雖然距離換到一個啱 size 兼實用玻璃盒嘅分數仲有一段距離，但就起碼唔係遙不可及，於是就開始留意「百佳」"行情"，當然，我唔會為咗攞分而去買埋哂啲無謂嘢啦，只不過係多啲留意有冇啲常用物品減價，又或者如果價錢同「惠康」差唔多的話，我就會放棄喺佢個 "死對頭" 度買，寧願行遠少少去幫襯佢。

        心裡其實一早已經敲定換第二大果款長方形盒，因為 size 比較合用之餘，離達標分數亦無咁遠。有次又再去部機度 check 分時，發覺原來我之前買嘢超過咗佢指定嘅數額，所以得到額外十倍積分，突然之間多咗成 600 分，咁就連最大果隻 size 都免費換得到啦！不過最後都係維持原判，決定換第二大果款，因為老豆都話最大果隻太過大，唔係咁有用。       

就係咁，不費吹灰之力就可以換到個玻璃盒返嚟喇！

        唔知下期兩間超市又有冇啲啱用嘅嘢換呢！