雲呢嗱雪糕伴草莓醬汁 Vanilla Ice-cream with Strawberry Sauce

        星期一晚食完 pizza 之後，仲有 dessert 呀，之唔係雲呢嗱雪糕囉！

        卒之都用哂盒 cream 喇，唔駛再擔心佢變壞！我發覺整雪糕係清咗盒 cream 嘅最好方法，皆因每次整嚫雪糕都用成幾百毫升，真係眨吓眼就用完一盒。

        上次 Lily 食完意式芒果雪糕之後，我問佢下次整咩味好，佢話不如整雲呢嗱味呀！吓，我唔好 o架喎！我一向都唔鍾意雲呢嗱味嘅食物，覺得個味好難頂，但係上次 Louisa 叫我幫佢買雲呢嗱枝時，我聞到啲味好香，好吸引，完全唔係平時聞到果隻味，咁我就知道，果啲 "假" 嘅雲呢嗱味同真嘅完全係兩回事，簡直唔可以相提並論。所以我今次就即管整吓雲呢嗱雪糕，睇吓係咪真係會對佢改觀！因為我驚我自己始終頂唔順 "朕" 味，所以仲特登整埋草莓醬汁伴食 o添呢！

雲呢嗱雪糕

材料：
雲呢嗱枝      1 條
豆漿              320 毫升
蛋黃              4 個
糖                  160 克
淡忌廉          400 毫升

- 雲呢嗱枝切開，用刀刮出雲呢嗱籽後，將兩者一齊放入豆漿中。 

- 豆漿用慢火加熱，差不多快要煮滾時就可以熄火。

- 蛋黃同糖混合，用電動打蛋器打至差不多白色狀態。

- 將煮熱豆漿逐少加入蛋糖混合物中，拌勻。

- 將混合物倒番入煲內，用慢火煮至濃稠，其間必須不斷攪拌。

- 煮好後將混合物隔冰水冷卻，然後放入雪櫃約 3 - 4 個鐘，將混合物充份雪凍。

- 用電動打蛋器將淡忌廉打至七成企身，之後拌入雪凍咗嘅蛋漿混合物。

- 包好保鮮紙，放上冰格雪約個半鐘，等忌廉混合物開始雪硬時就用電動打蛋器
  打鬆。

- 放番入冰格，一個鐘後再次打鬆，重複步驟約 3 - 4 次。

- 將打好嘅忌廉混合物雪硬，即成雪糕。

草莓醬汁

材料：
士多啤梨      150 克
糖                  50 克
檸檬汁          1 湯匙

- 士多啤梨洗乾淨、去蒂，之後切粒，放入煲內。

- 加入檸檬汁同糖，靜置 10 分鐘，等士多啤梨水份滲出。

- 用中火加熱，煮滾後轉慢火，不斷攪拌，煮約 5 分鐘至醬汁略變濃稠即成。

雲呢嗱雪糕及草莓醬汁食譜均參考自福田淳子嘅《我愛冰淇淋》。

除咗草莓醬汁，我仲加咗啲新鮮雜莓，酸酸甜甜好好味呀！

 

不單只係味覺享受，更加係視覺享受 o添啦！

Notes：
- 原食譜係用牛奶而唔係豆漿。

- 如果時間許可的話，煮好嘅雲呢嗱豆漿最好放入雪櫃過一晚，等豆漿中雲呢嗱嘅
  香味可以更加出、更加香濃。

- 煮熱豆漿必須逐少加入蛋糖混合物中，否則容易將蛋黃煮熟凝固。

- 喺煮蛋黃混合物時，如果煮得太耐的話蛋黃就會凝結成塊，咁就要將混合物先過
  篩，隔去凝固咗嘅蛋黃。

- 草莓醬汁嘅濃稠度及甜度可以個人喜好作出調整。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！