2010年1月31日星期日

外國嘅女高音唱中國嘅藝術歌曲會係點?

        吓呢段 video clip 咪知囉!





        我唔知佢本身唱得輕鬆定辛苦,但我就覺得佢唱得好似好辛苦囉!


       


2010年1月30日星期六

班蘭椰漿

        係東南亞食品中,好多時都會用到椰漿同班蘭葉,而將呢兩樣食材夾埋一齊用,呢個配搭簡直就係 "天作之合",不論係聞味道定係食味道,都係非常之夾。

        今日我就整定啲班蘭椰漿,方便隨時拎出嚟用,做各式甜品、糕點都唔錯



送俾 Michelle 嘅新居入伙曲奇

        之前我咪話禮拜一果日由朝到晚都匿喺個廚房度做到無停手嘅,點解我要咁 "犯賤,攞苦嚟辛" 呢?


        原因係因為學生 Michelle 最近搬咗屋,我又唔知買乜俾佢哋做入伙禮物好,如果開口問佢哋想要乜,我知道答案係問咗都等於無問,所以都係慳番唔問口問!坦白講,今次佢雖然係細屋搬大屋,並無 "唔見一籮榖",但其實唔係一件值得開心嘅事,所以我就突然間諗到不如送盒自家製嘅朱古力曲奇俾佢,等佢哋可以甜一甜,開心吓啦!咁所以我咪要趁禮拜一果日 day- off 得閒pre-bake 一次個 chocolate lace crisps 囉!有起咩事上嚟,都有番幾日俾我實習嘛!



 


        我專登去烘焙店度買咗個禮盒,包裝得靚靚先送俾 Michelle 一家,希望佢哋鍾意我呢份小小心意啦!






      因為上次試食過,覺得味道好甜,所以今次將糖粉份量減少60 克,撲嘅糖霜都減少埋,今次甜度就啱好啦,不過亦因為少咗糖霜嘅關係,所以曲奇面嘅裂紋就無咁出,變相無咁靚囉!


        有興趣整呢個曲奇嘅朋友就 click 上面 chocolate lace crisps 個字啦! 


2010年1月27日星期三

女高音王若詩所演譯嘅《踏雪尋梅》

        後生一輩可能唔係好知邊個係王若詩,雖然我都唔係好老,但係我之所以識得呢位歌唱家,係因為媽咪話俾我聽


        好記得細個果陣,媽咪有一本厚過電話簿嘅歌書 ( 其實我到依家都仲有 keep 住呢本歌書 ),裡面有一首歌叫做《歸來吧》,就係由王若詩所唱嘅,我當時就唔係好知呢首係咩歌,但後來學咗聲樂之後,就知道原來即係國語版嘅經典意大利藝術歌曲 Torna a Sorriento ,亦即係 Come Back to Sorrento,中譯《重歸蘇連托》。


        媽咪仲話過俾我聽,佢後生果陣時,曾經聽過王若詩唱《踏雪尋梅》,佢話當時王氏所演譯嘅方式,同我哋平時聽到嘅好唔同。由於媽咪唔係音樂人,所以佢唔係好識點樣演譯番俾我聽,就算識唱,當時佢都唔係記得好清楚點唱喇,佢淨係形容到俾我聽,當歌詞唱到第四次「響叮噹」時,王氏將最高果粒音重覆唱咗幾次,唱出嚟好似鐘聲咁樣。由於媽咪呢番話,我一直都好好奇,好想知道王若詩係點樣唱呢首歌呢!但因為以前資訊科技未有咁發達,又唔係咁容易搵到錄音,所以一路都 "緣慳一面"!


        直到今日晏晝,YouTube 度搵嘢時,無意中俾我搵到《歸來吧》呢個 video,而且仲係由王若詩唱 o添,咁我梗係第一時間 click 嚟聽啦!聽緊首歌果陣,仲俾我 "Related Video" 一欄度見到有《踏雪尋梅》o添呀!嘩,簡直係開心到好似發現寶藏咁呀!!!! 咁我就梗係即刻 click 嚟聽啦!聽完之後,就完全明白哂媽咪嘅形容喇!原來王氏係 repeat 咁去唱果幾粒高音去模仿「叮噹」鐘聲,之後仲接住唱咗一段 cadenza-like 嘅花腔,真係好新鮮、好好聽喎!依家你哋都聽吓呀:




        今日真係好開心呀,除咗因為卒之都俾我還咗心願,聽到呢位前輩歌唱家咁特別嘅演譯之外,仲俾到我一種好特別嘅感覺,覺得係媽咪陪我一齊上網,專登YouTube 度搵到呢段 recording 出嚟俾我聽番,真係感覺又開心,又 warm!


        媽咪,我卒之都可以分享到妳對呢首歌嘅感覺喇!如果妳依家仲喺我身邊,肯定聽完之後我哋會有好多交流 o添呀!


2010年1月26日星期二

軟心朱古力布甸 ( 心太軟 ) Molten Chocolate Pudding

        "心太軟好好食呀!"、"心太軟好正!"、"食完心太軟覺得好滿足、好幸福!",呢啲說話真係聽唔少,未食之前,就會覺得有冇咁好食呀!好彩,我都有幸試過一次咁大把,係Louisa 屋企食過,佢係喺專整 puff 果間「bread papa」度買返嘅,都唔錯呀,$15 個,乾手淨腳,好過自己整!不過近排經過都好似無得買喇,咁點算?


        想食咩,咪自己郁手整囉!所以今日第三個 "製成品" 就係心太軟喇!我睇過好多食譜,大部份都係用一個麵糊攪掂哂,之後刻意將入爐焗嘅時間縮短,從而令到布甸中心未焗熟,做到 "流心" 效果。心諗,咁咪即係好似 blog 友廚房男咁講,即係食未熟嘅生粉漿!?  所以我一直都幾抗拒呢個做法,無諗過跟呢類食譜去整。直到最近喺圖書館借到一本專整朱古力食品嘅食譜,裡面有教整呢個朱古力軟心布甸,係將軟心部份同蛋糕部份分開嚟整,咁難得有呢種食譜,咁我先至會起心整 o架嘛!




朱古力軟心餡


材料:
朱古力      75 克
淡忌廉      80 毫升

- 朱古力放入微波爐,以每次 15 秒將佢 "叮" 溶。


- 加入淡忌廉,拌勻成朱古力漿。


 



- 用油搽勻 6 格冰格,然後將朱古力漿倒入,放入雪櫃冰箱內雪最少 1 個鐘頭。



朱古力蛋糕


材料:
牛油          175 克
朱古力      100 克
黃糖          150 克
雞蛋          3 隻
自發粉      250 克
鹽              少許
奶              約 3 - 4 湯匙
糖霜          少許


- 牛油於室溫放軟;雞蛋拂打成蛋液。


- 朱古力 "叮" 溶,之後攪拌至幼滑;麵粉同鹽過篩 3 次。


- 牛油用膠刮壓成忌廉狀,加入黃糖,用電動打蛋器打至發白。


- 將蛋液逐少加入牛油霜內,拌勻。


- 篩入麵粉,拌勻成麵糊。


- 加入朱古力攪拌,然後逐少加入奶拌勻。


 



- 布甸模內要先薄薄搽上一層油,然後用麵粉黐滿整個模內,方便焗好後脫模。


 



- 先將 1/2 份量嘅麵糊倒入布甸模內,放入一粒已雪硬嘅朱古力餡。


- 之後再倒埋 1/2 份嘅麵糊入模內,合共佔布甸模 8 成滿。


 



- 錫紙薄薄搽上一層油,然後覆蓋住布甸模,包好後放入已預熱至 180 °C 嘅焗爐內
  焗約 25 分鐘就完成。
 


- 最後灑上糖霜裝飾就大功告成啦!


以上材料份量可做直徑 7.5 cm 布甸 6 個。


食譜參考:《chocolate》by Linda Collister



 



哎呀,失敗咗喇,啲朱古力醬都唔流出嘅!


 


        因為掛住整焗豬扒飯,焗好之後我無理到佢,由佢一直放喺個爐裡面,可能就係因為咁,成個蛋糕都熟透,做唔到軟心效果。不過個味道唔錯喎,唔會太甜,蛋糕好鬆軟,中心朱古力醬好香濃。


        下次再挑戰過!一定要做到軟心為止!!

 

Notes:
- 如果無自發粉,可自行用麵粉加泡打粉製作,份量比例為 100 克麵粉:1 茶匙泡
  打粉。


- 我落3 湯匙水就已經可以拌成稠度適中嘅麵糊。


焗豬扒飯

       上次喺 Louisa 屋企食過佢親手整嘅焗豬扒飯,真係好正,而且我其實都幾鍾意食,見佢整都唔係好難,所以一於自己都試吓整先!因為自家製作會用好足料,所以都幾多功夫,幾多嘢要準備,都做到好攰。不過學 Louisa 話齋,煮完出嚟好好食的話,喺廚房企足幾粒鐘嚟整都係值得嘅!
 
        我參考咗蘇施黃同 blog 友通少個食譜嚟整焗豬扒飯,不過預咗實無出邊街整果啲咁正㗎啦,話哂都係第一次實驗啫。
 

朱古力裂紋脆曲奇 Chocolate Lace Crisps

        今日真係好充實、好忙碌,一早起身就做唔停手,買完餸返嚟就一味匿喺廚房度喇!而家就同大家分享一吓第一件 "製成品" 先啦!


        上次將本cupcakes & cookies 送俾 Louisa 之前,我睇中咗裡面其中一款朱古力曲奇,賣相好靚,唔單之灑上糖霜,仲有好靚嘅裂紋 o添!睇完個食譜覺得都唔係好難整,趁呢幾日天氣又凍過,就試吓整啦!



材料:
黑朱古力      100 克
牛油              80 克
糖粉              220 克
雞蛋              1 隻
中筋麵粉      150 克
可可粉          2 湯匙
梳打粉          1/4 茶匙
糖霜              40 克


以上材料可做 24 件曲奇。


食譜係出自《cupcakes & cookies》。





- 朱古力與牛油座熱水溶解,之後拌勻。


- 雞蛋拂打成蛋液;麵粉、可可粉同梳打粉過篩 3 次。


 



- 將糖粉同蛋液拌入朱古力牛油混合物內,再篩入粉類,拌勻成曲奇麵糰。


- 用保鮮紙將曲奇麵糰包好,放入雪櫃內雪 15 分鐘以上至麵糰硬身。


 



- 麵糰雪至硬身後,分成 24份,然後滾圓成球狀,再將糖霜滾滿麵糰表面之後將
  麵糰放
已鋪入爐防黏紙嘅烤盤上


 



- 放入已預熱至 180 °C 嘅焗爐內焗 15 分鐘就可出爐。


 



- 出爐後放喺放涼架上攤凍。


 



果然真係可以焗到好似書裡頭幅相咁靚喎!


 


        呢個曲奇嘅朱古力味好香濃,好脆口。不過唔知係咪因為我做得太大嚿呢,個心裡面唔似外面咁脆,有少少韌,可能太厚,焗得唔係好透心。另外,下次再整時,麵糰表面要滾少啲糖霜,因為好鬼甜呀!



Notes
- 中筋麵粉可用低筋麵粉溝高筋麵粉做成,其份量比例為 1:1。


- 朱古力同牛油可放入微波爐內 "叮溶",以每次 15 秒逐步溶解。


- 麵糰入爐後,會因受熱而瀉開,所以麵糰與麵糰之間要預留一定距離。


2010年1月22日星期五

全麥杏仁香蕉蛋糕 Whole Wheat Almond Banana Cake

        原本逢禮拜四朝早我都會執屋、做清潔,因為夜晚喺中心教到好夜,差唔多 10:00pm 先收工,返到屋企都成 11:00pm o架啦,所以逢禮拜四都係叫老豆煮飯,煮番熱啲隔夜餸留飯俾我,咁我朝早就唔駛買餸煮飯,有時間做清潔囉!不過前晚老豆個農場 friend 煮咗一大盒生炒糯米飯俾我哋兩個做晚餐,所以前日一樣唔駛煮飯,見突然間有空閒時間,咪提早一日做清潔囉,咁變噚日朝早就有時間整蛋糕喇!


        屋企啲香蕉擺到好熟,勁多梅花點,呢個時候最好就係要嚟整香蕉蛋糕啦!不過今次我就溝1/4 全麥麵粉同少量杏仁粉,睇吓味道得唔得先!





材料:
低筋麵粉      150 克
全麥麵粉      50 克
杏仁粉          20 克

泡打粉          1 茶匙
梳打粉          1/4 茶匙
鹽                  1/4 茶匙
牛油              125 克
黃糖              125 克
雞蛋              2 隻
香蕉              2 隻 


以上材料份量可做一個 21cm X 11cm X 6cm 蛋糕。


- 牛油室溫放軟;杏仁粉要預先焗香,放入焗爐,用 180°C 焗 6 - 8 分鐘。


- 所有粉類 ( 杏仁粉除外 ) 同鹽先過篩 3 次,之後放入攪拌兜內拌勻。


- 用膠刮將牛油壓成忌廉狀,加入黃糖,用電動打蛋器打至發白。


 



- 分次加入粉類混合物及焗香杏仁粉,用電動打蛋器低速拌勻成粗粒狀。


- 香蕉去皮,用叉壓爛成香蕉茸後,加入粉粒內以低速拌勻。


 



- 最後加入雞蛋,繼續以低速拌勻成麵糊。


- 將麵糊倒入焗盤,放入已預熱至 170°C 焗爐內,先焗大約 15 - 20 分鐘至麵糊表
  面焗硬。


 



- 然後將焗盤拎番出嚟,喺麵糊表面用刀割一條約 1 吋深嘅坑紋。


- 之後放番入爐內,繼續焗多 25 - 30 分鐘至熟透。






今次個色焗到好金黃、好靚呀!但係中間條坑紋就唔係
好出,下次再焗耐啲先拎出嚟割紋應該會好,但
起碼今次都唔會好似之前咁 S 形紋先啦!


 


        香蕉蛋糕真係食極都唔會厭,真係好好好好食,所以我久唔久就會整 o架啦!不過,唔知係杏仁粉個份量比較少呀,定係啲香蕉實在太熟、太香嘅關係,杏仁味好淡,如果杏仁味再香濃啲就仲正呀!好,再參考吓其他食譜,睇吓杏仁粉個份量應該要幾多先得。


 



呢個膠盒係老豆個 friend 用嚟裝糯米飯俾我嘅,我3 件蛋糕
落去,等老豆還番個盒俾佢時當做回禮,哈哈!



Notes:
- 如果唔係用防黏焗盤,記得要預先鋪上牛油紙,方便脫模。


- 香蕉千祈唔好預先壓成香蕉茸,因為會氧化變黑。


- 無全麥粉的話,就直接用 200 克低筋麵粉代替。


- 香蕉越熟就越香甜,所以糖嘅份量需因應香蕉甜度而有所增減。


- 要做出好食鬆軟嘅香蕉蛋糕,秘訣同整 muffin 一樣,當所有材料一拌勻就要立即停
  止攪拌,否則麵糊就會起筋,蛋糕就唔會鬆軟,變到死死實。


2010年1月20日星期三

家中植物

        老豆喺農場唔單只會拎啲蔬果返嚟,最近仲拎啲花返嚟,仲幾靚 o添 o架!



        其實佢個 friend 個農場係種年花嘅,不過每年過咗農曆新年之後,就會改種蔬果。依家就快又過年啦,所以早幾個月已經開始種花,準備新年拎去賣。



呢棵蘭花真係好靚,節枝後個流線形態就更加有美感。
老豆用個玻璃花樽插起佢嚟送俾媽咪。


 



咗蘭花,仲有呢枝咁茂密,兼開得好燦爛嘅菊花。


 



咪以為呢度有好多枝花呀,細心睇吓,其實只係得一枝
主幹咋!我就用個水晶花樽插起佢,用嚟供佛。


 



呢盆就唔知係咩嘅,老豆已經買返嚟種咗好耐 o架喇,
聽佢講好似係內地禁止出口 o架喎!


 



其實買嚟果陣只係用呢個細盆種 o架咋,後來越生越大棵,所以
早前老豆就將佢分盆種,一分為二。


 



呢兩盆香草之前已經喺我個 blog 度亮相過喇,咪就係
Louisa 送俾我果兩盆囉!今次順便掟埋上嚟俾佢
 Arthur 睇吓兩盆香草嘅近況。


 



呢盆羅勒就無乜點生長到,又無乜點凋謝到,好似
freeze 咗咁樣!!好奇怪。


 



至於盆檸檬薄荷就生得好濃密,已經剪過幾次 o添喇!
Lily 拎返屋企沖茶,佢都不知幾鍾意。


2010年1月19日星期二

Dinner Buffet @ Habourside, InterContinental

        星期日晚,我同 Winnie 去咗洲際酒店度食 buffet,係呀,你無睇錯,真係去洲際酒店 o架!做乜喎,窮鬼唔去得大酒店食自助餐嘅咩!!咁反正一踏入 2010 已經每個月少$3000 收入囉,咁唔掙在豪埋俾佢啦,反正都係囉!


        哈哈,身邊朋友肯定依家喺度諗緊,你條友仔做乜喺度發風,但係我無發風呀,全部真人真事,無花無假 o架,只不過係埋單時唔係我出錢咋嘛! 其實果晚係好友 Louisa 請客,請我同 Winnie 食 buffet。因為之前 Arthur 同 Genevieve 嘅鋼琴同聲樂考試成績出咗,都好理想,呀唔係,應該係話好 "出人意表",真係我哋全部人都無諗過佢兩個有咁好成績,Genevieve 第一次就已經攞到 merit,而 Arthur 就仲勁,差 3 分就 distinction,我哋個個當然都好開心啦,咁咪食餐慶功宴囉!


        但查實果晚主角係 Winnie 至真,因為我教 Arthur 彈琴同幫 Genevieve 伴奏兼練 aural 係有收學費,但 Winnie 幫佢哋練 aural 同考 mock exam,就只係純粹 "拍膊頭" 幫手,佢要老遠由屯門過去馬鞍山,真係一個東、一個西 o架!所以 Louisa 咪諗住請佢食番餐勁嘅囉!


        好喇,發完風,係時間睇吓食物喇,去片 ~ ~ ~ ~ ~ ~ ~ ~ ~



嚟個冷盤做前菜先,有龍蝦、凍蟹腳、煙三文同青口。龍蝦 OK,
  青口好 "海鮮",但啲蟹腳就唔係我杯茶喇,無乜味,得個鹹字。


 



厚切三文魚同吞拿魚刺身,不過無乜味,所以 Winnie 話蝦係好食
啲,不過我唔好,所以無攞,但其實 Louisa 話最好食係帶子
刺身囉,不過我哋掛住傾偈,最終都無試到,可惜!


 



呢杯唔知叫乜嘅特飲原本係 Louisa order 嘅,不過味道真係好酸,
我試著少少都頂唔順,喺呢個時候"酸精" 當然要接收
佢啦!
我同 Louisa 都估到 Winnie 試飲完個反應係點:「係有酸
味,不過都唔係好酸啫!」果然係酸精本色!!


 



熱食出場,有香口 pizza、salami、雞卷同兩款煎魚塊。但估唔到
呢碟最好食嘅反而係個黑麥包囉!


 



好快趣,Arthur 就已經開始攻 dessert,呢個 "朱古力精" 揀嘅甜品
果然係清一色朱古力,
有 chocolate macaron、chocolate
mousse 同 chocolate cake。


 



到我食甜品喇,之前見到 Arthur 杯 mini choco mousse 咁精緻,我都
 唔執輸,仲拎多兩件 mousse cake,係 rapsberry 同 chocolate。
我覺得 rapsberry 個味道對於我嚟講比較好味、比較 fresh。


 



繼續甜品,有 "人工" 勁凹肚臍madeleine、酥皮蘋果卷、麵包布甸、朱古力 mousse 同曲奇。個朱古力 mousse 係 Winnie 嘅推介,真係好香濃嘅朱古力味!


 



嘩,乜 Louisa 咁勁呀,帶定個盒去裝走macaron!?梗係唔係啦,
哋咁大方高貴,點會做埋哂啲咁樣衰嘅動作呀!查實佢嚟酒店前
咗學整 macaron,所以一早已經同個 waiter 講明果啲係自己
嘅,費時以為我哋專登帶個盒嚟裝走佢。




        盒裡面果 macaron 係 Louisa 品,而盒上面果兩嚿就係酒店嘅 "粗製濫造" 貨色。Louisa 並唔係因為自己識整 macaron 就去踩人哋,佢真係無講錯 o架,酒店果啲真係好差囉,個樣整得唔靚,好求其,有啲餅仲夾到歪哂 o添!食過 macaron 嘅朋友都應該知道個 texture 係點喇,酒店整嘅有啲好韌,Winnie 形容似食緊橡皮糖;啲就鬆脆到似食緊餅乾;有啲餡就係硬 meringue 嘅,咁都得!So far 咁耐食過咁多 macaron,包捨埋 Louisa 喺法國帶返嚟果啲,都係佢自家製作最好食,因為好多都整得好韌,而法國最正宗果啲就超甜,甜到 un -頂- able!!而 Louisa 學整果啲就各方面都配合得啱好,個 recipe 幾得!



Genevieve 就拎咗好多 chocolate fountain strawberry 嚟食,剩
隻碟上面嘅古古力就要嚟畫碟,好靚 o架,真係幾有天份喎!


 



佢仲幫我同 Winnie 一人畫一隻 o添!


 



食完哂嘢,梗係要影番幅大合照留念啦!


 



呢張就係攪鬼 "NG" 相,「NG」 呢個字係有雙重意義 o架!係咩?
Hm……唔知 Winnie 參唔參透到呢,呵呵!


 


P.S.  我其實好早就已經到咗尖沙咀,行咗兩個新商場:「i-square」同「K11」。不過對於我嚟講都無乜特別,無咩好行,反而去到「K11」個正門見到幾靚,就影咗幾張相,不過質素好差,因為我唔係好識夜晚同黑暗環境影相,哋睇到之前啲相就知啦,所以都無乜心機影,得果幾張,呢方面我係超低能呀,麻煩大家忍耐吓!