燒排骨

        早前見到 blog 友 Motonako.A 整咗叉燒同燒排骨，叉燒我自己都整過幾次，但燒排骨就未整過，於是就問吓佢點整。原來同整叉燒係一模一樣做法，只不過就改用排骨，至於用邊種排骨，Motonako.A 就話無所謂，隨自己喜歡，於是我噚日就用咗一字排嚟整，整出嚟個效果都幾好呀！

       

材料：
急凍一字排 ( 金沙骨 )
蜜糖

醃料：
叉燒醬
老抽
玫瑰露酒

- 首先將一字排解凍，洗乾淨後用醃料醃過夜。

- 烤盤鋪好錫紙，放上醃好嘅一字排，然後放入已預熱至 180°C 嘅焗爐內。

- 先焗 10 - 12 分鐘，然後將排骨翻轉，再焗多10分鐘。

- 之後搽上蜜糖，入爐焗 2分鐘，翻轉再搽蜜糖，同樣焗多 2分鐘就得喇！

        味道方面，我就唔知喇！！點解會咁講，因為噚日我返工時喺坑口地鐵站經過一間齋舖，見到門口棟咗個牌喺度，寫住「是日齋期」，我先發現原來噚日喺觀音誕！所以雖然我照整呢個燒排骨，但我就無食到，淨係我老豆食咋！ 不過反正個叉燒醬都係現成買，又唔係自己調出嚟，都唔會難食得去邊啦！